اولا الف مبرووك ... ثانيا باين انك عاقد العزم من زمان على هالزواج ولا كنت محتاج لأي رأي او اي مشوره
على العموم اسئل الله لك التوفيق والبركه والصلاح ولزوجتك الصبر وان يربط على قلبها ويحفظ لها بيتها واولادها
وان يزيد في حبكم وصلتكم ببعض
اما بخصوص اسئلتك فراح ارد عليها من خلال تجربتي
اولا بخصوص زيادة محبتك لزوجتك اظنه رحمه منك لحالها وكيف راح تتقبل الوضع
الله يعينها ويصبرها
اما بخصوص السكن اذا تبغى راحتك اجمعهم في سكن مشترك وكل وحده لها خصوصيتها في كل شئ من المدخل وغيره
واذا تبغى راحتهم فالبعد افضل وهذا من واقع تجربه ...
وكثيير يفضلووو البعد لانه لاهذي تدري عن هذي ولايدروو بزياراتك ولا يدروو باللي تجيبه لكل وحده فيهم ولا خرجاتكم اذا
فيه وحده منهم محتاجه خرجه خاصه لظروف معينه ... وانا افضل البعد بس ماحصل لي ولو كنت موظفه اول شئ اسويه
اني اخرج من هالسكن واذا يبغاني يجيني لاني مو مرتااحه
اما بخصوص تواصلهم فهذا راجع لهن مستقبلا وعلى نفسياتهم اذا بتخلي الامر اختياري يعني مو اجباري وانا افضل يكون
الامر بيدهن لانه كلن له طاقه تحمل وبعضهن ماتقدر تتحمل مثل هالوضع .. انا فرضت عدم التواصل ولقيت فيه راحه
وطبعا في كافة النواحي مافيه اي صله ولا بأي شكل من الاشكال حتى الاطفال كانو يجوني والحين رفضت بسبب
اللي عملوه من مشاكل لانه ينقلوو لامهم اي شئ تتصوره لو كلمه وطبعا العقليات تختلف وانت لك الحريه بس افضل تخلي
الامر لهن وخلي عندك ديمقراطيه ..
الاطفال وهم اهم شئ في الزواج الافضل تواصلهم مع بعض ولازم يكون من البدايه يعني يشوفو اخوهم او اختهم من لما
يكون صغير عشان يتعلقو فيه ويحبوه ويكون اجتماعهم في حديقه او بيت العائله عند اهلك لانه لازم يقربوو من بعض
هي محاوله لتقريب النفوس ولما يكبروو القرار بيدهم وانت مالك الا انك توجه وتعلم وتتواصل معاهم وتجذبهم لبعض بعدم
التفضيل بينهم
الامر مو سهل واسئل الله لك التوفيق في جميع امورك
فيه نقطه اخيره بخصوص التواصل بينهم وهي انه بيكون هناك استقرار في البيتين مع الزمن راح تلاحظ فوائده لانه كل وحده
بتنسى الثانيه وتنشغل بأولادها وبيتها وفيه من يرفض فكرتي هذي بس هذا كله يعتمد على مدى تقبل الزوجتين او رفضهن
للتواصل .وفكرتي هذي مقتنع فيها زوجي وعجبته لانه لقي فيها راحه له من المشاكل وغيره فرض التواصل والمشاكل تجيه
وحده ورا الثانيه وفيه من نجح معاه وطبعا لا نعمم ..
بخصوص المبيت الافضل هنا ليله وهناك ليله وهو افضل شئ مع زيارات للبيتين اذا كنت عند الاولى تروح للثانيه زياره والعكس
اما شهر العسل اذا زعلت الاولى وراحت لاهلها راح تلاقي اطول شهر عسل وهذا اللي حصل معاي ولما رجعت رجع كل
شئ تمام واذا تبغى تطول وهي موجوده فممكن انك تستأذن من الاولى انك تمدد شهر العسل اكثر من سبعة ايام وهي
حره وممكن انك توعدها بشهر مثله والله ييسر لك اللي فيه الخير
اسفه طولت عليك واذا عندك اي تساؤل انا حاضره ولك فائق احترامي
موفق اخوي بأذن الله
تحياتي لك
التعديل الأخير تم بواسطة على امل اللقاء ; 15-01-2008 الساعة 06:14 AM
15-01-2008, 06:08 AM
ضوابط المشاركة
العرض الشجري