بسم الله الرحمن الرحيم
السلام عليكم ورحمة الله وبركاته
من شهرين تقريبا وآنه كنت أقرا بهذا القسم من هذا المنتدى وهذي أول مره أشارك فيها بالكتابه فيه بسبب اللي أحس فيه من ضيق وألم وأبي اللي أتكلم له ويخفف عني .
آنه أصبحت مطلقه من 6 أشهر بعد 3 سنوات من الزواج وأعتقد إن سبب طلاقي غريب شوي وماسمعت أحد عنده مثل سببي إلا نادر.
آنه تزوجت من ولد خالتي وطلاقي كان بقرار منه هو من دون ما يراعي رايي أو قراري و هذا كان بسبب إن رزقنا بولد إتضح بعد ولادتي إنه يعاني من مشاكل إعاقه حركيه وبصريه وبعد علاج بالخارج وفحوصات تبين إن المرض وراثي وإن زوجي هو حامل المرض وآنه تحاليلي سليمه وإن ممكن لو راح نييب أطفال ممكن يكونون أسوأ من ولدنا أو ممكن طبيعيين بالحظ لكن أهو مابغى يستمر لأسباب منها قالي لأن مايبي إييب بعد أطفال معاقين لأن كان تعب علينا وايد وإن راح يظلمهم ويقول أخاف أظلمج مع إني قلتله إنت وولدي عندي بالدنيا مابي شي ومن كلامه مره يقول يمكن يبي يتزوج ومره يقول صعب وقالي إن الدكتور يقول فيه علاج بس يطول مادري شالمعنى وما إستفسرت منه يمكن ماله خلق يصبر .

وقالي كلام جارح ويعور القلب قبل لا يطلق إن إنتي ليلحين صغيره وكل من يتمناج ولا تظنين إنتي راح تنفصلين ما راح تتزوجين لأن ألحين الكل يدور على الأخلاق وإن إنتي لازم تييبين إخوان حق الولد أبي أحد يقولي في أحد يحب مرته وشاريها يقول هالكلام عقب هالعشره يقولي جذي ليش والله كل ما أذكر كلامه قلبي يعورني ومع إن زوجي كان مايعرف يحب أصلا ويقول آنه أكره الرومانسيه وآنه عكسه بالمره اقدر الحب وايد وإذا إرتبطت بأحد أحب حيل و أتعلق فيه وأعطيه كل ماعندي بس مادري ليش سوى فيني جذي.
حتى لو كان السبب قوي لكن الطب تطور أكيد فيه علاجات لكن الشي يبيله صبر هذا إبتلاء من الله وإختبار وعلى الرغم من هذا كله وإن زوجي سلبياته أكثر من إيجابياته وعلى الكلام الجارح اللي قاله حقي والله إني لحد ألحين أحبه وايد وودي أشوفه وأكلمه وقاعده أشتاق له أكثر وأحبه اكثر مع إني المفروض أكرهه.
ولحد ألحين دعائي بالصلاة دايما أطلب إن الله يهديه ويرجعه حقي ومو قادره أدعي إني أتزوج مره ثانيه مع إن أدري رجعته مستحيله لكن أملي بالله كبير
وعقب هذا كله آنه كتبت موضوعي لأني أبي رايكم ولاني لحد ألحين من 6 أشهر حالي وضيقتي مثل ماهي مو قادره أغير شي بنفسي الناس يشوفوني أضحك و أسولف لكن محد يدري بالألم اللي بداخلي والله إني أحس بحرقه بقلبي كل يوم والذكريات ذابحتني وأحس إني ضايعه بدونه و الحياة ماعاد لها طعم عندي .

وأخيرا سامحوني على الإطاله
والسلام عليكم ورحمة الله وبركاته


[line]

يا قلبي انا
الله يخلي لك عمر ويـطعمك بره ويقر عينك بشوفة خوانه
شوفي يا قلبي
اذا ضلك تسألي ليش وليش
اكيد بتنجلطين بعيد الشر عن قلبك
لو تقولي هيك الله كاتب لي بترتاحي
وأهلا وسهلا فيك آخت معنا

الله يسير لك كل صعب ويجبر خاطرك يعوضك خير

ام وليد

__________________


اللهم بارك لي في أولادي ولاتضرهم بإحد من خلقك او بشي ووفقهم لطاعتك وارزقني برهم,اللهم يامعلم موسى وآدم علمهم , ويا مفهم سليمان فهمهم , ويا مؤتي لقمان الحكمة وفصل الخطاب آتهم الحكمة وفصل الخطاب,اللهم علمهم ماجهلوا وذكرهم مانسوا وافتح عليهم من بركات السماء والأرض إنك سميع مجيب الدعوات, اللهم أني أسألك لهم قوة الحفظ وصفاء الذهن وسلامة القلب وسرعة الفهم ,اللهم اجعلهم هداة مهتدين غير ضآلين ولا مضلين

كان الله بعونك اختي..
6 اشهر فترة قصيرة حتى تنسين...
لاتعلمين قد يكون خيرة ربما ترزقين بزوج افضل من طليقك..

أختي الكريمة ...
آلمني ما سطرتيه هنا ...
كان الله في عونِك !

لكن دعيني ألفت نظرك لشئ ...
زوجك أكيد يحبك ولم ينسى العِشرة والذكريات بينكما ...
لكن ياقلبي كثير من الرجال يأخذون الأمر بمنطق العقل ...
وليس كغالبية النساء العاطفيات بطبعهن ...
يعني ببساطة :
أنتِ تفكرين في الحب والمشاعر ... وكيف هانت عليه
لكن هو يفكر أنه سبب للمشكلة التي أنتم فيها ...
ولو أنه قدر الله وليس له ذنب فيه ...
لكن هو لا يريد أن يظلمك ...
أنا أدركُ إحساسك ...
وأنكِ تريدين إكمال باقي عمرك معه ...

لكنه لن يستطيع أن يعيش معك وهو يدرك أنه سبب لمعاناتِك ولو للحظة ...


والله لا أدرى ماذا أقول ؟
أسأل الله أن يشفي زوجك السابق وأن يجمع بينكما في خير ...
وإن لم يكن ...
فأسأل الله أن يعوضِكِ خيراً
اللهم آمين

أختي سلامات ياقلبي
مشكوره على الرد الحلو وكل كلامج صح والحمد الله على كل حال والله كريم إن شاء الله

أختي كل الغلا
أشكرك على ردك والله يعيني إن شاء الله ويعين الجميع

أختي lovepeaceangel
أشكرك على الرد الرائع كلامج بصراحه يريح ومثل ماقلتي فعلا أهو قالي فكري بعقلج مو بقلبج لكن أهو يقدر بس آنه مستحيل أقدر
والله كريم إن شاء الله

و ما يدريك .. لعله يتألم مثلك تماما أو أكثر

لكن الشيء الأكيد لا يريد أن يحرمك فرحة الطفل السليم المعافى


شفى الله طفلك و كتب الله لك الخير أينما كان

ام عمر

بصراحة عورنى قلبى عليك حيل ... والله مدرى شقولك ..لانى انا اعانى نفس مشكلتك وتقريبن نفس الاعاقة

والحمد لله على كل حال انا الاول جاء كفيف ... والثانى والثالث الحمد لله سليمين بس الاخير طلع فية نفس الاعاقة

يعنى يمكن لكى خيرة امر الطلاق ... الله يبى يعوضك احسن منة إن شاء الله

انا ما الومك والله وحاسة بكل كلمة قلتيها بس حطى عندك يقين ان هذا ابلاء من الله ولا تجزعين عليك بالدعاء المستمر لعمر ان ربى يشفية وينور بصيرتة وبصرة إن شاء الله

__________________

أختي عبير الرياض
مشكوره على الرد لكن ياإختي أهو كان مايبي ينحرم أكثر مني لأن آنه قلتله آنه مستعده استمر معاك وعندنا ولد واحد لكن أهو اللي رفض