أرجوكم محتاجة لكم و لو بدعوة من قلوبكم الرحيمة
أتمنى تقرؤون قصتي من البداية و تنصحوني.. او حتى لو تدعون لي و والله إني أكتب و دموعي على خدي في حالة لا يعلم فيها إلا الله سبحانه..
عمري 21 سنة و الله أحس أن عمري 50 سنة!, حاليا مغتربة للدراسة, ما تغربت بسهولة إلا لما إنسدت كل الأبواب قدامي و ما لقيت في وجهي إلا الإغتراب..
أقسم بالله إني أول مرة بحياتي أصارح أحد بالمعاناة و الحرمان اللي أعانيه..
بصارحكم بتفاصيل ما أحد يعلم بها إلا ربي.. أضحك و أبتسم و أخفي قصة الحرمان اللي ما يعلمها إلا الله و أنتم الحين..
وعيت على الدنيا... عندي بنت خالة قدي و كانت معاي بالمدرسة... كنت أروح بيتهم هذيك الأيام... و كان أبوها يتحرش فيني جنسيا بكل مرة كنت أروح بيتهم فيه .. إلا إني أقسم بالله ما كنت واعية لهذا الشي بس إني أتذكر إني كنت أتهرب و أهرب منه.. مع العلم كان كبير بالسن و كان يتحرش فيني لما كنت بنام مع بنت خالتي اللي هي بنته و في غرفة خالتي زوجته!!
هالشي ترك فيني عقدة نفسية مع مرور الأيام و السنين مع حصول عداوات بين الأهل و ابتعاد بنت خالتي هذي عني...
صار عندي إحساس و يقين بأن ما لي قيمة أبدا ..
عشنا حياتنا بمشاكل عائلية كثيرة كثيرة .... بديت أفقد الثقة بكل أحد .. صار عندي تناقض.. كرهت الرجال من تعامل أبوي لأمي و لنا و عدم اهتمامه بنا.. بنفس الوقت أحس أني أحتاج لحنان رجل سند لي خصوصا ان ما عندي اخوان.. بس اخوات
كبرت و وصلت للمرحلة المتوسطة و جاتني بفترة من الفترات حالة نفسية لدرجة أن أمي كنت أشوفها لأول مرة بحياتي خايفة علي.. على عكس ما كنت أشوفها قبل تلعني و و تسبني و تضربني ضرب مبرح و أحسها كانت قاسية معاي حيل حيل حيل ... على الرغم من ذلك إلا إني نسيت هذا كله حاليا أو بالأحرى أحاول أنسى ... جاتني الحالة النفسية إني كنت أبكي بحرقة صرت إنسانة زاهدة ما أبي شي من هالدنيا أقول مصيري بموت و كنت أتوهم إني خلاص بموت..
عدت الأزمة بعد شهور من القراءة و الدعاء ووو .. و رجعت لطبيعتي بعدها ..
وصلت لثاني ثانوي.. و صارت مشكلة كبيرة جدا بين والداي... حصل أن أمي استعانت بجمعية حقوق إنسان مثل ما كنت اعرفها... و لان ما عندي اخوان و اهل امي كلن لاهي بحياته و امها وابوها متوفيين و هي ايضا ما عندها اخوان ... خلتني اكلم عضو بهالجمعية قال يبي الايميل على قولته بيرسل موقع الجمعية ووو.. كنت على نياتي و اعطيته الايميل.. اضافني بالماسنجر .. بعد ما عرف بكل تفاصيل حياتنا و كيف عايشين بمعاناة و يدري ان ما عندنا احد رجال يوقفون معانا.. استغل وضعي و أشوفه طيب معاي.. و ارتحت اني اشكي له و حتى انه اوهمني انه بيتزوجني مع العلم عمره بالستين!!! لكن اقسم بالله كنت بس ابي اهرب من واقعي المرير و ما كان عندي غير الدراسة مو حبا فيها لكن ما كان عندي شي غيرها يسليني حتى بالاجازات.. ما نسافر و حتى الاهل .. اهل بالاسم بس ... ما كأنهم يعرفونا .. كأننا منبوذين بمشاكلنا ما أحب يحبنا شذنبنا ... وصل الحال اني سجلت بمعهد بالاجازة الصيفية يلهيني عن مشاكل اهلي اللي تشيب الراس ..
عضو الجمعية هذا أوهمني بانه يحبني حتى انه شرالي كتب و قصص هدية و جابها لي البيت!!! كنا لحالنا بالبيت من دون ابوي.. كأن احنا يتامى يشتري لنا فواكه و اكل لان ما كان عندنا احد يشتري لنا! توهمت اني احبه لانه كان طيب معانا و وثقنا فيه ...للاسف قص علي بوقت كان عمري فيه 16 و المشاكل اعمتني كنت بس ابي احد يهتم بي و ما صار بوجهي الا هو ... طلعت لي شريحة و ركبتها على جهاز قديم جدا و بدا يكلمني عليه .. حسيته مع الوقت حبني و سحرني ماادري شلووووون وافقت اني اطلع معاه بعد دوام المعهد.. مرني هناك و طلعت معاه و قلبي يرجف .. وداني فندق فخم و دخلني غرفة فيه و لبسني عقد ذهب طرت فيه و دمعت عيوني ان احد مهتم لي و يحبني! ... بعدها شفته قرب مني قمت اصرخ و اصيح مو مستوعبة ايش اللي يحصل ... اقسم بالله كنت فرحانة لحنانه لي و سلسال الذهب اللي عطاني اياه .. ما كنت متوقعة انه بيتحول ذئب و نيته سيئة و احمد ربي مليون مرة انه نجاني منه هذاك اليوم ..
رجعت البيت طول اليوم ابكي ... كيف هالانسان طلع حقير ... كسرت خاطري امي كيف واثقة فيه و حاطة الامل كله عليه بحل قضيتها... كنت ابكي كيف اخلي تكره هالرجال و تشيل ثقتها فيه خصوصا اني ما قدرت اقول لها اي شي ... خفت تخسر ثقتها بي و اطيح من عينهاااااااا.. خصوصا انها هذاك الوقت ما لها احد غير الله ثم انا معتمدة عليه و يعينها لاني اكبر خواتي... كنت ابي اوصل لها ان هالجمعية فاشلة وو .. بعد مدة شهرين تقريبا قدرت اقنعها انها تترك سالفة هالجمعية... لكن الجرح اللي بقلبي بعده ينزف .. كرهت نفسي و ما صرت أعد لها قيمة .. حسيت إني خنت اللي حولي ... و كنت أشوف بالمقابل كيف حالي يتردى يوم بعد يوم و بنت خالتي اللي قدي ما شاء الله عليها حياتها مستقرة و الآن بيت زوجها فرحانة و مستانسة ... و الله إني أتمنى لها الخير ... لكن اللي يجرحني أكثر أنها ما عادت تكلمني أبدا ... لمشكلة بسيطة حصلت بين امي و امها (خوات) .. كرهتني و قاطعتني و اخبرتني بالحرف الواحد ( حلمي نرجع مثل قبل ... انتي الحين حالك حال اي وحدة عادية ما تعنين لي شي !) ..
صارت مقاطعة بين امي و اهل ابوي بسبب المشاكل اللي صارت ... و خيانة ابوي لامي مع بناته!!!!! .. و امي ما عندها احد من اهلها يوقف معاها لا اخوان و لا اب .. لجأت الى جدي و جدتي ام و اب ابوي ... قام رموا عليها الكلام و دافعوا عن ولدهم و صاروا ضد امي و سبهوها ووو ... الى ان وصل الحال للمقاطعة..
و كأننا مقاطعين من الجهتين.. من اهل امي و ابوي .. احس و كاننا منبوذين ما احد يهتم لنا و لا شي!
في الفترة الاخيرة قبل سفري.. نقل قريب لي الى نفس المنطقة اللي ساكنين فيها ... اقسم بالله صار يشفق علينا لانه شاف حالنا ... يسال .. يطلعنا مع عياله مرات الله يجزاه كل خير يا رب...
حاليا أنا مغتربة للدراسة... فاقدة الثقة بنفسي و اتغربت لا حبا للدراسة و انما تهرب من واقعي المرير و هروبا من المشاكل ...
أقسم بالله أحيان كثيرة أحس بالضعف ... ما لي أحد بهالدنيا ... ما لي أحد أشكي له أفضفض له... حياتي معاناة .... ما أذكر شي حلو بحياتي مع أهلي أبدا..
أحس بضعف شديد ... و اللي بمثل حالتي سهل جدا جدا ينحرفون ... أحس إني ضعيفة محتاجة لحنان ..أحد يهتم لي .. يحسسني إن لي قيمة لي مكانة بهالدنيا .. يسأل عني يواسيني... أقسم بالله بكمل السنة و النص حاليا مغتربة و لا مرة أبوي اتصل بي يسال عني... امي انا اللي اتصل عليها مرات.. احتاج لاحد اتكلم معاه.. صرت انطوائية كثير .. و ما عندي صداقات هنا ابدا ... حتى صديقاتي ببلدي علاقتي معاهم علاقة صداقة عادية ... مو من النوع اللي افضفض لهم و اقول لهم عن مشاكلي .. اخاف اطيح من عينهم ياخذون فكرة غلط عني و يبتعدون عني! أخفي قصة الحرمان و ما يعلم فيها إلا الله سبحانه.....
آسفة جدا على الإطالة و والله إني ما قلت إلا نقطة من بحر!
شريط أحداث حياتي المؤلمة يمر علي و أنا بالغربة و أموت باليوم مليون مرة... أحس نفسي منبوذة ما أحد يحبني غير مرغوب بي ما احد يسال عني ما احد يتصل علي كل شي أستغفر الله .... و أنا مالي ذنب بهالدنيا... خصوصا لما أشوف صديقاتي من يكونون ... عيال خالاتي حسب و نسب و كل شي .. أخجل من نفسي قدامهم...
ربي يوفقكم.. و الله ما راح ألقى غيركم .. انصحوني, شوروا علي, اي شي .. بس أرجوكم لا تتركوني من غير دعوة بظهر الغيب عسى الله يتقبل منكم.
التعديل الأخير تم بواسطة غـاليــة ; 30-03-2008 الساعة 02:38 PM
السبب: تكبير الخط
30-03-2008, 09:18 AM
ضوابط المشاركة
العرض الشجري