تزوجت و تطلقت كل الأمر كأنه حلم !! - منتدى عالم الأسرة والمجتمع

16-05-2008, 03:55 PM

جبروت المشاعر

عضو جديد

تاريخ التسجيل: May 2008

المشاركات: 32

تزوجت و تطلقت كل الأمر كأنه حلم !!

هلا وغلا ومرااحب مليون بجميع الأعضاء

أخباركم ؟ عساااكم بخير يا رب وصحة وسلامة

بداية الموضوع أول مشاركة لي معكم

رغم أني متواجدة بمعرف ثاني بس ما يصير احط مواضيع فيه

دخلت بأسم جديد و فعلت الأشتراك و الحمدلله قدرت أتواصل معكم

حقيقة لا أخفي أن بداية دخولي الموقع من زمان أتابعكم بصمت

اليوم تمردت على صمتي و وحدتي و قررت أفضفض !!

نعم لا تستغربون يمكن تقولون انسانة فاضية بدون هدف

بس تبي تشغلنا وحنا موب ناقصين بس وربي يعلم الي بقلبي

اني أشوفكم مثل الأهل والله نصائحكم وقفاتكم مع بعض

فرحكم لفرح غيركم وحزنكم لحزن غيركم تلاحم الله يديمه عليكم

هالموضوع فضفضة استمرت في قلبي سنواااااااااات طويلة !!

من يوم كنت بأول ثانوي عمري 15 سنة الين يومنا هذا

الحمدلله على كل حال بداية الأمر ... اللهم لا أعتراض على حكمته

عمري الحين بيقارب العشرين سنة ان شاء الله

مرت على السالفة من تزوجت وتطلقت حوالي 6 سنوات تقريباا

الى يومكم هذا مو قادرة اتقبل الي صار !! أحسه حلم مر بسرعة

يوم كان عمري 15 سنة تحركت مشاعري الى ولد خالي و لد عمتي

انسان واحد يصير قريب لي من الجهتين من العائلة

يعني ابوه اخ امي .... امه اخت ابوي الله يخليهم الى بعض

مشاعري نبيلة وما فكرت أبدا بحركات خبث او تعارف من ورى الأهل

حبي نبيل وكتمته بقلبي ودعيت ربي اذا لي خير مع هالانسان

يجمعني فيه و الي عرف بالسالفة بس أقرب صديقاتي وهم اهلي

خواته و خواتي كنا في العائلة مع بعض على طول ننام ببيوت بعض

سفراتنا مع بعض و طلعاتنا و نطقم ملابس مع بعض يعني كنا أهل واحباب

يمكن هذا الي فتح عيني على هالانسان و خلاه يتربع عرش قلبي

الله سبحانه وتعالى حقق حلمي و تفاجأت ان هالانسان تقدم لي

عرفت انه ناوي يتقدم لي من خواته و الله يومها شكرت الله و حمدته

كنت فرحااااااااااااااانه كأني ملكت الدنيا والي فيها طاااااايرة من الوناااااااسة

وربي يشهد ما كلمته جوال اصلا وقتها ما كان عندي جوال

ولا دزيت له رسالة ولا كلام يعني حبي له طاهر بيني وبين قلبي

الله رزقني فيه فارس أحلامي وقتها صج كنت صغيرة

تفكيري كان غلط فعلا ما أنكر كان منحصر تفكيري بمفهوم الزواج بأشياء ثانية

تقدم خالي و عمتي و خبروا ابوي وامي و أذكر وقتها أمي عارضت

قالت صج ولد اخوي وحسبة ولدي بس انتي بنتي ما ابيج تخسرين دراستج

الحمدلله كنت وما زلت من المتفوقات تحصيلي العلمي عالي الحمدلله

وكنت طالبة مجتهدة فعلاا و كل وقتي كان بالدراسة امي وقتها تفكر

اني شلون بوفق بين الزواج و الدراسة كان خوفها على مستقبلي

خصوصا نظام التعليم ببلادي تراكمي يعني معدل كل كورس ينحسب

وكان طموحي أصير دكتورة وهذا التخصص لا يخفى عليكم يحتاج اجتهاد

هالانسان كان العكس لا أعتبره عيب لانه قدر ومكتوب في حقه

اللهم لا أعتراض كان هالانسان من يوم ولد بطيء الأستيعاب و الفهم

ما قدر يواصل بالمدرسة العادية وصل الين صف رابع ابتدائي و بعدها

كمل دراسة بس يعني مو دراسة مثلنا بمركز ذوي الاحتياجات الخاصة

كان شاطر بشغلة الميكانيكا و الحمدلله تخرج و كرموه من هالمركز

الي شدني وقتها طيبته بلا حدود كنت احسه انسان شفاف نقي

ضحكته سحرتني وقتها تفكيري ما راح الى أشياء أهم بشريك الحياة

كانت نظرتي للأمور ضيقة وما رضيت بنصح الأهل فعلااا ما أنكر

تغلب القلب على العقل عندي وصممت اوافق على هالانسان

بعدها خافوا أهلي ابتعد عن دراستي اذا رفضوا و وافقوا وياي

الحمدلله رغم الأختلافات الي صارت و تجهيزات الملكة و غيرهاا

تم عقد القران بشهر 4 و الى ليلة الملكة قالوا لي خلاص كل شي

انتهى وما فيه نصيب بسبب ظروف مادية ما تجمع المهر !!

قلت لهم خلاص ما أبي مهر الي عنده يحطه و الباقي عادي يتأجل

و الانسان كانت حالته لله يوم عرف السالفة ما بتصير راح بيتهم

ترى بيتنا وبيتهم قريب لبعض مسافة 4 دقائق يمكن بس

و سكر على حاله وقال اذا ما يصير الليلة شيء ما يصير بعدين

المهر كان جاهز بس وقتها كان عرس أخوه ونقصهم فلوس العزيمة

و أخذوا من المهر عشان يكمل عرس أخوه لانه عزيمة الرجال له و لاأخوه

المهم جدتي الله يرحمها تدخلت بالأمر و عدت الليلة على خير

كنت رغم قهري بالبداية ودموعي من سمعت الخبر الا بعدين فرحت

رحنا صالة الأعراس للنساء عشان عرس أخوه و بعدها قالوا لي

طلعي بتروحين مع زوجك قلت طيب و قتها كنت عارفة ما عنده فلوس

قلت الى عمتي تكفين عمه باقي عندي فلوس من الصالون عطيهم

زوجي على أساس انهم من عندج عشان نصور و نتعشى بمطعم

اذكر وقتها حبتني وبدوري حبيتها على راسها وعطته الفلوس

هذا صاار قبل اركب السيارة عشان لا احرجه قلت لها بروح وقت تعطينه

المهم ركبت السيارة و تفاجأت انه ما يبي يصور و راح كفتيريا سندويشات

و أخذ له ولي و قال لي بنروح البحر نأكل قلت بقلبي معليه عديها

يمكن هو متضايق من الربكة الي صارت و حمدت ربي على كل حال

وعلى كل حال أحب البحر وفرحت بروحتي صج ما يصلح بكشختي

أطلع مكان عام بس اي مكان معاه كنت مبسوطة و حاولت اهدأ

أعصابه لانه متوتر أكثر مني !! و ليلتها حتى ما شاف كشختي

لاني كنت متغطية لاني بمكان عام ما قدرت أكشف له

بنهاية الطلعة سحبت وردة طبيعية من التسريحة و عطيتها اياه

قلت له هذي بالتسريحة خلها ذكرى معك ضحك وقال لي

انا ما شفت شي ما حبيت احرجة واقول له منك ما رحنا نصور

لاني اعتمدت بالتصوير بشوف كل كشختي له بس الله كريم

__________________

16-05-2008, 03:56 PM

جبروت المشاعر

عضو جديد

تاريخ التسجيل: May 2008

المشاركات: 32

يتبع

رجعت صالة الأعراس و كل من تسأل وين رحتون و شنو أكلتون !!

فضول حريم تعرفون ما رديت كل من سأل قلت الحمدلله ما حبيت

أحد يعرف بأسراري الزوجية من وقتها قلت حياتي و الي فيها يخصنا بس

بعدها التهيت بالدراسة و كنت اروح بيت عمتي و ما القاه لانه شغله

دوامين صعب اشوفه و يجي تعبان يبي ينام فكنت ما اجلس معه كثير

اجهز الغرفة وابخرها له و اشوف شنو العشى اجهزه له الصراحة ما بكذب

كنت جاهله بأمور البيت كوني حكرت حالي بالدراسة وبس كنت ما أعرف

أغسل او أكوي أو حتى أطبخ زين اعرف اكنس و أغسل الأواني و أرتب

بس الشهادة لله أمي ربي يطول لي عمرها ما قصرت كنت اخذ ملابسه

و أجيبهم تغسلهم و تسوي لنا أكل اذا أطلب ادري وقتها كنت غلطانه

وكان لازم أعرف اني ببتدي حياة زوجية لازم أكون ربة بيت ممتازة بس

تفكيري بأشياء ثانية ما حطيت أهمية للأمر من يسوي هالأشياء و امي

الله يحفظها ساعدتني ما كانت تقول لي تعلمي و اشتغلي كانت تخليني

أعتمد عليها بكل شي وقتها كنت اتكالية و مرت الأيام و جاء موعد حفلة

الخطوبة ( ليلة الحفلة يعني نعزم الأهل و الأصدقاء بصالة الأعراس )

ترى مملكين ( تم عقد القران بشهر 4 ) و الحفلة كانت بشهر 6 بعد

ما خلصت اول ثانوي و بثاني كورس من أول ثانوي نزل معدلي شوي

بس الحمدلله لوقتها كان امتياز اذكر يوم عطيته الشهادة حتى ما طالعها

قال زين وبس !!! انجرحت من أسلوبه بس عديتها و لضروفه المالية

بعد الملكة كنت من يدور السيارة لطلعتنا من اخوي اقول له عطه السيارة

لانه ما كان عندنا سيارة و كنت ادم الي ابادر و أسال يمكن غلط مني

اني كأني قطيت عمري عليه وما ثقلت بس قلت هو مضغوط بالشغل

لازم اريحه و ما كنت اطلب منه مصروف ولا هو يسالني محتاجة او لا

و حتى تجهيزات حفلة الخطوبة أغلبها من الوالد ربي يطول بعمره

قال الولد ولدنا وانتي بنتنا والحال واحد لانه حالتنا احسن من حالة خالي

فالمساعدة زينة والفرحة فرحة اهل يعني ابوي أخذ الأمر من باب

المساعدة والفرحة و حتى وقت الحفلة المهر ما اندفع لي و اصلااا

نسيت سالفة المهر .. المهم انشغلت بتجهيزات الخطوبة و ليلة

الخطوبة جاء لي الصالون بسيارة ما فيها تكيف و تحملت و صبرت

تخيلوا بالغطاء و الحر و السيارة قديمة ومغبره لليوم اذكر موقف واضحك

مدري قهر او شنو وقتها بنفس المنطقة شفنا اخوي رايح يأخذ

الباقة عشان يجيبها الصالون بس طلعت وقتها جاء اخوي وقال له

روح اخذ سيارتي فيها تكييف و احسن لكم عن توقف هالسيارة عليكم

وقتها ما رضيت يوم شفته انحرج وقلت لأخوي لا عادي بنوصل ان شاء الله

حسيت اني ضحيت بشي بسيط بس المهم وقفت مع زوجي بالموقف هذا

مشينا وقفت علينا مرة وحدة و الحمدلله ما اخترب شي من كشختي

وصلنا التصوير وصورت الحمدلله عوضت عن الملكة و بعدها طلعوا مال

التصوير معنا الى الصالة عشان نكمل تصوير هناك وقتها فرحت ورقصت

و الوناااااااااااسة عوضتني كل الي حسيته بعد الملكة و هو فرح بعد

بس صاار شي ما توقعته اخوه الي كان عرسه بملكتنا دخل مع زوجته

الى الصالة بدون يخبر احد وتخيلوا لبسي بالخطوبة وكشختي واهلي

بدون غطاء كنا ما توقعتها منه ما ربونا أهلنا على هالشيء ابدااا

وقتها اغمى علي من الموقف و يوم صحيت على اصواتهم يتخانقون

و بكيت وخرب مكياجي بس بعد ما هدأنا قلت نواصل الحفلة بكل برود !!

ما حبيت أخرب فرحتي على انسان و انسانة حقودين !! عرسهم قبل

شهر وشوي تقريبا بالصالة نفسها ما خربت عليهم ليلتهم وقلت بدخل

مع زوجي بزفة لانها ملكتنا ليش تخرب علي !!!!! و كملت تصوير

و اكلت من الكيكة ونسيت الهم و يوم رجعنا البيت زوجي يقول لي

اسف وامسحيها بوجهي وابوي ما قصر في اخوي وانا بعد هزأته

انتي عرضي ما اقبل بالي صار من طيبتي هونت عليه وقلت خلاص

تراني نسيت وهذا اخوك مهما غلط لا تقطعه وتعاديه وان شاء الله

الأمور ترجع أحسن ما يكون و مسموح ما عليك انت بس المهم فرحنا

بعدها بأسبوعين فقط عرفت السعااادة في هالأسبوعين بس !!!!

بعدها تغير هالانسان وصار ما يطيق يجي البيت و لا اني اطيق

اروح بيتهم !! صار على قول خالي يجي قريب البيت و يلف عليه

وما يقدر يدخل ما كان عندي جوال بس هو طلع لي بطاقة

بس كنت احطها نادرا بجوال ابوي وما يقدر يتصل فيني

كأن شي يمنعنا نتصل او نروح نشوف بعض !! وقتها جدتي الله يرحمها

قالت الأمر مو طبيعي لا يمر عليج ولا يشوفج محتاجة شنو

وانتي ما تروحين له و كأني بنت مو متزوجة !! راحت الى شيخ يقرأ

قرآن و يعرف اذا مسويين سحر الى الناس او لا .. بصراحة الأمر

كنت لا اؤمن بالسحر انه يمكن يصير لي كوني ما آذيت اخد بعمري

ادري فيه شيء اسمه سحر بس استبعدت يصير لي

عرف من الي سوى السحر و وصى جدتي تخبرني اقرأ سورة البقرة

و أية الكرسي قبل انام على طول و مثل الشي زوجي

و لكن السحر قال ما ينفك سألوا الي سوته قالت له جدتي من هي ؟

قال وحدة من أهلكم قريبة جداا لكم و يوم واجهت جدتي زوجه اخو زوجي

الي دخلت بزوجها بزفة في حفلتي ما انكرت اصلاا كانوا شاكين فيها

من دخلت بعائلتنا ومسببة قلق مو طبيعي تتهاوش مع الكل

وابتعدت ولد خالي يوم تزوجته عنا وصار مو الي تعرفه ابدااا !!!

قالت سويت لهم عمل عشان يفترقون وقالت دفنته بكفن ميت

وربي من سمعت الي قالته ما تحملت فيه ناااااااس ما تخاااااف الله

وربي بكيييييييييييييييييييييت ندم وقهر و الم وحسرة على حالنا

اهلي طردوها وقالوا الى زوجها اذا ما تتركها مو ولدنا انت

ولانها الظاهر بعد مسوية له شيء راح معها وليومكم مقااااطع الكل

حاولت كثير وربي يشهد ومن شيخ الى شيخ و جربنا كل شي

ما قدرت اتحمل الفراق صعب تشوفين شيء ملك لج و بعيد ما توصلين له

تعذبت وحالتي النفسية والصحية تدهورت هو يتعذب واني اتعذب من الأمر

بعد تقريبا 7 شهور طلبت الطلاق عشان لا يتعذب ولا اني اتعذب

رحنا المحكمة وصاار الطلاق وطول هالفترة ما اشوفه بس اسمع اخبااره

من اهلي الي هم امه ( عمتي ) وبنات عمتي حالتي بعد الطلاق

يرثى لها عن جد تحطمت حسيت حالي ضااااااايعة بهالدنيا بدون هدف

بكيت وزعلت و انعزلت عن الناااااس كلها حتى اهلي .. صعب لقب مطلقة

خصوصا ان هالشيء موب بيدنا غصب عنا بس نظرة المجتمع ما ترحم

عيشت حالي بوهم الناس من يشوفوني يتكلمون بسالفتنا رغم ان أغلبهم

يعرفون السبب انعزلت كليااا من البيت للمدرسة ومن المدرسة للبيت

الين تخرجت و الحين اكمل دراسة .. تغيرت حياتي فقدت ضحكتي

صرت متشائمة وحسااااااااسة بدرجة مو طبيعية .. افسر الكلام على كيفي

صرت ابكي ليل ونهاار ومن يجي طاري عرس ابكي افرح لهم بس ابكي لحالي

صرت بقايا انسانة !! جسد مع الي حولي وروحي احسها طارت مني خلاص

تقدموا لي ناس بس الظاهر من يسمعون لقب مطلقة يكنسلون السالفة

حاولت اتغير بس للأسف ما قدرت الحين أحس نظرتي للدنيا أكبر و أحلى

أحس والله بتغيير كبييييييييييييير قمت أطلع و أروح أعراس و أضحك

أسولف و أساااافر مع الأهل و اتكلم بكل ثقة مع الناس أحس أسترديت

جزء فقدته من شخصيتي وهو ثقتي بنفسي قلت الدنيا ما تنتهي

و هذا قضاء وقدر ومكتوب لي الي صاار اللهم لا أعتراض على حكمته

الحمدلله على كل حااااال .. له الحمد وله الشكر

طولت عليكم بس هذا الموضوع فضفضة للي في قلبي عشان ارتاح

أشكر كل من يدخل ويدعي لي دعوة صادقة جزاكم الله خير

أختكم جبروت المشاعر

__________________

16-05-2008, 04:16 PM

تعبت اعطي

عضو نشيط جدا

تاريخ التسجيل: May 2008

المشاركات: 247

الله يرزقك بولد الحلال الي يسعدك ويهنيك ويكون همه بالدنيا طاعة ربه ثم رضاك

اخوك تعبت اعطي

16-05-2008, 04:16 PM

كل الغلا

كبار شخصيات المنتدى

تاريخ التسجيل: Jan 2004

المشاركات: 3,252

قصتك مؤثرة اختي الله يعوضك ..
هونيها و تهون وأنتي لسى صغيرة كملي دراستك وتوظفي واسترجعي ثقتك بنفسك..

16-05-2008, 04:17 PM

أم روزينة

عضو نشيط جدا

تاريخ التسجيل: Jun 2007

المشاركات: 528

ربنا يعوضك خير ويجزي من اذاكي بما فعلت

__________________
لا اله الا الله

16-05-2008, 04:18 PM

جبروت المشاعر

عضو جديد

تاريخ التسجيل: May 2008

المشاركات: 32

هلا والله ومرحباا خوي تعبت أعطي

يعطيك الله العافية وعساك عالقوة

مشكوور على دعواتك الطيبة جزاك الله خير ما قصرت

من طيب أصلك يا خوي ولك بالمثل الله يسعدك ان شاء الله

تواجدك و قرائتك فضفضتي أسعدتني كثيراااا الله يجبر بخاطرك

أختك جبروت المشاعر

__________________

16-05-2008, 04:20 PM

جبروت المشاعر

عضو جديد

تاريخ التسجيل: May 2008

المشاركات: 32

هلا وغلا ومراااحب أختي الغالية كل الغلا

يعطيج ربي ألف عافية وعساج عالقوة

تسلمين على ردج الطيب ما قصرتي من طيب أصلج

مشكووووورة على تشجعيك لي و أعطائي معنويات حلوة

ان شاء الله هذا الي مخططة أسويه بأذن الله وربي يوفق الجميع

جزاك الله خير وجعل وقفتك وياي بميزان حسناتك

أختج جبروت المشاعر

__________________

16-05-2008, 04:22 PM

جبروت المشاعر

عضو جديد

تاريخ التسجيل: May 2008

المشاركات: 32

هلا والله ومرحبتين أختي الغالية أم روزينه

يعطيج الله العافية وعسااج عالقوة

مشكوووورة على ردج أسعدني تواجدك كثيراا

الحمدلله على كل حال واذا لي حق ربي ما راح يضيعه

ما راح أدعي و أشتم عليها بس بقول حسبي الله ونعم الوكيل فيها

تسلمين من طيب أصلج وقفتج وياي والله يخلي لج روزينه

أختج جبروت المشاعر

__________________

16-05-2008, 05:32 PM

د. سطام

قلب المنتدى النابض

تاريخ التسجيل: Mar 2008

المشاركات: 964

لا بد تفكين السحر إذا متأكده ومو معناته خلاص تطلقتي من الأول أنتهى كل شئ

الله يفرج همك وييسر امرك

16-05-2008, 05:40 PM

#10

جبروت المشاعر

عضو جديد

تاريخ التسجيل: May 2008

المشاركات: 32

هلا و غلا ومراااحب خوي د. سطام

يعطيك الله العافية وعساك عالقوة يا رب

الله يشهد يوم شفت أسمك بالمتواجدين تفائلت خير

لاني أتابع مواضيع الأعضاء و أشوف ردك عليهم ما شاء الله عليك

تسلم على ردك بموضوعي ما قصرت من طيب أصلك والله

السحر متأكدة انها سوته لانها اعترفت لنا بكل شي للأسف

حاولت كثير ما رضخت للأمر من مرة و مرتين كثير شيوخ رحنا لهم

ما نفع وياي شيء !!! تراني انسانة ابي زوجي وما كنت ابي اتطلق

بس ما نفع شي ومو معقولة يظل الحال كما هو عليه بعيدين عن بعض

تعبت من الوضع وهو تعب كل مرة يتجدد الأمل في نفوسنا بفك السحر

و للأسف ما يصير شيء !!!! الحل كان طلاقي و الظاهر أن طليقي

قريب بيعرس الله يوفقه ويسعده ويبعد عن كل مكروه ان شاء الله

سعيت الى بعد طلاقي لحلول ما فادت معنا اي تجربة للأسف

و دعواتك الطيبة أسعدتني كثير يا خوي جزاك الله خير يا رب

أختك جبروت المشاعر

__________________

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه