أعجبني الموضوع فنقلته لكم عن إحدى الأخوات ...
AM7
==========================================
معليه على اللى بينكتب هنا
بس جد جد..أسوء شي بالدنيا...انك لما تلتفت تبي حد من اللى تعودت تلقاهم دوم بوقت ضيقك ماتشوفهم...وتكتشف ان الدنيا والظروف والايام..اخذتهم بعيد عنك...بعيد مره مره مره..وانت بوسط الطريق...ولحالك تماماً
الليله...همي زاد..وحزني امتلى...وما القى حد من اللى ابيهم موجودين..فقلت يالله...مالنا الا الكيو
<-------تموت بالصياح عند الناس
..
.
تعرفون..!
محد بالدنيا يحب ابوه كثري
ولا القى حد بالناس مثله ابد
وبنفس الوقت...ما افقد حد بدنيتي كثره :
شغله..خذه عني بعيد..وبعده عن حياتي تماماً..صار وجوده مجرد مكالمات كل يوم ببلد جديد...ومكالمات غالبا ما تخليني اكمل جمله وحده
اليوم كلمته..بعد غياب صوته لاسابيع عني...ما قدرت اقوله الا ..هلا يبه!!!..والباقى بس اسمع اصوات مختلطه واوامره واسامي شركات وناس وكلمات عربيه مختلطه بلغات ثانيه...واخرتها..ريما بابا سكري..بكلمج بعدين
وهالبعدين تتحول لاسابيع...وهالاسابيع تتحول لاميال تبعدني عن اغلى انسان بحياتي
وحتى لو حدث وكان بقطر...اكون محظوظه بالمره لو شفته بالصدفه مره لجل اطبع على خده قبله تختلط بدمع ما يشوفه...وانا اقوله باي بابا..وراي كلاس
صرت لما اروح مجمع...جد جد استغرب اذا شفت عيله كامله تكون مع بعض...خاصه اذا كان الابو هو اللى يشارك عياله باللى يسوونه
مره سالت بنت عمتي..الحين كل رجال يطلع مع هله؟؟؟؟
ما ردت على الا ببسمه..ما فهمت معناها..بس انا عارفه انها شفقه على فقدي لابوي..
صرت احس انه صار غريب...
من فتره صارت لي مشكله كبيره واجد واجد بيني وبين مدرس...كنت بنطرد بسبب ظلمه لي من الجامعه
وطلبوا من ابوي انه يحضر لميتنج ضروري..ووافق يجي له بساعه محدده
بهالساعه كنت جالسه بغرفه الاجتماعات مع كل المدرسيين وعيوني معلقه على الساعه اللى على الطوفه...اشوف عقاربها اللى تدور بسرعه...واتحاشي نظرات مدرسيني لي
بعد تاخير طويل...جا سكرتير ابوي...جلست اناظره بدهشه...وين ابوي؟؟
قالى..متأسف اوي يا ريم...بابا ارسلني بداله لانه بالمطار دلوئتي
اي مطار؟؟؟؟هو المفروض انه يكون هنيه الحين
لالا..فيه شغله ضروريه جاتوه وكان مستعجل عليها اوي..مش مشكله,,,هي البروبليم ايه!!
وش سويت...عادي...طلعت من القاعه
وانكسر شي بداخلى
..
.
عاده ما تكون صديقتي ساره موجوده بهالاوقات...لما احتاج اني ابكي بحضن حد...خاصه اني ما اتجرأ اكسر حدود بيني وبين امي..بس ساره تزوجت وراحت تكمل دراستها مع زوجها بامريكا ...
صحيح اني حقدت على هالانسان اللى خذ مني صديقتي..وفي شهور قصيره..ومن عجلته ما خلا البنت تسوي عرس مثل خلق الله ..بس انا عارفه انها سعيده
لجل هالشي لما اكلمها اتصنع المرح الكبير...وكل شي تمام التمام يا دبه..بس مشتاااقين لج
ما في داعي تضيق خلقها وهي بعيد
بس الحين لا ساره ولا حد مثل ساره
وانا حزني يخنقني لحالى
انا مدلله واجد..ما اعرف للحين اتعامل مع الدنيا لحالى..وهالشي غبي..ما اظن اني صغيره!
بس مدري ليش...صرت ما اعرف اتكلم مع حد...عن ضيقي ولا فرحي!!
قبل كنت ارسم...من شهور وقفت الرسم...وسكرت كل شي يوديني له
كنت القى شي يريحني بيه...بس الحين مدري...ما ارتاح بالرسم بالعكس..صار يزيد ضيقي
فوقفته
ولو اني احن له بعض الاحيان...بس تدرون وش سويت...كسرت فرشاتي المفضله..لجل اتذكر اني ما ارجع له
امس بعد حذفت من مسنجري ناس اعرفهم من سنين..وكانوا اكثر من الاصدقاء والاخوه لي
مجموعه اقدر اقول عنها...احسن ربع عرفتهم بحياتي
بس فضلت ابعدهم عني..حرام اضايقهم هم بعد..مب ناقصين والله!...خاصه ان انا من الناس اللى مفضوحين بالاحاسيس...يعني لو بكيت...يعرف اللى جدامي اني ابكي
فضيحه ادري ...بس وش اسوي!!
كانت الدنيا تضيق وانا احذف كل اسم...بعضهم لحين ما دري..وبعضهم استغرب خاصه اني ما بررت لهم سببه...بس مع الايام بيعرفون..وبيسامحوني
كل اللى اتمناه انهم يكونون بخير!
..
.
مدري ليش كل ام بالدنيا اهم شي عندها ان بنتها تتزوج!!!
ولو حدث انها رفضت كذا واحد يتقدم لها...تقلب عليها الدنيا...وتحسسها انها ارتكبت جريمه لا تغتفر..وانها بنت مغروره وشايفه حالها..وابوك خربج بدلاله لج!!
يعني وش فيها لو البنت فضلت مثلا انها تكمل جامعتها اول!
امي قالت لي جمله ضحكتني "دامج وصلتي العشرين فالثلاثين بتجيج بسرعه"...كخخخخخخخخخخ..والله الحلوه هالجمله ..
يعني اني بجلس عندها لمده طويله..
طيب..مب مشكله...لجل ما اخليج بروحج يمه
واكثر شي يقهرني..لما اقابل نسوان كبار واول دعوه تجيني منهم ..الله يستر عليج يا بنتي..ويرزقج الزوج الصالح...ويردون البقيه..آميييييييييييييييييييييين!!
اللى يسمع يقول...اللى جدامهم عجوز بالستين!!!
ليش الزواج هو اهم شي عندهم؟؟؟يعني البنت اللى ما تزوجت وش يصير بحياتها؟؟
معقوله تكون اخر الدنيا لها؟؟
ولا تقدر تكمل حياتها؟؟
طيب انا فاهمه...الزواج نص الدين وشي ضروري...وشر لا بد منه
بس انا اتكلم عن نظرتهم للي ما تزوجت
يالهي!!ليتني ولد!!
..
.
صرت ابي ابعد عن بلادي
اروح لابعد نقطه بالكون
بس لجل احس بالحنين اللى افتقدته من سنه..وارتاح من اشياء كثيره
بفتره صارت المطارات اوطاني
بس تعلمت كيف اتحكم بشوقي لكل شي
لبيتنا...للشارع الصغير..لذيك الشجره الطويله...للبحر الهادر دوم...للصحرا..للشمس..
لزوايه احبها...لوجيه هلي...لكل شي
صار كل شي ببلادي يسكن قلبي
وصرت اشيله فيه..وبهالسبب نسيت معني اني اعيش بوطن
وطن يحضني..لاني صرت انا اللى احضنه بداخلى
قبل مده قصيره...جاتني بعثه مغريه واجد لبلد اجنبي..اني اقدر اكمل فيه دراستي...خاصه بعد عداوه هالاستاذ الظاهره
لقيتها فرصه اثمن من الذهب..وكنت بالمره متحمسه لها
لولا ان امي وقفت ضدها..وللمره الثانيه توقف ضد رحيلي عن بلادي
تتوقعون امي تشك..اني اذا رحت ممكن ما ارجع
كل شي جايز
..
.
بس ترجع
بس ترجع
يمكن ترجع بسمتي
ريما...بذات حنين..وجنون!
01-06-2004, 03:49 PM
رسالة إلى الآباء ...
ضوابط المشاركة
العرض العادي
