بالنسبة للمخيم ..

أول مادخلت المخيم ارتحت .. دخلت وجلست في مكاني طبعا من اليمين كانت أخت زوجي

ومن اليسار كانت في حرمة راااااائعة أنبسطت معاها كتير وخفيفة دم .. أنبسطت معاها والغريب

إنو ولدها كمان جنب زوجي في مخيم الرجال .. الله يسعدهم يارب

جلست في المخيم وكنت ادعي ربي يارب ارزقني وزوجي الصحبة الصالحة .. وفعلا المجموعة اللي معانا

كانت قمة .. يعني بعض الحريم في المخيم أسمعهم يحكو ويسولفو ولا كأنهم في حج .. واللي تحكي

قصة طلاقها وبعدين قصة زواجها من التاني وسواليف وقهوة وتمر ..

لكن مجموعتنا الحمد لله رائعة .. يعني اللي تحضر المحاضرة تجي تحكي اللي ماحضرو .. زيي

واللي تقوم للصلاة تصحي الباقين .. وطبعا جلسنا أتكلمنا وأتعرفنا على بعض وكنا نذكر بعض بأهم الأمور في الحج

داخل المخيم كانو مسويين برامج يعني محاضرات يلقوها داعيتين بالتناوب .. وبعض الأحيان المحاضرات تكون من

عند الرجال ونسمعها .. وبصراحة محاضرات النساء كانت في خيمة غير الخيمة اللي أحنا جالسين فيها .. وماكنت

أحضرها أبدا .. لسبب واحد إنو الداعية كان صوتها عالي جدا وأغلب كلامها يغلب عليه الصريخ .. عشان كذا ما

حضرت وأكتفيت بمحاضرات الرجال فقط . كنا في داخل المخيم مخدومين من وإلى على قول وحدة تقول

حتى في النفاس ما أرتحت زي كدا .. يعني نقوم من النوم ونصلي والأكل يجي لحدنا .. وباقي الوقت

محاضرات أو نقرأ قران وندعي ونجلس مع بعض نتجاذب أطراف الحديث ..

ثاني يوم رحنا لعرفة وأنا كنت منتظره يوم عرفة وكاتبة دفتر معايا كلووو أدعية .. وأتفاجأ ألاقي زوجي كاتبلي

فيه وزايد أدعية من عندو .. أول مادخلنا عرفة وحدة عند الباب سجدت سجود الشكر لله تعالي

مخيم عرفة كان عبارة عن خيمتين كبيرة .. سحان الله جو إيماني

الشيخ قال لا تتركو ولا تنسو أحد من الدعاء اللي وصاكم واللي ماوصاكم .. ادعو ادعو لكل من تعرفوه من

أهليكم وأبنائكم وأصدقائكم ..

كل وحدة جلست لوحدها وتدعي وأسمع صوت البكاء من كل جهه حتى الشيخ كان يدعي ويبكي ..

الحمد لله أستغلينا الوقت كلو في الدعاء .. يارب أستجيب ..

بعدها طلعنا لمزدلفة .. وطولنا في البااااص ساعات .. لكن إحنا الحريم ماقصرنا جلسنا وقلبناها سواليف

وكيك وعصير .. جلسنا في الباص في الممر اللي بين الكراسي .. إلى أن وصلنا مزدلفة ..

نزلنا والناس كلها نايمة .. أول مرة أشوف المنظر .. التلفزيون غير .. صلينا العشاء .. ونزلنا في مكان سووه

للحريم بسيط وصغير .. بس كنا تعبانيين ومهلوكين .. قالو أطلعو وأجمعو الحصى .. والله ما طلعت ولا شي

أعتمدت على زوجي قلت أكيد راح يجيب لي .. ونمت .. ماصحيت إلا وهما قايمين وراكبين في الباص ..

ورايحين على منى عشان نرمي جمرة العقبة .. ودي كانت أول مرة أروح فيها للجمرات .. وجلست أمشي

أمشي وكل شوية أقول لزوجي متأكد إنو الطريق صح ؟؟ لأنو مافي مجال للغلط ما أتحمل أمشي أكتر من

كدا .. إليييين وصلنا المبنى حق الجمرات رمينا الجمرات وجيناراجعين .. فقلت لزوجي وقف خليني أرتاح

وأشرب موية .. وقفت شوية ورجعت كملت المشي .طبعا رجولي أتنفخت .. والجزمة الله يعزكم صارت

ضيقة .. وصرت أمشي بتثااااقل .. وزوجي يقولي أمشي بدون تمخطر .. بس والله مو تمخطر خلاص ماعاد

فيني حيل .. شفت اللوحة حقت المخيم ماصدقت وجيت داخلة قال لي زوجي ويين وييين هادا مدخل

الرجال .. رجعت وقلت له وديني على الحريم بسرعة .. وصلت ودخلت وعلى

طووول على الحمام أخذت دوش ونمت .. ولا كنت أدري إنو حنرمي الجمرات ثلاث أيام ورا بعض .. أتوقعت

إنو خلاص خلصنا الحج .. ولما عرفت ثاني يوم كلمت زوجي وقلت له صحيح الخبر دا ؟؟.. قال لي لا إشاعة



للحديث بقية

حج مبرور وسعي مشكور
تقبل الله منا ومنكم صالح الاعمال

تقرير جميل جدا ذكرني بحجي قبل سنوات عديييييييده
يارب يكتب لي حجه مع عيالي

من شده اندماجي مع الموضوع والردود تاخرت بموعد الدوا المضاد على بنتي

__________________
اللهم إني تصدقت بعِرضي على الناس وعفوت عمن ظلمني
وأسألك في ذلك بلوغ مراتب المحسنين
ربنا هب لنا من ازواجناوذرياتناقره اعين واجعلنا للمتقين اماما
رب اجعلني مقيم الصلاه ومن ذريتي
اللهم اني اسالك لذريتي صحبه الاخيار وتوكل الاطيار
اللهم الف بين قلوبهم وبلغني فيهم غايه املي ومناي بحولك وقوتك
اللهم اسعدني ببرهم في حياتي وبدعواتهم بعد مماتي

__________________

الصور يا شيخ كثر منها

كنت وما زلت أبحث عن فلم عن الحج وحتى الآن لم أجد

حتى أنني قد سألت في السفارة السعودية القريبة مني إن كان يوجد عندهم

أفلام عن الحج وكان الجواب لا

الصور مفيدة جداً وكما يقال صورة تعدل ألف كلمة

ههههههههه
ياحليلك ياأم لجين
من جد وافق شن طبقه
احسكم انتوا وابو لجين متوافقين ماشاء الله الله يحفظكم ويحرسكم
خفة دم واسلوب حلو في الكتابه وغير كذا ماقصر جاب لك كتب وقالك اقري بس ماسمعتي كلامه
وفي الأخير ضعتي في المسعى ورحتي الطواف
وحكاية الرمي ثلاث ايام اشاعه
مادري ايش كان موقفك لما عرفتي انو خبر صحيح !!!!!
كملي التقرير........

__________________

مبروووووووووووك الحج والله يتقبل منك ياام لجين انت وزوجك

وترى انا كنت جارتكم بالمخيم اللي جنبكم سبحان الله بمكان واحد ومادرينا عن بعض

فعلا كانت ايام روعه الله يكتبها لنا مرة ثانيه بس من جد ماحسيت بزحمة الحج اللي يقولوا عليها كل سنه الحمدلله تياسير من ربنا

شفتي كيف كان الجو روعه وكان يوم الجمعه ليلة السبت فيه هواء بارد وقوي سبحان الله ترحيب بالحجاج ياااااااااااااااااااالله روعه بمعنى الكلمة الله لايضيع تعبنا هدر ويتقبل مننا .

__________________

الله يسلمكم جميعا على المرور

أم جمانة .. سابرينا وعطر المدينة .. مشكورين حبيباتي


معليش أنا بأذكر كل شي على السريع وبالمختصر ..

المهم راح أكملكم .. بعد مارجعنا لمنى نمنى وصحينا وجلست مع اللي جنبي واللي جنب اللي جنبي

واللي جنب اللي جنب اللي جنبي .. زودتها مو .. جلست مع الحريم وقلت لهم أبغ أسألكم سؤال ..

كل وحدة تقول إيش الدعوة اللي ألحت عليها في يوم عرفة ؟؟ إذا كانت مو خاصة وممكن تتفشر على

المفتشر وإذا خاصة بلاش ..

طبعا بدأت أنا أول وحدة .. من الدعوات اللي ألحيت عليها طبعا أول شي الصحبة الصالحة .. لي ولزوجي

والله يا أخواتي الصحبة لها دور كبير .. والصديقات لبعضهم .. وأحيانا الصديقة تكون أكثر من الأخت

وبالفعل في المخيم أتعرفت على أخت المشرف وزوجته ..وعلى وحدة ماشاء الله أخلاااااق

المهم وألحيت كمان على إنو ربي يرزقني الولد الصالح .. أغلبكم يعرف إني ماعندي ولد .. ولما دعيت

وألحيت في يوم عرفة وصيت الحريم اللي حولي وقلت لهم ادعولي بالولد .. ووحدة ياعمري كبيرة في العمر

قالت لي ماراح أدعيلك بالولد بأدعيلك بالذرية الصالحة وبس .. فقلت لها لا ياخالة أبغ ولد ..

طبعا وأكيد ألحيت على إنو زوجي يتسمر معايا وما يتزوج غيري وأجلس على قلبو سنين مسننة

وبعدي وحدة جلست تقول دعواتها .. تقول دعت لولد صديقتها مسكين أنحرق بزيت على ما أتوقع

وحالته وحالة أمو سيئة .. ياقلبي حزنت عليه .. واللي تقول دعت لبتها عندها مرض غريب في المفاصل

والله اللي يشوف مصيبة غيره تهون مصايبة ..كل واحد ومشاكله يارب أشفي جميع مرضى المسلمين

وعافهم وأعف عنهم .. وأرحمهم ونقهم من الخطايا كما ينقى الثوب الأبيض من الدنس

بالنسبة لبناتي كنت أكلمهم مرة كل يومين بس .. صراحة ما حبيت أشغل نفسي بيهم .. أنا حطيتهم

عند أهلي وإن شاء الله متطمنة عليهم لكن أنا من النوع القلوق ولو كلمتهم راح أنشغل عليهم

وأول يوم من أيام التشريق حسيت بضيقة وخوف على بناتي فأرسلت لزوجي رسالة وقلت له البنات

وحشوني وطفشانة .. طلعني أتمشى شوية .. <<<<<لازم أطلع أي عذر عشان أتمشى

وشويه ألاقيه أرسل رسالة قال لي أطلعيلي أنا عند الباب ..

صراحة خفت قلت أكيد جي وجايب معاه السلاح الأبيض .

فأرسلت له رسالة قلت له إيش تبغى ؟

قال أطلعي

فقلت للي جنبي شوفي لو أتأخرت ربع ساعة بلغي المشرف ..ضحكت وقالت لا ما أتوقع يسويلك

شي .. لأنو حاج بيتحملك ..على مسؤوليتها



المهم طلعني وقال لي نفسي أعرف فين تبغي تتمشي؟ .. قلت له كدا أوقف عند الباب أشوف الحجاج

وبالفعل والله يابنات أستمتعت .. يعني الأفارقه طوال ولبسهم فيه نقوش غريبة .. وشفت وحدة مصريه

جات عند المخيم وقالت لي أبغ أدخل المخيم فقلت لها ما أتوقع يدخلوكي ممنوع .. قالت أصلو حر وبس أبغ

أخفف من ملابسي وأطلع .. وناديت لها المشرفة ودخلت وطلعت .. واليابانيين يجننو .. لابسين أبيض

وحاطين إيشارب فسفوري عشان ما يضيعو من بعض .. وماسكين حبل طويل عشان يكونو مع بعض

المهم شفت الناس وبعدها زوجي قال لي مو كأنو الشمس حرقتنا فقلت له خلاص يالله حأدخل

ورجعت للمخيم ..

طبعا رحنا أول يوم ورمينا الجمرات الثلاثة ..ووقفنا ندعي .. والمشرف ذكرنا بدعوتين مهمة جدا جزاه الله خير

الأولى قال ادعو الله إنها ما تكون اخر حجة لكم

والثانية قال اسألو الله القبول

وبالفعل دعيت .. وكانت معايا أوراق بس ما قدرت أطلعها من الزحمة والناس خفت تطيح مني

وأنشهر على مستوى الحجيج بالرغم إني كاتبه فيها رموز واستفهامات ونجوم عشان إذا طاحت

محد يقدر يقراها .. حتى زوجي يقول لي مسوية السحر دا لمين؟ طلاسم مو أدعية

المرة الألى من الجمرات عدت والحمد لله بدون حوادث ولا إصابات .. بس وصلت المخيم على طووول

على الثلاجة أخذت موية وجلست أشرب كأنو ماء الحياة .. مت من العطش ..

وجلست في مكاني وأحس كل عظامي مكسرة ..

للحديث بقية

آمين

أجل الموضوع وصل لدرجة انك تاكلي صوابعك وراه

صراحه هذه شهادة أعتز بها

الله يعطيكِ العافية على المرور

ولابأس على بنتكم الله يشفيها






















أكثر من كذا !

والنت أكيد مليان أفلام عن الحج أبحث وستجد بمشيئة الله تعالى

بصراااحة التقرير أكثر من رائع الصور جميلة جدا ..



وتقرير أم لجين من جد أروع من الرااااائع ... الله يحميها ويسعدها ...

اقرأ التقرير وأضحك الله يسعد قلبها ... ويحميها من كل شر .. ويحفظها لك ويجعلها قرة عينٍ لك ..

لسانك زي العسل يا أم لجين .. الله يحميكِ ..



متااابعين

__________________

ولو كنت متأخراً .. لظروفي ..


ماشاء الله ..تبارك الله ..

{ حج مقبول ؛ وسعي مشكور ؛ وذنب مغفور }

تقبل الله منا ومنكم صالح الأعمال ..



احترامي

__________________

(( سترى حروفي تسير في عقلك !! ))