السلام عليكم ورحمة الله وبركاته


بدون مقدمات .. عندي مشكله فقعت مرارتي نوعاً ما ..


السالفه وما فيها اني انسان متملك والحمد لله تملكت على انسانه طيبه وخلوقه وكويسه جداً وما صار لنا تقريبا شهرين ..


لكن المشكله بدت قبل فتره قريبه ..


البنت اشتريت لها جوال ورتبت امورها وقمت ازورها بين كل فتره وفتره تقريبا في الشهر مرتين الى ثلاث مرات لاني في مدينه وهي في مدينه .. والبنت قنوعه ..


لكن انا حاس ان فيه ناس يتدخلون في امورنا يعني مثلا أختها .. لاني اشتريت لها الجوال وحصل بيني وبينها سوء تفاهم بسيط بسبب انها طلبت مني اركب لها برنامج في جوالها يشغل مقاطع الصوت وتأخرت عليها بسبب بعدي عنها لكن قامت وكبرت الموضوع وارسلت لي رساله انك ما منت مهتم فيني وما تنفذ طلباتي ومن هالكلام وان اصلا الجوال مهوب اللي في الخاطر وان حتى الرقم سوا مو فاتوره وانا قد قلت لك اني ما احب السوا وابي فاتوره مع اني ما اقصر معها في الشحن ..


طبعاً انا رجال طيب مرره بعد ما ساءت الامور جلست يومين ما كلمتها بعدين دزيت لها رساله وقلت لها انتي انسانه عاقله ومن هالكلام وامورنا بنحلها تمام ..


دقيت عليها وحسيت انها كانت تنتظر مكالمتي وقلت لها دام الجوال مهوب اللي في الخاطر اغيره لك مع انه كويس جداً وخيرتها وش الجوال اللي تبيه وقالت لي لكن ما قالت لي في نفس المكالمه قالت ابفكر واعطيك خبر وهذا اللي شككني انه فيه تدخل خارجي .. المهم وطلعت لها رقم فاتوره باسمي وقلت اذا جيت بعطيك اياه ..



طبعاً قبل الجوال قدمت لها دبله هديه في اول يوم مثل ما انتم عارفين وبعد فتره لاحظت انها ما تلبسها وسألتها ليه ؟ قالت تبي الحقيقه ما اعجبتني .. !! قلت ابشري اغيرها لك ورحت لسوق الذهب وشريت لها اطلق دبله وبعد ما صورت لها الدبل وارسلت لها الصور وسايط واختارت وحده .. مع انها مكلفه وقيمتها تقريباً 1500 ريال بس انا ما فكرت دام هالشي بيرضيها ..


المهم وبعده حصل مشكلة الجوال اللي قلت لكم عنها ..


المهم قبل كم يوم جلست معها .. وفتحت معها باب النقاش ..


قلت لها انتي تبين حياتنا تكون امور عاديه جوال وما جوال وخرابيط والا تبينها حب وقلوب طيبه .. طبعاً تكلمت معها في كل نقطه وكنت جدي بزعل نوعا ما بس ما كنت قاسي علشان ما اسوي مشكله ..


البنت من اول ما جلست لين ما طلعت وهي ساكته ... اقول لها تكلمي ناقشيني اذا انا على خطا .. طبعا هي ما قالت شي لانها عارفه ان معي حق ولانها طيبه وكويسه بس الاحظ ان اختها تتدخل الله يصلحها .. حتى ان مالها حجه علي .. طبعا حتى اسلوب الوداع مو مثل كل مره ولا طولت معها كالعاده ويوم جيت ابطلع حسيت انها حست انها غلطانه حتى ترجتني ما اطلع وان ما ودها اطلع من عندها وانا متضايق بس انا قلت ما عليك مني وضيقتي ما تهم ومشيت وحسيت ان ودها تبكي واتوقع انها بكت بعد ما مشيت ..



وخلال اللقاء قلت لها اني اكتشفت انك تشوفين الهديه بقيمتها لا بمعناها واكتشفت ان اي شي اجيبه لك ما يعجبك ولازم اغيره لك بعد فتره .. حتى قبل يومين نزلت السوق وحاولت اشتري لك شي بس اخاف يطلع مهوب اللي في الخاطر مثل الجوال وغيره مع انها كانت هدايا .. وهي قد اهدت علي عطر وقلت لها تخيلي اني بعد ما طلعت من عندك قلت لك ان العطر اللي اهديتيني مهوب اللي في الخاطر .. وش راح يكون موقفك ؟ المهم سكتت وشفت في عيونها دموع لكن مسكت نفسها وما بكت ..



المهم وش رايكم انا احس ان اختها تتدخل بكل كبيره وصغيره مع انه في الغربيه وهي في الشرقيه لكن التلفونات موجوده .. واعرف ان اختها راعية هالسواليف حتى اني استعجلت وحددت موعد الزواج مع ابوها وانه يكون بدري شوي ..


المهم انا ابي ابعد اي تدخل خارجي مع اني حذرتها لكن هي طيبه مرره واكيد بتتدخل اختها وتغير البنت علي مع اني ما اقصر معها في شي .. ووش رايكم هل اقطع عنها الهدايا علشان تحس ؟ وهل اقلل من المكالمات لاني حسيت اني مسرف شوي ؟ يعني هل اثقل بزياده .. ؟ وهل تصرفي كان معها كويس في الجوال ؟ لاني توقعت يكون اختبار هل انا بخيل او لا .. ؟


انتظر ردودكم الله يخليكم والله اني في حيره ولا ودي اظلم نفسي والا اظلمها معي وخصوصا ان الظروف الماديه مهيب ذيك الظروف لكن تمشي الحال ..


بارك الله فيكم جميعاً ....


الاشراف : عذراً تم تغيير العنوان ليناسب المضمون , بالتوفيق

حلو انك صارحتها بكل اللي في خاطرك
كمل النصارحة باحساسك بالتدخل
لان هذ ابدا ليس في صالحكما عالج الامر من البداية
لان بكرة تتزوجون وراح تكون الحياة عذاااااااااااااااب بهذي الحالة
والافضل يكون في الهاتف
لان اغلب البنات في هذي الفترة يستحون من المواجهة
وفقكما الله

الله يخليك يا ام داليا


لكن انا حسيت ان المواجهه افضل لاني قلت لها الظاهر ان فيه احد يتدخل بيننا وقالت لا يمكن ومن هالكلام ..


لكن انا حسيت لان بعض الكلام في المكالمه اللي بعدها احسه مهوب لها لاني اعرف اسلوبها واعرف طريقتها بس لما واجهتها وكلمتها في هالشي ما قدرت تتكلم وتبكلمت وحسيت ان هالشي قربها مني اكثر ..


لكن انا حاس اني عاجز اني اعرف ان فيه احد متدخل واذا اكتشفت ان فيه احد متدخل برايك شلون اعالج الامر ..

مشكلة والله !

.

.

__________________

اخي الكريم تدخل اخت زوجه المستقبل ان شاء الله مشكله كبيره وخاصه ان كانت تسمع لها وتاخذ
برايها ..ماعلينا ..اخي

يجب ان تقنع زوجتك بعدم جدوى تدخل اختها في حياتكما دون ان يصل ذلك
لمرحله التوبيخ لها او الاقلال من شخصيتها فهي اختها لن ترضى ان ياتي من يقلل
من شائنها وخاصه اذا كانا في مرحله عمريه قريبه من بعض ..وعليك بان تمدح
تلك الاخت وتجلل من شائنها حتى يصلها ثنائك عليها فتكف عن التدخل في
حياتكما .. مع محاوله ان تثير موضوع معين وتقول لها ان هذا راي
اخي -ان كان لك اخ -فان رايتها قد امتعضت من راي اخيك ولتدخلاته
فقل كيف ترضين ان تتدخل اختك في حياتنا ولا ترضين ان يتدخل اخي فيها ولكن باسلوب راقي

هذا ما وسعني كتابته ..في هذا الوقت المتاخر من الليل ..والله من وراء القصد


..

الان هذي اختهااا اكبر منهااا والامتزووجة
يعني عندها خبرة مع الرجال والابس
هو تدخل لمجررد التدخل واللقافة
صرااحة احسن شي الان انك عجلت بالزوواج
واضمنللك النوعية هذي ماتووقف حتى لو تزوجتهااا
بتظل تززززن على اختهاااا الى ان تغيررها
اهم شي انك تحذر زوجتك منها مستقبلااا اذا تأكدت فعلااا
انها تتدخل فيها واذا مو هي البنت كل شوية برأي
يعني تأكد اول شي وبعدين حل الموضوع

يعني انت جبت هدية المفروووض ماتغيررها مدام انك عارف انة
اختها الي غيرت راايها لازم تعلمهاا انة هذي
هدية ومن الادب ماتردها ولاتقوول مو الي نفسي فيهااا
قلها بكررة اذا صرتي في بيتي ابشرررررري بالي يرضيك
لكن الان هذي عجبتني وتمنيتها لك
وبس ولاتغيررررررها ولاهم يحزنون

بس تصررفك حلوو وحكيم جدااااااا
والله يهديها ويخليها للك

مشكله والله .. هلا فيك والصراحه انها مشاكل مو مشكله الله يسعدك .. تواجدك وحده أسعدني ..





::






أخوي بانوراما يعطيك العافيه على مشاركتك .. والحقيقه انا واثق انها هي اللي تدبر امورها لكن أبغى اتيقن من ان اختها اللي تتدخل ..





::







أختي دايموند 22 هلا وغلا فيك .. هي أختها الكبيره وتوها متزوجه ما صار لها سنه والمشكله أخونا في الله زوجها حاط لها خدمة جود على التلفون الثابت وتكلم أختها على تلفون بيتهم وتجلس معها بالساعات وأنا عجلت بالزواج علشان خايف اذا طولنا تصير مشاكل وانا واثق اذا صارت معي في بيت واحد اني راح احل هالمشكله ولا راح تقدر تتدخل أختها وراح اكون على علم بكل شي يصير .. وانا بس ابي طريقه ذكيه كيف اخليها تعرف اني داري بتدخل أختها وكيف أعالج الأمر ..

وبالنسبه لكلامك بخصوص الهديه كويس جداً .. بارك الله في الصلب الذي انبتك والبطن الذي حملك ..









وفقكم الله جميعاً

الله يوفقك بزواجك ويجمع بينك وبن زوجتك على خير بإذن الله


من رأي يا أخي انك تقعد معاها جلسه هاديه وتقولها بصراحة انك ما تبغا احد يدخل بينكم .. أيا كان

وأي شي بينكم يظل بينكم .. وان المفروض ما في احد يقدر يأثر على علاقتكم ..


وهي رح تفهم انت ايش تقصد



انا زوجي قالي من هالكلام بعد الملكة .. وانا طبيعتي ما أدخل احد بينا من الأساس

بس أختي الله يهديها ما كانت مخليتني بحالي .. ووقفتها عند حدها بكل أدب .. بعد كلام زوجي



والحمدلله صارلنا شهرين ونص من زفافنا .. و لا عاد تقدر تدخل بأي شي .. رغم محاولاتها اليائسة



الأفضل انك تكلمها وتقنعها بدون ما تقولها اختك تدخل بينا

هي رح تفهم ومن نفسها ما رح تعطي اختها فرصه انها تدخل بينكم بعد كذا


بإذن الله



الله يوفقكم

__________________

السلام عليكم اخوي الغالي

اسأل الله ان ييسر امرك وان يرزقك حياه سعيده

بإختصار اخي العزيز .... يجب ان تضع حدا لهذا التدخل ... المطلوب الان التأكد وفي حاله التأكد تستطيع بكل بساطه ان تقول لزوجتك ...

زوجتي العزيزة ... حياتنا مركب انا القائد فيها وانتي المستشاره ... ودائما ما يحتاج القائد لمستشاريه في كل اموره ... وطالما هناك تدخلات من غيرك ... فسأكون مضطر لإتخاذ القرارات لوحدي ... هل ترضيكي هذه الحياة ان تكوني مهمشه ... فأنا لا ارضاها ان تكون حياتي ولا ارضاها لكي ... ساعديني ان تكوني انتي المستشارة والرفيقه والصديقة والاخت والزوجه ... ساعديني ان تكوني سري ... ان نتحمل نتائج قراراتنا لوحدنا ... لانه لن يتحمل نتائج هذا التدخل غيرنا فقط من حلوها ومرها


دمت بود

المفروض الهدية مافيها نقاش تكفي انها هدية

وتدخل اختها اكبر خطأ وقد يهدم بنان حياتكم لذالك نبهاها ان اختها لها مكانتها بس بدون تدخل واسالها هل اختها تسمح لها بالتدخل في شوؤنها؟

ابد حياتك على التفاهم وحاول استخدام لغة التجاهل معها

وفقك الله وجمع بينكما على خير

__________________
اللَّهُمَّ إِنِّي أَسْأَلُكَ الثَّبَاتَ فِي الأَمْرِ وَأَسْأَلُكَ شُكْرَ نِعْمَتِكَ، وَحُسْنَ عِبَادَتِكَ، وَأَسْأَلُكَ قَلْباً سَلِيماً وَلِسَاناً صَادِقاً