السلام عليكم ورحمة الله وبركاته

بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين

أبتليت بزوج مدمن على الحشيش والكبتاجون وراح أتكلم بالعامي أسهل لي

أنا متزوجة من 6 سنين وعندي بنتين زوجي إنسان طيب ويدور سعادتي ولا يحب ينقصني شي بس مع المصيبة الجديدة تغير

لكن فيه عيب واحد هو الحشيش والكبتاجون..... طبعا أنا شفت في بداية زواجي قطعة صغيرة بنية ريحتها مرة منفرة وسألته وش هذا؟ قال هذا دواء للبواسير...

وصدقت كلامة لأني من بيت والحمدلله لا أب ولا أخوان يدخنون... فمشيت علي الكذبة... بس القطعة هاذي صرت أشوفها أكثر من مرة... ومرت السنين وأنا مثل الأطرش في الزفة رغم إني كنت أقول له ريحة دخانك المرة ذي غير كل مرة يعني كنت أميز ريحة الحشيش بس ماني عارفة إيش فيقول لا بس غيرت النوع...

طبعا زوجي يكون تمام بس أيام يصير إنسااااااااااان ثاني ويتكلم كلام ماينقال ويمد يديه علي يعني يصير إنسان هستيري وتقريبا يجلس إسبوع وهو على الحال هذا.. وبعدها يرجع طبيعي

كنت دائما ألاحظ إنه شفايفه متشققة وعيونة دائما حمراء رغم ساعات يكون شبعان نوم.. وساعات يجلس شهر كامل ماينام إلا 3 أو 4 ساعات بس

بس ماحطيت في بالي المخدرات أو ماكنت بأحط في بالي.. بس في حملي الثاني وإللي خلاني أبحث وأتعمق إنه لقيت عنده حبوب بيضاء وقمت فتحت النت وسويت بحث صور للحبوب المخدرة وكانت المصيبة إنها طلعت من الكبتاجون قمت سويت بحث ثاني للحشيش ياويلي طلع نفس إللي عنده وأنا 5 سنين في غفلة وسذاجة... يعني الهواء إللي استنشقه أنا وبنتي فيه حشيش يعني لو حللوا دمي ممكن يلقون حشيش وصرت أدور بحوث ولقيت كل الصفات الغريبة بزوجي لأنه مدمن حشيش وكبتاجون....

ياربي لمن أشكي وش أسوي كلمت صديقتي قالت لازم تقولين لأهله خفت على أبوه مريض بالسكر يفطس وإلا شي وأكون أنا السبب قلت بأكلم أخته قريبة مني حيل تقول لأمها قلت لها قالت والله كنت شاكة لأني شفت مرة عنده زي كذا قالت لأمها وأمها قالت لأبوها طبعا الأب جاء وكلم زوجي وقال أنا شميت ريحة دخان غريبة ماهي دخان عادي ريحة حشيش قام زوجي كالعادة يحلف ويقول أنا مجنون استخدم شي مثل كذا أنا أب وعندي بنت وبتجيني البنت الثانية استحالة أسوي مثل كذا(والله نصااااااااب) أبوه صدق الكلام وأمه بعد.. وقالت أمه لي يمكن إنك غلطانة يمكن وأنا أحلف لها وأقول مصورته بالجوال الحبوب والحشيش قالت خلاص يابنتي ادعي لزوجك وحافظي على بيتك يعني بالآخر طلع اللوم علي ولدهم يمكن أتخيل يااااااااااالله أتخيل شي مثل كذا ... وطبعا أي أم و أب مايبغون يصدقون مثل الكلام هذا

قلت مافي إلا أواجهه وطبعا واجهته وبكل وقاحة وبرود قال لي ايه استخدم عشان اركز في الشغل وعشانك مقصرة معاي في حقي...

طيب إنت تستخدمها قبل الزواج كيف أكون أنا السبب.....

قال اتبلاء من الله وبأحاول اتركه وترى هذا سر ماحد يعلم فيه إلا الله وإنتي.... صدقته كالعادة وكنت على وشك ولادة وطلبت منه إنه يبطلها وتوقعت إني إذا رجعت بألقى تغير رجعت ولقيت نص حبة كبتاجون ورميتها وقطعة حشيش بس خفت أرميها وينتبهه ...

إلا الطامة الكبرى جاء صديق الشر عنده وكانوا بيطلعون بس صديقة قال لا لازم أنزل في بيتك أول شكيت بالموضوع وطلب مقص كبير وعرفت ليه قلت مافي إلا صغير قال وهو معصب لا \ابغى كبير قلت ليه قال بأقص شعري... وشوي طلعوا رحت المجلس ومسكت المقص ومسحته بالمنديل لقيت آثار حشيش رحت دولابه وفتحته إلا الريحة فايحة طلعت الكرسي وشفت الرف فوق ولقيت قطعة طويلة تقريبا 10 سم وعرضها 3 سم حسيت بأأأأأأااالم قلت يعني ماخاف على بناته الثنتين وين إللي بيبطل وهو عنده مثل الكمية هاذي؟؟ طبعا يوم رجع قلت له إني لقيت آثار حشيش على المقص وإن صديق السوء هو إللي جايبه وإنه مو أنا الوحيدة إللي تدري عن الشي هذا قام ينكر وقال لا كنا نبغى نقص ورق(شوف الاستهتار كيف) يعني يكذب وهو عارف إنه متأكده منه طبعا ماقلت ‘إني لقيت القطعة خفت يقلب الليلة على رأسي بس قلت إني متأكدة إنك مابطلت وإن صديقك هو إللي جابه لك.... بس رغم ذلك أنكر..................... والله جدا محتارة والله لو يعرف أبوي وأمي مايخلوني في البيت دقيقة وحده

إللي يقهرني إنه يبرر لنفسه ويقول كل المدخنين يستخدمونه وإنه يأخذ كميات قليلة وتصرفاته طبيعية قلت له بس تمر أيام تصير هستيري قال بسببك إنتي لاني مقصرة عاطفيا معي.. شلون أقرب من إنسان مدمن

ياعالم اللوم على مين

هو يستخدمة من قبل الزواج؟ والله محتارة وش أسوي وكيف أخليه يتركه .. أتخيل بناتي يكتشفون الشي هذا إذا كبروا

المشكلة مسوي فيها حريص على صحتنا وما نأكل إي شي إلا يكون نظيف ولا يسبب أمراض طيب ليش مو مقتنع إنه قاعد يسوي الطامة الكبرى وإللي يقهرني إنه يدافع عن نفسه وعن الحشيش وكأنه شي عادي وأقول يسبب كذا وكذا وهو يقول كذب

وأنا مواجهتي معه دائما تكون خاسرة....صح تذكرت قبل سنة كان عنده حبوب نصها لونه أزرق والنص الثاني أبيض هي كبسولات وكان يجيب بس حبتين منها وإذا أخذ حبة يصير مرووووووووووووق ويجلس 3 أيام على الحال هذا وكان يقول إنها نفس طريقة الفياغرا يعني منشطة جنسيا بس صراحة أشك إنها من المخدرات بعد.... ياليت تقولون وش هي؟؟

وصراحة الوضع من بعد ولادتي الثانية صاااااااار لا يطاق كل يوم زعل وهواش.. والمشكلة كل مرة يقول إنتي إللي تدورين للنكادة...

طلبت منه إنه يدخل النت ويقرأ عن آثار الزفت إللي يأخذه بس رافض وقام يعايرني بأبوي لأنه متزوج 3 طيب بالحلال ويقول راعي حريم..

زوجي تغير عن أول بكثييييير صارت المشاكل يومية والمشكلة مايلاحظ وش أسوي في البيت يعني 6 سنين يقول ماسويتي ولا شي يعني لا تربية بنات ولا غسيل وطبخ واستقبال ضيوف كل هذا يقول ماتسوين شي...

لعب بعقله الزفت هذا وصار مايشوف شي ولا يسمع إلا رأيه وهو الصح والباقي غلططط

أدري طولت بالحكي بس لمين أقول واستشير؟؟؟؟؟؟

دعواتكم لي... ولزوجي

الله يعينك على هاالبلوى اللي بين يدينك ......

استغربت انك سمحتي له انه ياكل حبوب فياجرا !!!!

ادعي ان الله يهديه....... التجئي الى رب ارحم بعبادهـ

اعرضي عليه انه يتعالج في مصحة .....

اعانك الله ......

__________________
حققت حلمي ...ولازلت انثى طموحه ....

حبيبتي ما باليد حيلة....

اختي0000000 الله يفرج همك وهم كل زوجه واقعه بمصيبه مثل اللي انتي فيها00صعب جدا انك تطلعينه من ادمانه اغلب المدمنين يرجعون وبسرعه 00عيوبه بسيطه بالنسبه للي يستخدمه مقارنه بغيره من الرجال انا دخلت احد المنتديات لفيت نساء وضع ازواجهم مثل زوجك وعايشات بجحيم فضيع من ضرب وطلاق بدون وعي وعلاقات حريم 0ليته شاف برنامج 99بالقناه السعوديه الرياضيه الاسبوع الماضي 00والله تقطع قلبي على شبابنا 3شباب دخلوا مستشفى الامل مرتين وثلاث بدون فايده000مالك الاابوه ينصحه ويحاول علاجه لان اغلب هالنوعيات مايستجيب لزوجته00فرج الله همك0

قلت لأبوه.. بس أنكر وأبوه صدقه ومااستفدت شي

لاحول ولاقوة الابالله

الله يفرجها عليك ويصبرك ويهدي زوجك هذا البلا منتشر الله يعافينا وخصوصا الكبتاجون زي العللك في جيوب الشباب

اللهم آآآآآآآآآآآآآآآمين

كبتاقون وحشيش ومشروب

الله المستعان

صارت السمة الغالبة في مجالس رجالنا! هذا واحنا بلد منغلق كيف اجل لو عايشين بأوروبا ؟

لاحول ولا قوة إلا بالله العلي العظيم

اختي ما ادري شقولك.. مااقدر انصحك لأني انا بروحي انتظر الفرج من عند الله

عليك بالصبر والاستغفار والدعاء له ليهديه الله غصب عنه ان شاء الله

ربي يهديه ويصلحه ويصلح ازواجنا جميعا

__________________

الله يفرجها علينا وعليك....

مادري عزيزتي لكن كلامك ما يبشر بخير

ممكن تحاولين تقنعينه يتعالج

وإذا عنده أخ كبير عاقل ممكن تقولون له يتصرف معاه

وإذا ما صار ولا وده يتعالج وعاجبه وضعه

ممكن تآخذين بناتك وتآخذين حق حضانة من المحكمة بحكم انه غير أهل لذلك

وتجبين معك أدلة

ولو تقدرين تستشيرين أحد مختص ولا مركز استشارة يقولك اللي تسوين بالضبط

الله يعينك