فديتها اللي ودها تتعلم


شوفي انا قلتلك بالبداية اسهل طريقة تسوين فيها الرز لانك مبتدئة هو انك تسوينه مشخول

بالبداية اسلقي الدجاج مع البهارات لغاية ما يستوي ثم ارفعيه من الماء وبهريه وحطيه في الفرن للتحمير

الحين حطي الرز في نفس ماي الدجاج وخليه يغلي الين تكبر حبته لا تسكرين عليه وراقبيه الين يقارب على الاستواء (شيلي حبة رز واضغطي عليها ولما تحسينها صارت لينه وكبرت الحبة طفي على النار)

صفي الرز من الماي بالمشخال بالكامل وفي قدر آخر اكشني بصل وطماطم مبشورة مع بهاراتك اللي تتحبيها وحطي الرز فوقه وقلبيه بالشوكة بشكل خفيف وسكري على القدر فوق نار هااادية جدا (حطي حديدة تحت القدر) وخليه لمدة ربع ساعة الين يكمل استواء (نتيجة باذن الله مضمونه ما يطلع الرز مهروس ويطلع نثري ولذيذ)

قدميه بالصحن وحطي فوقه الدجاج المحمر وهذه خلصت الكبسة


بالنسبة للمعكرونه بالبشاميل

في طرق كثيرة جدا جدا.. لكن اسهلها هو انك تسلقي المعكرونه وتصفيها بماي وملح ونقة زيت

ثم في مقلاة تكشني البصل وممكن ثوم وبهارات مع اللحم المفرومه وتضيفي فوقها صلصة طماطم (في صلصات جاهزة حق المعكرونه من العلالي مثلا تنفع وتسهل لك العملية)

بالنسبة للبشاميل سهل جدا ولا أسهل منه

في قدر تحطين ملعقتين زبده أو سمنه مع ملعقتين طحين وتحركينه الين يصفر لون الطحين ثم تضيفي حليب وتحركيه الين يثقف (حوالي كوبين) وتحطيله ملح وشوية بهار وممكن تتفننين بالاضافات (اوريغانو مثلا أو حبق)

وبس ..

تحطين نصف كمية المعكرونه في البايركس وفوقها اللحمه بالصلصة وتغطين اللحمة بالنصف الثاني من المعكرونه ومن فوقهم البشاميل وشوية جبنه مبشورة (موزاريلا - جبن رومي - قشقوان ) اللي تحبي

وبالهنا والعافية

__________________