السلام عليكم و رحمة الله و بركاته

كيفكم يا حلوات ..؟؟؟
الشباب برة لو مافيش إضافة ( للعوائل فقط ) ..


مجرد قرأت موضوع هنا مرتبط بموضوع شاغل بالي و لقيت اراء مختلفة ..


عندي طفل و ما تمتعت بتربيته أبدا بسبب دراستي اللي من يوم جيت للغربة و أنا بأدرس
و في حياتي الزوجية - أنا و زوجي - متلخبطين بسبب انشغالي الفترة الأخيرة .. يعني 3 سنوات
الصراحة ، لا شفنا عيد فطر و لا حج و لا رمضان و لاشئ .. ظروف كثيرة مرت بنا و عدت بسلام و الحمد
لله .. يعني أنا أتحمل و زوجي يتحمل و كل واحد شايل التاني و الحمد لله ، و كنت أتمنى متى أخلص
و ألقى وقت لبيتي و زوجي و ولدي ، و علشان كذا ( سفرت الشغالة ) ..
مع إنه الكل يقولي ما تقدري تجلسي من غيرها .. خاصة أمي و أهلي و زوجي ..


المشكلة فين ؟؟؟؟؟


1 - قلت الحمد لله أخيرا ، بنتنفس شوي أنا و زوجي .. و تتنظم حياتنا لإن وجود الشغالة كان مزعجني
و كنت حاسة إني مقيدة في بيتي ، يعني مريحة جسديا لكن متعبة معنويا .. و ممكن دحين نتمشى
مرات أنا و زوجي زي العالم .. لإنه بجد مرت بنا فترات صعبة .. و قلت نجدد حياتنا و كذا .. خاصة إني
ماصرت أدلع زوجي مثل زمان هذا السنة و انضغطت مع واجباتي .. و زوجي يحب الدلع مرررررررة
و يغار من ولده ..


2 - لازم نجلس 3 - 4 سنوات هنا عشان الدكتوراة بإذن الله ، يعني بأخلص دراستي و ولدي عمره
بيصير 7 أو 8 سنوات .. فجلست أفكر مع نفسي ؟ يحتاج لأخ أو أخت .. خاصة إنه دحين يعتمد على
نفسه ، و ولدي يحب الأطفال .. و أحزن عليه لإنه مرة اجتماعي ماشاء الله و حبوب ..


3 - جامعتي و تخصصي ، يبغالها الصراحة مجهود جسدي و معنوي و كل شئ .. من قبل تعبت في
دراستي و ولدي معاي و هذا و الشغالة كانت شايلة عني الكثير .. و تخصصي يعتبر نادر .. و مستحيل
أأجل دراستي ، لإن بعثتي مرتبطة ببعضها و زوجي فرصته الوحيدة إنه يدرس و يخلص و يتحصل على
دورات و شهادات عشان يلقى وظيفة كويسة إذا رجعنا .. حاولت ألقى جامعة ( أي كلام ) بس مالقيت
للأسف و استخرت كثير و لقيت جامعة رتبتها عالية و مافيش غيرها .. بعد استخارة ..


4 - عندي 3 أشهر إجازة ، ثم الدراسة .. أول سنة دكتوراة يقولوا أسهل سنة ،، مجرد قراءة و بحث ..
فكنت أفكر أشيل اللولب و بقدرة ربنا ، أجيب طفل إذا ربي كتب.. فإذا خلصت الدكتوراة في المستقبل ..
ولدي يصير عمره 8 و الصغير 4 .. يسلوا بعضهم و يفهموا بعض ..


زوجي تارك لي الحرية ، بس هو برأيه ،، إني أأجل الحمل لحد ما أخلص دكتوراة ، يعني يتمنى ..
قالي و الله أفكر فيك ، عشان لا تتعبي و شفتي السنة هذه كيف ؟ و ماراح تكون عندك شغالة ..
و نحن في غربة ، خلصي كل شئ ،، و نرجع و بعدين جيبي طفل واحد إذا تبغي .. و مصاريف ووو إلخ
( مع العلم ، حتى ولدي زوجي مرات يمزح يقول أعطيه للشغالة ،، ما نبغاه و أنا متعلقة في ولدي )
و حتى ولدي قبل لا أحمل به قبل لا أجي هنا ، كان زوجي معارضني و يقول مو لازم ..


كل ما قابلت وحدة تحضر دكتوراة ، تقولي هلاك و لا تفكري تجيبي طفل .. راح تتعذبي معاه ..
و زميلاتي الإثنين حملوا أول سنة دكتوراة و عندهم طفل من قبل ، و خلوا الطفل الرضيع اللي جابوه
عند أهاليهم يتربى .. و أنا مستحيل أعمل مثلهم ، يكفي ولدي ما عشت معاه و انحرمت منه ..

و أمي و أخواتي ، يقولولي نعرفك ماتقدري تجلسي من غير شغالة .. و مع دراسة كمان و نونو ؟؟؟
مستحييييل .. مع إنه أمي تقولي جيبي نونو ،، عمر ولدك مناسب ..


و أنا أحس أنسب فترة هذه السنة ، لإنها أسهل سنة في الدراسة و كذا ..


إيش الحل ؟؟؟؟
- أتوكل على الله و أشيل اللولب .. و اللي ربي كاتبه يصير ..؟؟؟
- و لا .. أأجل الحمل كمان 3 - 4 سنوات ؟؟؟ و ولدي من جد أحسه وحييييد و يموت عالأطفال ..
ما يكفي إنه هنا ما يشوف أهل أمه و أبوه و محروم منهم ؟؟؟؟ : (

ملحوظة صغيرة: زوجي ما يحب التعب و لا يحب المسؤوليات و تعب الراس.. يعني كسول
زوجي مرات يقولي عشانك و مصلحتك ووو إلخ ، بعدين اكتشف عشان مصلحته ..
لا تزعل يا زوجي العزيز ..
و هو تزوج عشان يبغى حب و دلع و كذا ،، يعني مو من الرجال اللي همهم أطفال و كذا


أنا دراستي مستعدة أستغنى عنها إذا كانت مصلحة بيتي مقدمة عليه .. بس إذا وقفت دراستي
فلازم زوجي يوقف دراسته و ما يدرس و تضيع فرصته الوحيدة .. و ولدي بيتعلم هنا أحسن تعليم ..
و دراستي لو ما درستها دحين ، فلازم أدرسها في المستقبل فمرة وحدة نخلص أحسن و نرجع ..
لإنها مرتبطة بوظيفتي ، و وظيفتي معناها مستقبل أفضل لعيلتي بإذن الله ..

فلا أحد يقول وقفي دراستك و أرجعي ..
لازم أخد قرار هذه الفترة .. عشان أروح المستشفى و أزيل المانع ..