ما يندرى وين الخيرة فيه..
يمكن بنت الناس بترتاح من شكك ومراقبتك لها!! لا تقول ما اشك اذا انت مو شكاك ليه توديها كوفي وتقعد تحوس عندها ربع ساعه وبعد ما طلعت بربع ساعه رجعت تدقق وتشوف؟ ليه لما شفتها تتكلم مع حق الكاشير على قولتك واكيد بالمنطق انها كانت تطلب او تسأل عن المنيو وايش يقدمون قمت اخذتها وفتشت شنطتها؟؟!!! يعني تتوقع اي وحده تناظر او تكلم رجال معناتها ان عندها جوال ثاني وتكلم شباب؟؟ لا حول ولا قوة الا بالله
انا مصدومة مصدومة مو من صاحب الموضوع بل من الردود!! اللي قال طلقها واللي قال امنعها من السوق.. يعني الشارع مافيه رجال؟ المطعم مافيه رجال؟ المستشفى مافيه رجال؟ ولا من وجهة نظركم المفروض يحسبها بالبيت ويقفل عليها الباب؟؟؟ والادهى والامر وحده تقول اضربها !!!!!!!!!!!!!!!! الحين لما اناظر رجال بالسوق انضرب؟؟؟؟ ليه تفسرون القران على كيفكم؟ النظرة للرجل ما تعتبر فاحسة مبينه واسألي اللي تبين من شيوخ !!! لعلمك نص الحريم كذا انا بالسوق اناظر كل شي قدامي حرمه رجال طفل اي شي.. الله ما خلق العيون الا للنظر وانت تقول انها تبحلق وانا اقول يمكن عادة؟ يمكن من النووع اللي يفهي ويهوجس؟؟ يمكن تفكر؟؟ يمكن لافت نظرها شي؟؟ اتوقع اننا بشر وما يحق لك تحاسبها على نظراتها بهالشكل؟؟ وكل ما شفتها تناظر احد عصبت وتنرفزت وتحس انها المفروض كل ما لمحت رجال بالغلط على طول لازم تنزل عيونها للارض؟؟ لا اخوي ترا الحريم ما يسوون كذا وفي الدين النظره الاولى حلال وواضح من تصرفاتك انكك شكاك جدا فاكيد انك مبالغ بوصف نظرها!
وزوجتك المسكينه حلف وحلفت تبرير وبررت وحتى غطوة اللي محد يتحملها اشترت عشانك عشان تريحك لمن تطلع معاك تحطها عشان ما تراقب عيونها ونظرتها تعبت منك..
ياخي انت طلقتها وانتهى الموضوع لكن ابيك تتقبل مني هالنصحيه.. اذا بتعيش بهالشكل ولا حرمه بتسلك معاك.. لازم تخلي حسن النيه في بالك واعرف اللي تبي تبقق وتكلم بتسوي كذا من وراك مو و انت معاها بالسوق؟؟!!! لهالدرجة غبيه يعني؟؟
حركات المراقبه والملاحق والشك وتفتيش الشنطة واذا حطيتها بمكان ترجع تراقبها هذي تهدم بيوت والواضح انها هدمت بيتك.. وبالنسبه لاختي اقهرتني الدنيا وغيرها اللي يحبون يستدلون بالقران وبالسنه احب اقولهم الرسول صلى الله عليه وسلم قال من حلف له بالله فليصدق يعني المفروض لما حلفت له انها مو قصدها تناظر وهذي عادة ما تقصد فيها شي واحيانا تكون تهوجس وهي تناظر.. المفروض انك صدقها ونسيت الموضوع..
اخوي حالتك متقدمه شوي انك تمنع الانجاب وتوصل للطلاق مع زوجتك من موضوع ( المناظر ) اتوقع قبل زواجك الجاي تحتاج تراجع طبيب نفسي ولا تحسبني ابالغ اقسم لك بالله اعرف ناس كثير تزوجو اكثر من مرة وطلقو بسبب الشك وكلهم ما كانو يحسون انهم شكاكين واذا احد قالهم انتم شكاكين زعلو.. مابيك تنتهي نهايتهم وان شاء الله تقتنع وشف كم عضو وعضوة قالو لك انك شكاك حاول تفكر بكلامي شوي والله يوفقك بزوجة ترضيك وترضيها..
__________________
08-11-2010, 09:37 AM
ضوابط المشاركة
العرض الشجري