السلام عليكم و رحمة الله و بركاته
كيفكم حبيباتي
سامحموني قبل يومين دخلت و باقرا كم صفحة الا و عيوني دمعت و اشهق و ابكي و اابكي و ابكي
لا شعوريا
زي اللي من الفرحة شاف اهله و الدموع خانته
قفلت اللابتوب و رجعت تاني بعد فترة و نفس الشي صار معايا
انا ادخل كل فترة و التانية اطمن و اشوف اخباركم و لكن فترة الحج اهلي كانو عندي و لما يروحو من عندي فترة يومين ثلاثة انشغل باهل زوجي يعني مافي وقت راحة ابدا يغارو من بعض صارو
الشي هذا حلو خلاني انسى التفكير في الصداع و القرف اللي يعمله المنظم البروجليتون
لانه يعمل فيا بلاوي و الحمد لله هذي المرة ما صار معايا منه شي لاني ما اعطيته مجال يلعب فيا
شغلت نفسي بكل شي حواليني
و مشي الحال
لكن و بالرغم من ان اكلي قليل عادي يعني مافيه زيادة و الا اطلع عالميزان و انا حاسة اني منفوخة شوية و انصدم الاقي وزني زايد 5 كيلو
الدنيا اسودت في وجهي يا ساتر من فين جات
هذا و انا ما اقعد لما اهلي عندي اكككرف في البيت كرف
و لا تقولولي معمول انا ما احب المعمول و لا اسويه
رجعت كل يومين اوقف عالميزان اشوفه يعطي شكك بين ال5 و ال6 كيلو زيادة
شي عجيب !!!
قلت يلا فترة و تعدي كلها ان شاء الله 3 شهور بس راح احاول فيها اني ما اكل مرة غير الخضار و الفاكهة و ان شاء الله يمشي الحال
في شهر ذو القعدة من هذي السنة خلصت من عمري 30 سنة
ما فرقت معايا كثير و لا اخلي في بالي اني كبرت ولا شي بس استغفر الله احساس ان المرأة فرص حملها تقل و مخاطر حملها تزيد شي يضيق الخلق
قلت بس خلاص دحين انا طنشت حاجات كثير راحت و جات على هذي
نسيت الموضوع
وقبل يومين اخت زوجي جات و بكل جرأة فجرت الخبر اللي مخبينه كالعادة عليا اهل زوجي و قالت سلفتي حامل
و مو بس كذا
الا قالتلي و فلانة و فلانة و فلانة و فلانة
يعني شوفي ترا قلتلك لا تقولي خبو عليكي و تسيلنا افلام زي كل مرة
و لما قابلت كم وحده فيهم يوم الاربعاء اللي راح الا و اشوفهم يتفاجأو اني عرفت و برضهم يتحاشوني و يتحاشو الجلسة معايا
يا ربي
يعني فين اروح يا ناس
انا اللي فيا مكفينيني
كل الناس اهلي و اهله
يطالعولي بنطرات كلها شفقة خصوصا على جسمي
والله والله والله انا بنفسي مفجوعه من حالي
والله ما ادري انا اش فيا
بس كل ما شفت بيبي اسسسسسسسسسرح و افكر في الحمل
مو بكيفي والله بس ابكي دحين و انا اكتب الدموع شلالات
و انا لحالي زي الهبلة كارهة مرة هذا التصرف في عز الانشغالات دقايق بس يجيني هاجس الحمل عيني تدمع و مشكلتي ان عيوني و خشمي اول ما تدمع تصير طماطم و ملامحي تتغير على طول
اول ما يصير فيا كذا انقهر من نفسي مرة و اقول ايش الهبالة دي معقولة مو قادرة اتحكم في مشاعري
الظاهر اني مثلت على نفسي كثير و ضغطت على نفسي كثير لغاية ما صار عندي انفجار
و بس هوا يا غالياتي اللي معايا و الحمد لله مافيا شي يخوف لكن مشاعري مو قادرة اتحكم فيها صايرة مفلوتة عليا كم دمعة الكم يوم هذي مو قادرة امسكهم
شكرا لكل اللي سأل عني و اطمنو عليا والله يعطيكم العافية حبايبي ما تقصرو
هالة حبيبتي الله يكتب لك اللي فيه الخير مع البيبي و يارب تشوفيه و هو بصحة و عافية و يهنيكي فيه يارب
زوجة احمد الله يفرج كربك حبيبتي انتي طيوبة كثير و لكن لا تبيني لزوجك ان فيكي شي خليكي طبيعية و خصوصا انك لسة ما كملتي سنة زواج و يارب تحملي قريب
فلافل بالشطة
عظم الله اجرك في عمك و يا ستي لا تزعلي انك عرفتي ان في سبب اخسن من انك تضيعي وقتك و ما تعرفي شي و زي الضايعة
و ترا العملية اللي قالت لك عليها الدكتورة مررررررررررررررة سهلة و لا تاخذ اكثر من دقيقة و لا تحتاج بنج و لا شي و كأنها بتعمل لك فحص من تحت و لا تخوف
انا عملتها قبل رمضان و لكن ما صار نصيب و الحمد لله و ترا هيا مو من اول مرة تنجح ممكن من المرة الخامسة توصل
خليكي ريلاكس و لا تشيلي هم
زوجك خليه ياخذ قبل التلقيح ب كم شهر خلطة العسل مع خبوب اللقاح و طلع النخير و الحبة السودة
ممتااااااااااااازة و كثير جربوها
بس لازم على الريق و لازم يكثر موية معاها تكون باردة عشان لا تتعب معدته
و انتي عارفة ما شاء الله ذكرتي في مواضيعك كثير طرق تكثر الحيوانات المنوية
ربي يكتب لنا اجمعين الي فيه الخير و يبلغنا مرادنا في القريب العاجل و يعوض صبرنا خير و يقر عيوننا
والله احبكم
__________________
رب لا تذرني فردا و انت خير الوارثين
التعديل الأخير تم بواسطة dodi_dabdoobi ; 06-12-2010 الساعة 05:05 AM
05-12-2010, 05:24 PM
ضوابط المشاركة
العرض العادي
