السلام عليكم

اختي، لا تكدري نفسك، مشكلة زوجك في شي ثاني تماما، زوجك عنده مشكلة في التعبير عن مشاعره، يغضب بسرعة و لما يغضب يقول كلام غلط، و لما يقول كلام غلط يصير اسير مواقفه و ما يقدر يتراجع مع انه يبي يتراجع. الوصف الدقيق لحركته قبل السفر يوضح الكثير عن شخصيته.

أنتي شكلك انسانه رقيقه جدا و ما عندك تحكم في عواطفك، يعني تحاولي بسرعة تحلي المشكلة، لانك ما تبي الزعل يطول..... و من سرعة تصرفك (وحسن نيتك) تخربي الامور اكثر.

نصيحتي لك اختي انك تهدي من اعصابك و تتبعي اسلوب مختلف تماما عشان تفهمي زوجك الله يحفظه كيف يتعامل معك ........ لا تنسي ان ولدك على ما تربيه و زوجك على ما تعوديه .......... و حضرتك عودتي ابو العيال على اسلوب غلط في التعامل معك، و الحين لازم تعوديه على الاسلوب الصح......... بدون مواجهات.

ما ابا اكثر عليك الكلام ......... الله يوفقك.

كيف بدون مواجه ايش الطريقه الافضل في التعامل

المواجهة يعني لما حضرتك تجلسي مع ابو العيال و تتناقشي معه في سياق شنو الغلط و شنو الصح و كيف تبيه يعاملك، و هذي الطريقة ما رح تجيب لك نتيجة. الانسان يستجيب لردود الفعل، ما يستجيب للتعليمات.

أول شي، قومي بواجبك في البيت بدون اي اهمال، خليه يتعود ان كل شي يستوي من يدك يكون مريح له.

ثاني شي، لما يسوي شي يريحك كافئيه عليه بالكلام الحلو و بأنك تخدميه اكثر و باي طريقه ثانيه تشوفيه تسعده. بس لو سوى شي يزعلك، هنا تجي طريقتك في توصيل رساله واضحه له بدون ضجه و بدون كثر كلام.

1. واصلي القيام بواجباتك، بس بمستوى اقل، يعني اكتفي بالاساسيات فقط. هذا يعلمه انك انسانع يعتمد عليها دائما و تستحق الزوج يتخذ خطوات علشانها.

2. لا يكون عندك رد فعل عصبي، لا ترادديه في الكلام و لا تحاولي تصلحي الوضع مباشر. الامور لازم تاخذ وقتها عشان تستقر في النفس و العواطف و العقل.

3. خلي مظهرك يبين انك زعلانه بس بدون مبالغه.

4. اصبري ثم اصبري ثم اصبري .... هذي عملية خلق عادات جديده و تاخذ وقت.

5. لا تنتظري ان الشي اللي زعلك ينحل و يجي زوجك يتأسف لك، فيه امور كثيره صغيره ما تحتاج للاسف، عديها له، و بعد كم يوم رجعي طبيعي تدريجيا ..... بس .... بعد ما ترجع الامور لمجاريها، اختاري وقت يكون مناسب (مثلا في وقت ضحك) و ذكريه بالموقف اللي سواه باسلوب حلو .... و لا تنتظري منه ردة فعل .... واصلي حديثكم السابق. الهدف انك تخلقي انطباع في نفسيته فقط لا غير.

6. في الامور الكبيره، لا تتنازلي ابدا، خلي رسالتك تكون واضحة جدا ان الشغلات اللي من هالنوع ما رح تقبليها. و لا ترجعي طبيعي الا لما يعتذر لك.

7. ابدا لا تحطي لنفسك سقوف عاليه .... يعني لا تقولي له مثلا مستحيل اكلمك الا لما تعتذر .... أو شي من هالنوع ..... خلي جسورك مفتوحه للرجوع حسب الظروف.


نتائج الطريقه هذي مضمونه ميه ميه ..... و لكنها تحتاج وقت و صبر عشان تترسخ قواعد العلاقة الجديده.


بالتوفيق.

انا فكرت اذا رجع ما احكي معو الا بشرط يحجز موعد عند مصلح اجتماعي ويجلس معو ابي يحس ان هالمره الموضوع جدي بالنسبه لي او انو اقول بروح اجلس عند اهلي على بال ماتخلص الاختبارات
انا ولامرة جلست عند اهلي من اتزوجنا واخليه لوحدو في البيت


ايش رايكم
اخاف اندم

مرررررررره غلط اختي .......... انتي لحد الان ماشية صح، اللي واضح من ردك الاخير ان مشكلتك هي التسرع و انك ما ترسخي قواعد العلاقة اللي بينكم.

خلي الامور بينك و بينه و بــــــــس .... لا مصلح و لا اهلك و لا اهله. كل ما هناك ضبطي التوقيت في تصرفاتك معه مثل ما كتبت لك ,..... و خلي عندك صبر ....... و تأكدي اختي، لو كان كتلة حديد رح يتغير