أختي الغالية تالينا بارك الله فيك وجزاك الله خير أنا أول شئ مافهمت عليك يعني خيانته مو خيانة جسديه بمعنى إرتكاب الزنا وخيانته بالمغازله والمكالمات فقط مثل هاذا الزوج إذا زوجته تثق فيه إن
مكالماته للبنات ماراح تجره لأشياء كبيره وخطيره فما فيه غير إنها تصبر عليه وتدعي له بالهداية والصلاح وتحاول بقدر المستطاع تكون قريبة منه وتظهر اعجابها به وتطري عليه وتنصحه باللين لأن إحتمال ذولي البنات اللي يكلمونه يعطونه من هالمدح والإطراء والإعجاب والكلام الحلو إللي يرضي غروره وماعندها غير تصبر والزوج حتى لوكان صاحب مكالمات ومغازلات إذا كان مشبع جنسيا من زوجته ماراح يفكر بالحرام أبد بس يبقى نفسه في المكالمات العاطفيه أنت قولي لها لاتخلي زوجها متنفس من ناحية الفراش خليها تهلكه من هاذي الناحية حتى يعوف شئ إسمه
حريم وتخلي كل شئ عنده في نضوب مستمر يعني كل ما أمتلأ الكأس تفرغه ماتبقي فيه قطره واحده حينها أنا أضمن لها لويجيبون له أجمل نساء العالم ماراح يفكر في هاذي الأشياء نهائياوعليها أن تهتم فيه تراسله ولما تكلمه عن طريق الجوال تحاول تغير طريقة كلامها معاه
بحيث تخلي كل كلماتها غزل وشوق وإطراء وحب وأنا أشوف مادام إن زوجها ماوصل للخيانة الجسديه والحمدالله فإن شاء الله تعالى إنها قادرة علا إصلاحه وتستعين بالله وتدعي ربها إن يصلحه ويهديه ويرده لطريق الحق والصلاح
وحسبنا الله ونعم الوكيل في كل بنت تسعى ورى رجل متزو ج وتبغى تهدم بيت قائم وتشتت أسر وتضيع أطفال وتاكل أموال حرام لأن بعض البنات من هالنوعية أكثر أهدافهم ماديه بحته تبغاه يصرف عليها وتبغى هدايا من جوالات ومبالغ ماديه وبطاقات شحن وأطقم ذهب وساعات وملابس وحبيب تتفاخر فيه بين رفيقاتها بأنه مايرد لها طلب
وللأسف مايصرف رجل على بنت من هاذي الأشكال إلا الرجل الرخمه إللي كل همه بنت تعجب فيه وترقمه ومستعد يخلع عينه ويعطيها لها علشان يرضيها وماتروح تدور غيره
الله يكون بعون كل زوجه أبتليت بزوج من هاذي النوعيات والله يصبرها ويهدي زوجها ويرده لها ردا جميلا أهم شئ تنتبه لزوجها إنه مايدخل بالشئ الكبير من هاذا الباب لأن معظم النار من مستصغر الشرر خليها تهتم فيه بزياده وتنتبه له زين حتى لايتورط بشئ كبير وتحاول تفهمه بأنه هو رجل متزوج والرجل المتزوج يختلف عن الأعزب في كثير أشياء
لو قدارالله وفيه بنت من ذولي البنات غلطت مع أحد وجت حطتها براسه هو وقالت فلان سوى فيه كذا طبعا هي ماراح تثبت عليه شئ بالذات إن هناك اليوم تحاليل تظهر كل شئ
لكن سمعة الإنسان وكرامته وشرفه فوق كل شئ فلأولى الحفاظ عليها وإحتمال يتعرض للإبتزاز من أحد هالبنات إما بإرساله لهم صورته أو مراسلتهم بالرسائل أو عن طريق البريد الإلكتروني أو تسجيل صوته وبعدها تبدأ بمساومته وفضحه أمام الناس وتبلغ فيه الهيئة وبعدها هناك سيم وجيم وإحتمال تدعي عليه أي إدعاء باطل بعدهاكيف تصير سمعته بين الناس وصيته وهيبته ومن ثم من دق باب الناس دقو باب بيته ولاننسى دقه بدقه لوزدت لزاد السقا وهناك شريط لداعية إبراهيم أبو بشيت بعنوان دقه بدقه وفيه قصص وعبر لمثل هاذي النوعية من الرجال ياليت زوجته تشتري هالشريط و تهديه له وتتأكد بأنه أستمع له كاملا
والشريط مره حلو وكلام الشيخ وقصصه ليست من قديم الزمان ولكنها من حاضرنا قصص واقعية وصحيحه حدثوه أصاحبها بأنفسهم وبعضها حكاها له أناس ثقات أتمنى أنها تشتريه وتسمعه هي وزوجها أو تهديه له وتتأكد إنه إستمع له
حتى لوتروح معاه بالسياره مسافه علا خط طويل يتمشون بالسياره وبدون ماتاخذ عيالها علشان مايزعجوهم في السياره وبعد ماتتأكد إنهم أستو على الخط تحط الشريط بالمسجل وتشغله ويستمعون له وإن شاء الله تعالى إنه بيأثر في زوجها وبإذن الله ربنا يصلحه و يهديه .
أختي الحبيبه أطلت عليك وأتمنى أ كون أفدتك بشئ وإن شاء الله الإخوان والأخوات يفيدونك
أحسن وأ كثر مني لما عندهم من حلول طيبه جزاهم الله ألف خير .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم داليا ; 10-02-2011 الساعة 01:25 AM
السبب: حجم الخط
10-02-2011, 12:56 AM
ضوابط المشاركة
العرض الشجري