السلام عليكم ورحمة الله - بداية كنت ادور على موضوعي مالقيته , وتذكرت يوم دمجتوا موضوعي الثاني بالاول , قلت خل اشوف اشيك , وفعلا لقيته هنا.
كان ودي يبقى موضوع الانفصال موضوع مستقل بذاته لانه عدد الصفحات وكثرة الردود ادوشتني وكل ما اجي بدخل على موضوعي انسى وشهي اخر صفحة , لاني موبكثير تسمح لي الفرصة ادخل هنا,
والله اني استرق الاوقات سرقة عشان اقدر ادخل مشغووووووووووول لاراسي.
ماعلينا ماعلينا - قلت لكم بعطيكم التفاصيل.
سبب طلاقي موتسرع مني ولا سعيا لراحتي على حساب غيري لكن بعض المرات تنحد وتنحشر بزاوية ضيقة وتطر على تصرف معين.
بداية- اخو زوجتي اتصل علي اكثر من مرة ما أرد وبعض الاحيان ارد واعتذر من اللقاء وهكذا, اخر مرة قالي لو سمحت وطلبتك تكفى ابي اقابلك اليوم , بصراحة خجلت منه واعطيته موعد وتقابلنا بعد صلاة العصر عند مسجد اللقريب لم اهلي, قال ميخالف تركب معي؟
قلت له ماعندي مشكلة بس وين؟ قال بنوصل لمكان قريب قلت طيب وين ؟ قال اركب قلت له يبن الحلال انا عندك والمكان اللي تبيه انا بقابلك فيه بس ابي سيارتي معي !
قال ابيك ببيت اهلي,
قلت له زين امشي وانا وراك,
وصلنا البيت , قعدنا بالمجلس شوي الا زوجتي دخلت قالت مايجيبك الا الرجال
قالت قبل لاتتكلم وبما انه اخوي بيكون محايد انا ببدي بالكلام,
قلت تفضلي - قالت انت شخص موعادل !
قلت وشلون مو عادل؟ قالت اول شي انت ماتحب تستقبل في بيتي احد من اهلك او من اخوياك , وكانه ماعندك بيت غير بيتك الاول.
بصراحة تفاجئت من المنطق والاسلوب وكنت اجمع اجابة لموضوعها.
قلت لها اول شي انا ما حاط في بالي وين اقابل فلان او وين اقابل علان !
وانا اقولها الكلام هذا تذكرت انه كذا مرة كنت بعزم اخواني وعيال عمومتي ورفضت بحجة انه ماتقدر على عزايم كبيرة لانه ماعندها غير شغاله وحدة وانا كنسلت الموضوع وبعد فترة عزمتهم ببيتي الاول , ولا كنت أدري هي تدري بالعزايم اللي تصير ببيتي ولا لا,
ويوم قلت لها الكلام هذا قالت لا ياحبيبي هذا غير , العزايم غير عن واحد واثنين. مع العلم الواحد والاثنين اللي هي تتكلم عنهم يجوني في بيتها مو مسكر بيتي عنهم .
المهم دخلنا بنقاشات والاخو حب يغير شوي من الجو وجابو القهوة والشاي وقام اخوها يصب وجو اثنين من اخوانها وامها وتقريبا سكتنا.
ودخلنا بمواضيع ثانية وتناقشنا فيها بعدين قالت الشي الثاني اللي يضايقني وهذا ابسط شي ولا يقارن باللي يصير بيننا انك لما تكون عندي يدق فلان ولا علان ويخرب علي قعدتنا ويجينا . وانا أصلا مايمديني اتهنى فيك وانت عارف يوم هنا ويوم هناك مو كل يوم عندي عشان ما اتضايق!!!!!!!
ضحكت وقلت لها طيب مو توك تقولين اني ما استقبل احد ببيتك والحين تقولين انا استقبلهم ويخربون قعدتنا!!!
على طووووول التفت لأهلها قالت شفتوا هذا اللي انا أقصده, هو بس قاعد يتصيد لي الاخطاء,
وأصلا ماكان هذا موضوعي وهذا كله كان استدراج عشان ابين لكم شلون هو يتعامل معاي !!!!!
قلت لها بدال ما تستدرجين وتضيعين الوقت كان تكلمتي بموضوع ومشكله حصلت احسن من اللف والدوران.
وش سويت انا عشان اتصيد لك!!
وبعدين انا اللي اتصيد الاخطاء واقعد طول الليل وانا اطيب خاطرك بشي انا موغلطان فيه بس عشان مايضيق صدرك - صرت اتصيدلك الاخطاء.
لما أنعزم واكون بيومك مستحيل احضر اي عزيمة واعلمك بالشي هذا واقول لك كل شي ماله قيمة عندي مقابل شوفت عيونك- صرت اتصيدلك الاخطاء.
قلت لاخوها , شف انا ما صارحتكم بكل اللي يصير بيننا, ويمكنها تبلتني عندكم ,
( وقلت لهم كل اللي قلته لكم هنا).
وهي تقول مو صح هو يحرف السالفة عشان تكون لصالحة وكل ماقلت شي تقول مو صحيح,
اخر شي قلت هذا اللي عندي , بتصلحين من نفسك بيتي مفتوح لك , ماعندك استعداد ترا نفسي تتعذرك.
قالت اصلح من وشو !
لا تلبسني الغلط!
لا تكذب الكذبه وتصدقها!
قالت لي انا اللي اقولك : لو كنت صادق باللي قلته طلقني, ولو ماطلقتن ماعناتك انك تتبلاني!!!
( ياجماعة والله ودي أذبحها , لهادرجة تكذب عيني عينك!!)
قلت لها : لو كنت صادقة اطلبي الطلاق, ولو ماطلبتي فانتي تتبليني!
سكتت وقالت طلقني , بصراحة حسيت باللحظه هذي اني بقمة غلياني , استأذنت وطلعت.
وأنا أمشي أسمهعا تقول لهم شفتوا شلون يطلع نفسه , والله انه يتبلاني مدري وش قالبه علي وتصيح.
العشا ارسلت على رقمي القديم وتقول والله اني ابيك ولا اقدر على فراقك وغصبا علي شسوي اهلي كانوا ضدي ولا ودي يحسون اني الغلطانه فاظطريت امثل دور الضحية!
مارديت عليها
بعدها بيومين جاني أخوها بدون موعد وقبل لا يتكلم باي كلمة وريته رسالتها .
فك عيونه قال : مو انت ارسلت لها رسالة تقول لها انا ابيك ومستحي من اخوك ؟
(الظاهر انه انصدم- يمكنه جاي يقولي لو تبيها ترا هي تبيك ولا تشيل هم ومن هالكلام)
الله اعلم ولا ليش تبهبه يوم شاف رسالتها عندي !! وقالي على رسالتي المكذوبه؟
قلت له شف الرقم اللي عندها جايها من مين وحاطته باسمي
قلت له بصراحة بعد اللي صار ماعاد لي اي رغبة فيها . تحملتها فيما فيه الكفاية. لهنا وبس
اندق جوالي ولا هي على الخط واخوها معاي - قلت نعم قالت يافلان ممكن تعطيني شوي من وقتك والله اني ابيك وشاريتك لاخر لحظة قلت لها ماراح ارجع لك قدام اهلك وانا مكسور بالصورة!!
ولا راح أرجع لك وكأني انذليت لك. انتي عارفه وش سويتي الى هذي اللحظة.
وأنا اقولك انتي طالق . وسكرت الخط.
أخوها نزل راسه وتنهد تنهيده اوجعت قلبي بس الشكوى لله . ما أقدر اكثر من كذا.
قالي الله يوفقك والنعم فيك. ولو اني ماقلت لك عن رسالتك المكذوبة يمكن كان الوضع اختلف.
مدري وشلون طلعت من لساني, يمكن عشان اللقمه اللي بينك وبينها تنتهي.
وحقك , محد يقدر يعيش باطريقة هذي. لكن ثق انا تغلبني دموعها ولا ادري وش اللي بداخلها.
لذلك انا اجيك واحاول اصلح بينكم. مو عشان اضغط عليك او عشان مو مصدقك.
قلت له حصل خير ولا تشيل بخاطرك , ولا تنحرج منها , هي طبعها كذا متناقضة وتلف وتدور وانا عن نفسي عجزت اغيرها. يمكن الموقف هذا يغيرها وتبدي حياتها من جديد , وربي يهديها لنفسها ويرزقها اللي يسعدها وهي تعرف تقدره . وانتهينا
05-04-2011, 12:38 PM
ضوابط المشاركة
العرض المتطور