حياك أختي أم جابر ولو ياشيخه كيف ما فهمت لهجتك إلا فهمتها
زين ياحبني للهجتكم الزينه تطرب الآذان من جد شوفي ياحبيبتي أنا أتفق معاك بأن المرأه تحتاج المدح والثناء وسماع كلمات الحب والإطراء من زوجها بس أنا من طبعي ما أحب أسأله مثل هالسؤال و أحب إنه هو بنفسه يقولها لي بدون ما أسأله أو أطالبه بها والحمدالله زوجي مو إنسان جاف في مشاعره أو إنه مايعرف يعبر لي عن حبه بلعكس أنا متعوده إنه ينطقها من نفسه يقول لي بين فتره وأخرى يقول لي أحبك أحيانا يعبر بالكتابه عن حبه لي يكتب كلمات حلوه ومعبره ويحطها لي في أي مكان يعرف إني راح أمر عليه ولما يكون مداوم 24 ساعه يرسل لي رسايل على جوالي وأ كثرها أحبك أحبك ولما نرو ح نلفلف بالسياره أحسه من نفسه يمسك يدي ويقول ما تدرين وش كثر أحبك و حتى لما نطلع برى نتمشى بالبر ونقوم نمشي على رجولنا مع بعض ولما نتعب من المشي نجلس أشوفه يخط بالرمل أحبك وأعشقك و يكتب كلمات من الصعب نسيانها من ذاكرتي وهو يكتب بالرمل وأنا أمسح بالذات لو كانو جنبنا ناس يتمشون أخاف حنا نمشي
وهم يجون بعدنا يشوفون وش كتبنا لأن مره رحنا نمشي بالبر وجلسنا بين الرمل وجلس زوجي يكتب بالرمل أحبك وأموت فيك أعشقك ياحبي يا أم سلطان وكان جنبنا عائله متمشين بالبر مانعرفهم أثاري عيالهم مراقبينا وحنا جالسين نكتب على الرمل وقمنا مشينا ومامسحنا الكتابه إللي كتبنا ها حنا بس أقفينا ولاشفنا عيالهم إلا وهم واقفين في المكان إللي جلسنا فيه أنا وزوجي وقاموا يقرون إللي كتبناه وبصوت عالي قدام الناس إللي حوالينا وفيه بنت بينهم عمرها حول 12سنه جالسه تصيح على أمها من بعيد وتقول يايمه كاتبين أحبك وأموت فيك وأعشقك ياحبي يا أم سلطان يايمه قر يتها كلها وتصيح بأعلى صوتها ياربي وش ذي الفضيحه كنت حاسه بإحراج شديد من الناس إللي جالسين حوالينا وأقول لزوجي روح إلحق شوف الأطفال فضحونا قدام الناس وزوجي يضحك عليهم و يقول عادي مافيها شئ بزارين صغار وأنا
كان نفسي أمسكهم وأصلخهم صلخ حتى توخر عنهم اللقافه الزايده
بالرغم من هاذا الموقف إللي صار بس زوجي ما أتعض مازال على طبعه لوطلعنا مايترك هوايته المفضله .
ومثل ماقلت سابقا أنا ما أحب أسأله لأني أشوف تعابير حبه لي على وجهه وفي حركاته وتصرفاته معي وما أنكر أحيانا أسأله أسأله بمصطلح آخر غير هل تحبني مثلا أقول له وش أنا أعني بالنسبه لك يرد عليه أنتي كل شئ في حياتي مثلا لو رحت المستشفى وتنومت أنا أو واحد من عيالي تعبان و تنوم بالمستشفى لما يجي زياره لي يقول والله البيت دونك مايسوى وماعاد حسيت بالراحه فيه بغيابك وفعلا هاذا شئ ألمسه فيه لما يجي لي زياره بالمستشفى أحسه مرهق وتعبان والأكل يجيبه معاه من برى ونجلس ناكل مع بعض في المستشفى ويجيب معاه شاي وقهوه ونجلس نتقهوى و نسولف مع بعض حتى الزياره تخلص أحيانا الممرضات يطردونه طرد بالقوه وهو ماوده يرو ح ومايرتاح إلا لما نطلع من المستشفى المهم يحبيبتي أنا طولت عليك ومشكوره مره أخرى على موضوعك الحلو يا أحلا أم جابر بالجزائر كلها .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله