اذا كان طرف سليم مافيها شي
اما اذا الاتنين حاملين
ايه يفسخ وتفسخي الخطوبه

انا امي وابويا حاملين الانيما
وجت اختي مصابه ونشوفها كيف تتعذب زمان ماكان في تحاليل
لكن دحين الحمدالله في تحاليل ليش ادخل عيالي بالم ومرض من البدايه انهي الموضوع وربي يعوضك خير

استفتي اهل الاختصاص

يعني روح لدكتور مختص في الامراض الوراثية واسال عن امكانية اصابه الاطفال

الله يوفقك

__________________

أختي الكريمة سماهر أنا دخلت علشانك مخصوص بالرغم من إنشغالي لاكن لما شفت موضوعك فضيت نفسي شوي ودخلت علشانك و بقول لك كلام من واقع حياتي وأنتي بعد ماتقرئي كلامي بتمعن وتركيز بعدها أستخيري وأتخذي قرارك
شوفي حبيبتي أنا تزوجت من زمان قبل مايكون هناك فيه تحاليل وفحوصات لزواج وماكنا ندري إن هناك فيه أمراض وراثيه إلا بعد ما أنجبت ولدي الثالث الذي إنكشفنا إصابته بمرض الأنيميا المنجلية وعمره ثلاثة شهور تعب علينا فجأه وصحته تدهورت بشكل فضيع
ودينا ه المستشفى وعملوا له فحوصات وتنوم بالمستشفى مايقارب 15 يوم وطلبوا مني ومن زوجي نعمل تحاليل دم وبعدها طلعت نتائج التحاليل ولدنا مصاب بالأنيميا المنجليه وأنا وزوجي حاملين للمرض وحنا إللي ورثناه المرض وتأزمت حالتي بشكل فضيع وتعبت نفسيا بعد ماشفت ولدي كيف تدهور وتعب من المرض ولاكن ربنا ماينسى عباده من واسع فضله
والحمدالله على كل حال إجتمعوا معانا أنا وزوجي كبارإستشاري أمراض الدم الوراثية وشرحوا لنا المرض وأسبابه وعلاجه وطرق التخفيف من الآلام وفي الحقيقه هاذا المرض لحد الآن لايوجد له علاج شافي إلا عملية زراعة نخاع العظم ومخاطرها أكثر من فوائدها ولها مضاعفات قد تؤدي للوفاة لاسمح الله والدكاتره قالوا لنا إذا قررتوا الإنجاب بعد الطفل هاذا حطوا في الحسبان بأن هناك إمكانية ولادة أطفال مصابين بهاذا المرض غير هاذا الطفل من بين كل أربعة أطفال ينولد طفل مصاب بالمرض والنسبه المحدده بولادة أطفال مصابين للأزواج الحاملين للجينات المورثة للمرض هي كالتالي 25%مصابين بالمرض 25%سليمين من المرض 50% حاملين للمرض وفي الحقيقة أنا أنجبت بعد ولدي بنت والحمدالله طلعت حاملة للمرض وماعندها أي مشاكل حالها حال الإنسان السليم العادي هيه وإخوانها إثنين كبار حاملين للمرض وصحتهم طيبه وعايشين حياتهم طبيعي وحملت بعد البنت وجبت بنت أخرى وقدر الله إنها تطلع مصابه بنفس مرض أخوها والحمدالله على كل حال هما لما تشوفيهم عادي ما كأنهم يعانوا من أي مرض لاكن لو جائتهم النوبه نوبة الألم خلاص
يتعبوا ماعاد يقدروا يتحركوا ولايمشوا وآلام بالمفاصل وإنتفاخ بالكبد والطحال ويستفرغ دم أجلكم الله وإسهال دموي ويتبول دم يتكسر الدم وينزل مع البول وتتورم الأرجل والأطراف كلها اليدين والرجلين وتصير قساوتها مثل الحجر بنتي الصغيره المصابة عمرها 3 سنوات تعبت منها آخر مرة جلست ثلاثة أيام ماتقدر تمد رجولها ولاتوقف ولاتمشي خلاص صارت مثل المعاقة بالنسبه للولد أحيانا تصير عنده إنسدادت بالشرايين والأوعية الدموية وآخر شئ قرروا إعطائه حبوب كبسولات كيماوي علشان يمنع الإلتصاقات حق كريات الدم بالأوعية والشرايين
ومستمر على هاذا الدواء إلى ماشاء الله مع حبوب حمض الفوليك هاذي يوميا ياخذها وكبسولات الكيماوي يوم بيوم وبالنسبة للبنت كمان مقررين لها نفس علاج أخوها بس بعد ماتكمل 5 سنوات لأنها الحين توها صغيرة بس دكتورهم اللي نتابع عنده حالتهم بلغنا وقال البنت بتاخذ نفس علاج أخوها بعد ماتكمل 5 سنوات وطبعا الكبسولات لها أضرار لاكن الدكتور يقول فوائدها بالنسبة لهم اكثر من أضرارها لأن حالتهم تستدعي إستخدام هاذا الدواء والولد الحين عمره 9 سنوات والبنت دخلت في السنة 4 والحمدالله بالرغم من تعبهم وآلامهم إللي تحصل لهم إلى إنا نحمدالله ونشكره ورحمة ربنا وسعت كل شئ
وهاذا مقدر ومكتوب ومافيه أحديعلم بالغيب إلا الله عزوجل وحنا يوم تزوجنا كنا محرومين نعمة التحاليل والفحوصات هاذي الموجودة بالوقت الحالي
إللي فرضوها إجباري قبل عقد الزواج وأنا أشوفها نعمة للأجيال
اللي مقبلة على الزواج في الوقت الحالي حتى ينجبوا أطفال أصحاء وسليمين بعد توفيق الله وربنا عز وجل قال ) ولا تلقوا بأيديكم إلى التهلكة (
وأنا كمجربة وعايشة حياة من الواقع أنصح وأنصح وأنصح بالإبتعاد عن زواج الحاملين للأمراض الوراثية من بعضهم ماهي الفائدة أن أتزوج من أحببته وأعيش بداية حياتي في راحة وسعادة وإستجمام وبعدما أنجب أطفال مصابين بمرض يحرمهم طعم السعادة والراحة والصحة والعافية أنا ماذا جنيت من هاذا الزواج وأنا أشوف طفلي يتلوى من الألم والمرض الإنسان أطفاله أغلى شئ عنده وأنا طفلي يعاني ألآمه قدام عيني وأنا ما أقدر أسوي له شئ أموت ألف موته لما عيالي يمرضون أدخل المستشفى أجلس مع الطفل أسبوع أسبوعين وتجي عليه لحظات أفقد فيها الأمل بأني راح أشوف إبني أو بنتي مرة ثانية ينادوني ماما و يبتسمون لي ويلعبون قدامي بل والله في إحدى المرات تعب ولدي اليوم إللي قبل يوم العيد وحالته ساءت وآلامه أشتدت لدرجة كان يعطوه المورفين المخدر كل أربع ساعات كان يصير مثل الميت ماعاد يقدر يتحرك وكل جسمه أجهزه وحالته كانت سيئة
وكنت أتوقع في داخل نفسي خبر موته في أي لحظة وكان قلبي يتقطع من داخلي تقطيع عليه صرت أمشي وأهوجس حتى الصلاة كنت أصلي بس ماكنت أركز فيها ولا أدري وش قرأت فيها النوم عيوني عافته الأكل كان يجبوه لي بالمستشفى ما أدري وش جابوا من أ كل كنت أتمنى الأرض تنشق وتبلعني ولا أشوف ضناي بهاذيك الحال أقضي اليل أقرأ عليه الرقية وأكرر إلين يأذن الفجر وأجلس معاه لما ينتهي مفعول المخدر يجلس يبكي إلين ريقه ينشف وصوته ماعاد ينسمع وبعدها الحمدالله ربنا يكتب له الشفاء ونطلع من المستشفى بس جسمه واهن وضعيف من شدة الألم ومن تأثير الأدوية ومن وخز الإبر يدينه كلها بقع سوداء
تصوروا إن الناس
وأطفالها تعيد في يوم العيد في سعادة وفرح ويروحوا الملاهي والألعاب يلعبوا ويعيدوا على أهاليهم وأصدقائهم وطفلك ينحرم هاذي اللحظات الجميلة والحلوة مع إخوانة وأصدقاءه
بسبب أمه وأبوه إللي يفكرون بأنفسهم وسعادتهم على حساب فلذات أ كبادهم إللي يتزوجوا وهما عارفين مسبقا إنهم حاملين لمرض من الأمراض الوراثية ويخلفوا أطفال مصابين بهاذي الأمراض للأسف أنا أشوف إن هاذي أنانية فيهم لاتقول أحبها ولا تقولين أحبه هاذا الحب وش بيفيدك وقت ماتخلف إبن أو بنت مصابه بمرض أنتم السبب فيه هما عيالكم يتعذبوا ويتألموا ويعانون طول عمرهم بسبب نزوة هاذي الحب الإنسان يبغى يخلف عيال أصحاء سليمين معافين عند كبره يشيلونه ويرعونه مو يخلف عيال علشان هو يجلس طول عمره شايلهم
وراعيهم ويتعذب علشانهم كل ماتعبوا وتألموا الأطفال يتألموا جسديا والأم والأب يتألموا نفسيا بسبب قرارهم إللي أتخذوه وقت زواجهم وقت ماظهرت التحاليل بأنهم غير مناسبين لبعضهم ولاكنهم أصروا على تنفيذ هاذا القرار
لأنه كان تفكيرهم منصب على حاضرهم وليس على مستقبلهم فكروا بأنفسهم ولم يفكروا بما ينتظر أطفالهم في المستقبل
أنا في الحقيقة الآن أتخذت قرار بعدم الإنجاب لأنه كفاية ضحايا
وخيرت زوجي إن كان يرغب بالمزيد من الأطفال فيتزو ج بإمرأة أخرى لتنجب له أطفال أصحاء ومعافين من الأمراض الوراثية والقرار هاذا له أما أنا الله رزقني بخمسة أطفال ثلاثة منهم حاملين المرض و2 مصابين بالمرض قررت أن أعيش حياتي وأرعى أطفالي المرضى إلى أن ياخذ الله أمانته سوى لي أنا أو لأطفالي وفي النهاية هاذا إبتلاء من الله عز وجل ونحمدالله ونشكره على نعمه وربنا إن إبتلى عبد في الدنيا وصبر هاذا العبد على ماأبتلاة به ربه فسيلقى ثوابه في الآخرة عند رب العباد والحمدالله والشكر على فضله ونعمه الكثيرة وربنا عز وجل مثل ما أبتلاهم بالمرض فهو القادر على شفائهم بإذنه تعالى .
وأنا أطلت عليك كثير أختي الكريمة وأعتذر على الإطالة ويشهد الله إني ما أريد إلا مصلحتك في هاذي المشاركة لأني أنا مجربه وأنصحك من الإقتران بشخص حامل للمرض
أنصحك أنتي وغيرك من البنات
والمصابين بهاذا المرض يصنفونهم من ذوي الإحتياجات الخاصه بالرغم من إن إللي يشوفهم ما يحسبهم مرضى لأنه مايظهر عليهم شئ لاكن وقت ماتجي نوبة الألم للمريض يتحول إلى شبه معاق لايستطيع المشي ولا يحمل بيده أي شئ ومن شدة الألم تجده يتلوى على نفسه ويصيح ويبكي بالذات إذا كانت آلامه في أماكن متعدده من جسده وأكثر شئ تتركز الآلام في العظام والمفاصل .

وأخيرا أسأل الله أن يشفي أبنائي وأبناء كل من أبتلي بمثل هاذا المرض شفاء لا يغادر سقما اللهم إشفيهم وعافيهم يارب اللهم آمين.

وتذكروا دائما بأن الصحة تاج على رؤس الأصحاء لايراه سوى المرضى الذين يعانون الأمراض.
ودرهم وقاية خير من قنطار علاج .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله

آخ يااختي بنت الحكمي
والله بكيتيني
اسال الله لهم الصحه والعافيه
انا يااختي كنت مخطوبه تقريبا سنتين وانفسخت خطوبتي بسبب اني انا حامله وهو حامل
ورفض ابي رفضا قاطعا اني اتزوجه
والحين انا انخطبت لرجل اخر لايقرب لي ابدا
ولكن اخاف ان يسمع باني حامله للمرض فيتركني
حتى قبل ان نسوي تحليل
وانا اكيد ماابغى اجيب عيال مريضين بهالمرض
بس ابغى اتزوج انسان يكون سليم وانا مصابه
مافيه مشكله
بس اخاف ان اي رجال مايقبل يتزوج بنت مصابه
يحسب عياله بيطلعون تعبانين
مايفهم ان الي حامله مع السليم مافيه مشكله
هذا كان سؤالي وخوفي
اشكرك يااختي والله يخليلك عيالك ولا يحرمك منهم
ويعطيهم طولة العمر
ويرعونك في كبرك

هلا فيك أختي الكريمة سماهر والله يجزاك خير على دعواتك الطيبه بارك الله فيك أختي أبوك كان معاه حق في رفضه لزواجك من شخص حامل للمرض فلاتلومينه في فسخ خطوبتك هاذا خير لك بإذن الله تعالى والحمدالله ربنا عوضك بخاطب آخر غير خطيبك السابق وكمان بعيد عنك أما بالنسبة لك أنتي يا أختي أنتي حاملة للمرض إذا تزوجتي برجل سليم بإذن الله ماراح يجونك عيال مرضى لأن حتى المصابة بالمرض إذا تزوجت برجل سليم أو العكس الرجل مريض يتزوج إنسانة سليمة عيالهم يطلعوا بإذن الله سليمين
أهم شئ إن الحامل للمرض ماياخذ حامل للمرض أو مصاب والمصاب ماياخذ لامصاب ولا حامل للمرض هاذا أهم شئ علشان أطفالهم مايطلعوا مصابين بالمرض أنتي الحين حاملة للمرض إذا خطيبك المتقدم لك سليم مافيه شئ معناته خلاص مافيه مشكلة عندك أنتي موضروري تشرحي له إنك حاملة للمرض هناك عند المأذون هو يشوف تحاليلكم ويقول لكم إذا كنتوا مناسبين إنكم تتزوجوا بعض أم لا كل شئ موجود في أوراق التحاليل
أنتي لاتشغلي بالك إذا خطيبك سليم بإذن الله تعالى بيتم زواجك وربنا يوفقك يارب ولا تشيلي هم وفوضي أمرك لرب العباد ماراح يصير غير إللي كاتبه
ربك أسأل الله لك التوفيق والسعادة يارب .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله