السلام عليكم ورحمة الله تعالى وبركاته

أختي في الله
تحمليني وانظريلي نظرة أخو لك ويبي مصلحتك

اول شي مالج شغل بعلاقة الرجال بأهله ، يجيبلهم يحطلهم يزرع لهم هذا شأنه مع اهله وعليج إحترامة ، ولما تقولين ابي اشوفة رجال قدام اهله والا مجرد طفل ، أختي كبري عقلج مافيه رجال يطلع رجولتة على اهله هذا نقص .

المفروض أنج تقوين علاقتة بأهلة مو تزيدينها سوء.

بالنسبة لمشاكلج مع خواتة ، انا ابي اعرف شلج بالداب وشجرتة ، شنو اللي يجيبك عندهم ؟ لاتجينهم
واذا انتي عايشة معاهم بنفس البيت خليج بشقتج واهتمي في شؤون بيتج لما ربي يامر ويصير لج بيت بروحج.

واذا عندج بيت بروحج وهم يجونج ، عاد انكتب علينا انتحمل ضيوفنا ، وان تكلموا معاج بأي شي خلج هادية وعادية ولاتبادلينهم اطراف الحديث ، ردي عليهم بـ رؤوس اقلام ، وعطيهم لقمتهم وخليهم يتوكلون. وكفى الله المسلمين شر القتال

وإذا على قولة سمرة ، ما اقول الا ياربي لك الحمد على عقلية بعض الحريم ، لكن اذا زوجج عاجبة هالشي مالج شغل في حكي غيرة ، ومن حقج تطلبين من اي شخص انه مايعلق على شكلج بكل هدوء ، سواء بمدح او بذم .

تكفين كبري راسج عن هالمواضيع وارتقي عن هالأمور التافهة هاذي ، وماني عارف شفيكم على طقة الأصبع قلتوا أنفكر بالطلاق !!

يا اختي ترى الحياة الزوجية فيها الحلو وفيها المر ، اذا بمشكلة بسيطة مثل هاذي صرتي اتفكرين بالطلاق ، اجل شلون اتواجهين مصاعب الحياة والمشاكل اللي أكبر ؟؟

الوضع يبيلة حرمة سنعة وفيها حكمة وصبورة وتعرف اللي لها واللي عليها ، ومايهزها اي كلام او ردود افعال او اراء ، والثقة بالنفس زينة وانا اخوج.

افا عليج بس ، انا سائلج بالله العظيم انج اتغيرين اللي قاعدة تفكرين فيه ، وانتي اللي لج بالعايلة هاذي كلها هو رجالك وبس ، سكري عليه بابك وكل ماورى الباب للكلاب اجلكم الله.

لاتزعلين مني يشهد اني اسولف معاج مثل ماسولف مع خواتي.

موفقة خير يارب.

__________________
استغفر الله واتوب إليه