بسم الله الرحمن الرحيم
والحمدلله رب العالمين والصلاة والسلام على افضل المرسلين
السلام عليكم ورحمة الله وبركاته
والله يا اخوي يا فايز وقت قريت سالفتك رجعتني للعام 1426 يوم نزف قلبي وكانت حياتي جحيم لاني تعلقت في البنت لكن الحمدلله على كل حال قصتي مثل قصتك بالتمام وبقولك ايش سويت و ايش صار معي
كانت امها مسيطره سيطره حديديه على العائله بالكامل كسيطرة الجحش بشار على احبتنا واخوتنا في شامنا الجريح نسأل الله عز وجل ان ينصرهم ويفرج عنهم كربتهم
المهم انواع الاتهامات ومنها انني ديوث وانني متسلط وانني بخيل وانني اتكلم في عرض العائله ويشهد الله ان هذا الكلام لم يكن موجود فيني طبعا اخذوا زوجتي من بيتي وانا ماني موجود اتصلت استفسر لكن للاسف لم ترد هي ولا اهلها حاولت اشتكي للشرطه او المحكمه فرفض والدي الله يحفظه ويخليه لي وقال هذا نسب ماينفع الشكاوي والدعاوي فيه قلت ابشر جلسنا معهم جلستين صلح ولكن للاسف موعاجبهم العجب ويشوفون نفسهم راعين حق ارسلنا عليهم كبار الجماعه وكبار الحاره اكثر من ثلاث مجالس صلح ولكن لللاسف مكابرين ونعتوني انا وابي واسرتي بالفاظ غير لائقه طبعا جلسات الصلح هذه استمرت لمدة سنه كامله وفي نهاية السنه نقلت انا من المدينه اللي كنت فيها و نقلت للاخرى تبعد عنها حدود 1000 كيلو راجعت نفسي واستخرت ربي وشفت انه مافي مفر من امها الله لايسامحها في الدنيا والاخره طبعا لا اخفيكم اني حاولت بشتى الطرق والوسائل اني اتواصل معها سواء بالقاء وجها لوجه او بالاتصالات او عنطريق بعض معارفي ومعارفها ولكن للاسف لم استطع ويشهد عليه رب العباد يوم نلتقي عنده وبعدها رحت وخطبت وبعد خطبتي بشهرين ملكت وتزوجت ولم تكن هذه الخطوه للانتقام لا بل كانت للاستقرار النفسي والذهني وايضا حتى اعف نفسي عن المحرمات وبعد زواجي بثلاث اشهر جاني اخوها في نفس المدينه اللي انا فيها ورفع عليه شكوى فحواها طلب طلاق ودفع نفقه لمدة سنه مع انهم هم اللي اخذوها من بيتي رحت الجلسه الاولى وللاسف اخوها اللي هو ولي امرها ووكيلها ما حضر وبعد اسبوع حضر للجلسه الثانيه وقام وافترى وكذب عليه وانا ساكت بعد ما خلص كذبته استأذنت الشيخ بالكلام وقلتله اول شي ياشيخ زوجتى المفترض انها تكون موجوده وثاني شي انها ناشز لانها خرجت من بيتي من دون استأذان ولم تكن مضروبه او مكسوره او جايعه او ناقص عليها شي وثالث شي هي الان طالبه خلع يعني تعطيني خسايري كلها واكون واضح معك ومع الاخوه القراء ان نيتي رجوعها لبيتي لاني احبها لكن كان اخوها متعنت معي وفي الاخير طلقتها واخذت بس المهر وطلبت الله ان يعوضني بزوجتي الثانيه كل خير وابشرك ولله الحمد واذكروا الله ان الزوجه الثانيه معيشتني في نعيم وشايلتني على كفوف الراحه الله لايغير علينا ويخليها لي هي وبنتي والمولود المنتظر بأذن الله
فأستخر الله وخلها تجي منهم وسو مثل ماسويت والله يعوضك ببنت الحلال ويرزقك الذريه الصالحه
اخوك/ابن النصباء

الله المستعان والله يصبرك
تقدر تتزوج يعني عندك استطاعة الان وكيف تقيم وضعك النفسي بصراحة قول اللي في خاطرك عشان تتطلع بنتيجة وكيف هي مشاعرك ناحيتها قبل ما تحدث هذي الامور

هلا اخوي ابن النصباء
على بالي هذي اسوء حرمه في العالم
الا فيه مثلها كثير
الحمدلله ربك عوضك بالافضل
ربي يسعدك ويوفقك
وشكرا لك

وضعي لا والله ما يسمح
انا تزوجت بقرض من البنك
ومن ناحية النفسيه بصراحه سيئه جدا الشهرين هذي نقص وزني 7 كيلو
الحمدلله على كل حال

افا والله يافايز

أبك ينقص وزنك ومضايق عمرك عشان حرمة ماتسوى ؟ افا والله ياولد الأجواد
الحرمة بدالها ألف حرمة ، والفلوس تروح وتجي ، اهم شي كرامتك وأعتبارك

إذا حنا الرجال انتضايق ، اجل شخلينا للحريم ؟؟

ماسمعت البيت اللي قول
مايشكي من الوقت رجال .. أنا أعرف ارجالن شكى الوقت منها

كبرر راااسك وانا اخوك وخلك اكبر من هالأمور.

__________________
استغفر الله واتوب إليه

كان له همه انا وربي شلت هم على قلبي اقوى من الجبل طلعت روحي حسبي الله على من تسبب فيني
انا يافايز ملكت وتزوجت وانفصلت خلال سنه تتخيل الوضع !! خلال سنه صار لي كل هذي الاشياء
عشت معه شهرين وعلقني 7 شهور عذبني اشد العذاب انا مابي اغتابه ولا ابي اقول هو وش سوى فيني
يعلم الله وش سوى فيني عذبني ودمرني وخلاني اصارع نفسي بنفسي انجيت بلي سواه فيني الله لايسامحه
طاح شعري نزل وزني كان وزني حول 70 نزل وزني حول 12 او 13 كيلو نزلت مرضت حسبي الله
اشتكى علي بالمحكمه وماحضر الجلسه وعلمت الشيخ على كل شي وساعدني الشيخ ماقصر
جابوه الشرطه اسحبوه لمحكمه وماقدر يتكلم او يقول اي شي لانه عارف نفسه هو وش سوى
واعترف على نفسه بكل شي .. استخرت ربي اني اخلعه وخلعته والحين انا مرتاحه
بس قلبي محروق بلي سواه فيني عسى ربي ينتقم منه عاجلا غير اجلا
يعني مو بس انت الي شايل هم كلن له همه ومحد مرتاح ابد
يافايز الي ترتاح له سوى بس اهم شي تكون تستخير قبل اي خطوه تخطيها عشان ماتندم ..

الله يفرج هم كل مهمومه ومهموم يااااااارب [/FONT]

السلام عليكم ورحمة الله تعالى وبركاته

أختي خفوق
ليه حزينة على نفسك ، بالعكس أنتي رديتي أعتبارك ، وتحررتي من هالسجان اللي مارحمك ، والحمدلله انتي الحين بخير ونعمة ، وكل ما حسيتي انك مقهورة خوذي نفس عميق وتذكري انعام ربي عليك ، ف الحمدلله هذا انتي بصيره ، بكامل قوتك تبارك الله ، لنتي معاقة بعيد الشر عن قلبك ، ولا مقطوع لك رجل والا ايد ، ولو تعدين انعام ربي عليك ما بتحصينها ، ف قولي الحمدلله رب العالمين.

غيرنا قاعدين يصارعون امراض مستعصية ، ف ياربي لك الحمد على نعمتة.

ترى إحساس القهر إعتراض ، قولي اللهم اجرني في مصيبتي وأخلفني خير منها.

صدقيني ربي بيعوضج برجال أفضل وأحسن منة وبيعوضج كل اللي عانيتيه بحياتج ، خليكي قوية بإيمانك.

اتمنالك كل خير وسعادة يارب.

__________________
استغفر الله واتوب إليه

لا تفكر اني تنازلت عن كرامتي او ذليت نفسي لا والله بالعكس
القهر موجود بقلبي ما ابديته لاحد غيركم انتم ( وبصراحه لانه محد يعرفني)
حتى اهلي احاول اوضح لهم اني مبسوط ومرتاح

وهذا الشيء اللي حاصل لي من القهر والله يالمتفائل
مقهور لاني عاملت البنت هذي بكل حب بكل اخلاص
وربي ما تطلب شيء الا تلاقيه
ما يمر اسبوع الا لازم اطلع امشيها
والله اعطيها شهريا تقريبا 2000 او اكثر
يعني مرتاحه مره
شهر العسل سافرت ماليزيا وكلفني تقريبا 30 الف ويقولون عني بخيل !!
في الاخير هذي جزاتي
كلامهم قهرني وربي هذا غير اللي قلت لكم عليه
والله يعلم بكل شيء

كلام اخوي المتفائل صحيح
وبالعكس المفروض انك تفرحي لان مثل هالادمي الفكه منه غنيمه
الله يوفقك اختي ويرزقك على قد نيتك ويعوضك خير ويسعدك دنيا واخره

يافايز ياحبيبي
اتحسسني ان هالدنيا مافيها اللي ينكر الفضل والمعروف !!

انت سويت اللي عليك بما يرضي الله ، وهم اللي جا منهم القصور.

واذا البنت بنفسك ترى مو كل شي بالنفس يكون بصالحنا.

واذا هي جميلة ترى الجميلات واجد وياكثرهن بنات الاجاويد.

وبعدين ترى الثقل مع بعض الحريم زين ، بمعنى انك لاتعزها ولا ترزها الا لما تعرف معدنها ، عشان لاصار ما صار منت والله غاثن روحك بجحودها ونكرانها.

صدقني انت الحين مقهور لانها خاذلتك ، وماتوقعت انها تسوي فيك كذا ، بس لما تجيك اللي تستاهلك بتنسى طوايف هالبنت واللي خلفوها

والخسارة بالعمر مهي بالفلوس ، والفلوس يبي الله يرزقك فيها.

طول بالك بس ، وعيش حياتك وانبسط منت والله عايش مرتين.

__________________
استغفر الله واتوب إليه