السلام عليكم ورحمة الله تعالى وبركاته

أختي في الله
اول شي مبروك ياعروسة وبتطلعين احلى عروس بهذاك اليوم إن شاء الله.

ثقي بالله وأمني أن كل اللي تحسين فيه من الشيطان ، لأن الشيطان أفضل مكان يحبة هو لما يزرع التوتر والمشاكل بين الزوجين ، واللي تحسينة من زوجج ترى أمر طبيعي ، يمكن يستحي ومايقدر يعبر عن مشاعرة بصورة طاغية عشان ماتفهمينة غلط ، او يمكن أنج بعيدة عنة والبعد والله العظيم يقطع القلب خصوصاً لما يكون فيه حب.

واحب اوضحلج شي لازم تحطينة أبالج !! والله والله والله العظيم اننا نشيل هموم الدنيا اذا قربت زواجاتنا وتصير معانا ظروف ونقوصات مادية وأشغال مايعلم فيها الا الله ، ف يمكن ان هالشي بعد متعب نفسيتة.

لاتثقلين علية ولا شي ، أحتوية هو بحاجتج ترى ، ولاتخافين والله يموت عليج ، ودامة عاقل لاتخافين من اللي عندة عقل ، وان شاء الله ربي ايسر امور زواجكم وتسعدين اكثر واكثر.

وأحب اوصيج قد ماقدرتي تكبرين نفسج بعين زوجج كبري ، والله الرجال مايهد حيلة إلا الموقف الطيب والجميل ، ويقعد طول العمر يتذكرة لج وماينساة وبيحطج تاج على راسة ، خصوصاً انه عاقل!!

وبعدين تعلمي انج لاتخلين زوجج كل عالمج ، وازني بين حياتج الخاصة وبين حياتج مع زوجج ، بحيث تكونين تحت معيار "لا إفراط ولا تفريط" ، عشان ماتعانين أكثر خصوصاً بأنج حساسة والحساسة تحتاج إهتمام أكثر ويزيد كل يوم عن يوم.

عودي نفسج انج ما تفكرين بالأشياء السلبية ، وفكري بالإيجابيات !! يعني فكري ابيتج شلون راح يكون وفكري شلون تكونين سعيدة مع زوجج !! حطي أفكار وأرسمي لج خارطة طريق مع زوجج تعيشين فيها سعيدة وبعيدة وبأكبر قدر ممكن عن المشاكل اللي راح اتواجهونها بالمستقبل.

فكري شنو بتسوين لما تكونين حامل وشلون بتستقبلين اول بيبي لج وشلون بتشترين له ملابسة وووالخ.

والله يا اختي ان التفكير بالسعادة دقيقة وحدة يمحي أثار التعاسة لأيام كثيرة.

اتمنالج التوفيق ياعروستنا.

__________________
استغفر الله واتوب إليه