أخوي دامك سويت الخطوه اللي قلت لك عليها من شهر... عيل مثل ما اتفقنا هد اللعب شهرين او حتى 3 شهور مب مشكله... و خل تواصلك مع عيالك بكل طيب... و واضح انك ولد اجاويد و معدنك طيب و للحين تبي تلم الأسره بس الشيطان وااااايد شاطر في التفريق بين الزوجين و هالشي من أحب الأعمال إليه...

اخوي من الناحيه الدينيه التزم باللي قلت لك عليه... و يا ليت تروح العمره 3 ايام تقيم الليل هناك و تدعي ربك امام الكعبه و اعلم ان الخير في اللي الله سبحانه و تعالى..

و شعورك بالوحده و الظلمه شي عادي جدا لأن البيت اللي كان فيه حس زوجتك و عيالك صار فيه حس الحيطان بس... اخوي ما يصير تحبس نفسك الحين... اللي صار صار... و ما في مفر منه... خاصة انك بذلت الأسباب... فوكل أمرك لله عزوجل و اترك الأمور تسير بكل هدوء... حتى بناااااتك لا تسألهم عن امهم حاليا... الحرمه فينا تسأل عيالها عن حال ابوهم و كيف وضعه و هل سأل عنها او لا... و خاصه في مثل وضعك انت.... أمام عيالك كون في اقصى فرحك و زينتك و بخورك و عطرك... و لا كأنك متأثر بشي... مثل يا اخوي لأن حاليا ما بإمكانك إلا التمثيل... و تبيان ان الحياه ماشيه حاليا عندك...

اكيد اخوانها معاك في البيبي... همممم... و ممكن اييبون طاريك عندها... الستيتس في البيبي دوم يكون شي وناسه... الصور وناسه... طلعات مع الربع.... يعني توصل لها الرساله ان انت ما راح تحاول معاها الحين...

الزواج الثاني: طبعا ما راح يكون فيك حيل تبدا من جديد الحين.... بعد عشر سنين منو فيه حيل انه يبدا حياه جديده مع وحده جديده لازم يفهمها هو شو يحب و شو ما يحب و يبدا من اول و يديد... و العيال كيف راح يكون وضعهم و هالسوالف كلها... و لكن خلنا لا نستعيل في هالشي... و لكل حادث حديث وقتها...

انت داوم على الجانب الديني.. الصدقه بنفسك شخصيا مثل ما قلت لك... لها طعم ثاني.. و راحة بال ما يحس فيها الا اللي جربها...

الله يوفقك ان شاء الله...

ابصراحه بكلامكم قام يخف عنى همي ويخلليني افكر واصبر ، بارك الله فيكم والله يسعدكم ، صدقوني كيف مبصوط بمشاركتكم ما اقدر اوصف ، وما يطلع من قلبي غير دعوه صالحه لكم ، الله يطول اعماركم ويسعدكم في حياتكم ويخف عن كل من عنده هموم ، مشكورين يا الاخوان والاخوات .

__________________

سلام عليكم ، ابو مريم كيف حالك ؟ سامحني امس نسيت اكتب لك ، بخصوص قيام الليل والله مب مواضب لان في خلال 24 ساعه ما انام غير ساعه او بالكثير سعتين ، ودوامي يبعدني عن مقر سكني بحدود 200 كم فا اتحرك من البيت قبل صلاة الفجر فا مرات انام على ساعه وحده او 2 ... اضبط المنبه بس مرات ما انش علموم انا احاول ارتب الجدول وانشاءالله الله بيقدرني.

ما اعرف هاي الحرمه شو تبا بالضبط ، العيد ما خلتهم يسلمون عليه وهم مسافرين اتصل على رقمها مشغول من صبح اكيد تسلم على اهلها ، طيب وانا شو مب المفروض تخللي الصغاريه يتصلون فيه عيد كان حتى الكفار يسلمون قلت ما عليه تميت اتصل عدة مرات قريب ساعه 12 الظهر اعطتهم التلفون وتكلمت مال دقائق . ومن بعد العيد لين اليوم اتصل وما ترد ، يعني ابا افهم شو تبا بالضبط ؟ ليش كل هذا ليش تباني اروح المحاكم وغيره شو الاستفاده منه . صدق قهر والله قهر ، شفت نذاله وشفت ناس طلقو بس ما شفت حد سوى شراتها . تدخل اليهال في كل شي ، ولما موضوع الفلوس اول شي تخلليهم يكلموني ويذكروني عن الفلوس. صدق الزمن الطيبه ما منه فائده ابا امشي بالطريق الصح لاكن ناس تجبر الواحد يعاملهم معامله غير لائقه. حكم القاضي مبلغ للنفقه غير مقبول سكت الكل قالوليلي روح استئنف قلت لا خله بدفع الا يبون مابي ام عيالي وعيالي تحتاج لاحد ، خلتني للعلم فقط لما شلت البنات مع اهلها وسافرت قبله بيوم السفر خبروني اليهال وليش بعد لان محتاجين الفلوس قلت ما عليه بكون انا احسن عنها رحت واعطيتهم حق السفر. صدق مخي مفتر كيف اتعامل وياها؟ اسكت اقول لا مابي اخرب الاحتمال له ممكن ترجعلي بس طريقتها في المعاله غير لائقه. اعطوني رايكم يا اخوان والاخوات .

بو سارة شفت قصتك انت مع طليقتك مريت انا فيها كلها احداثك نفس الاحداث اللي انا مريت فيها
انا كنت متزوجة لمدة اربع سنوات وكنت من النوع اللي دايم اقوا اسرار بيتي لاهلي وكان هذا الشي يزعج زوجي وكنا نحب بعض حب كبير وكان مايقصر علي بشي قد اللي يقدر عليه بس كانت امي واختي يتدخلون ليه مايسوي لك ليه مايجيب لك وليه وليه بس مشكلتي اني كنت مثل طليقتك عنيدة واظن ان كلام اهلي هو الصح وكلام زوجي هو الغلط مما سبب ان زوجي قام يطلع من البيت بسبب النكد اللي انا كنت انكد عليه فيه وكنت دايم انا اشوف نفسي صح وكنت اشكي لامي واختي وكان هو ينزعج من هالشي وكان عندي طفل كان عمره سنه ونص في ذاك الوقت الى لما وصلت مشاكلنا الى اني ازن عليه كل يوم طلقني طلقني وكان هو يتركني ويطلع لانه كان متمسك فيني ومايبي ينطق الكلمه الى ان جا ذاك اليوم اللي قلت له طلقني اذا انت رجال طلق وفي لحظة غضب طلقني طبعا انا في ذيك اللحظة انهرت وقمت اصيح مع انه انا اللي طالبة الطلاق ولميت اغراضي كلها وطلعت من شقتي وكنت اكابر وكانوا اهلي معاي وكانوا يقولون لي هو ما يستاهلك ومن هالكلام لاني من شكاويي لهم ومن كثر مانكدت عليه كان يضربني بس اعترف انا اللي كنت اجيبه لنفسي ونكمل كان يروح ويجي على بيتنا يحاول في ابوي اني ارجع وانا كنت اكابر واقول ماابيه لدرجة غيرت رقمي وكان ياخذ ولدي كل نهاية اسبوع ويجيبه لي الجمعة وكان يحاول ويحاول وانا اصده لين جا ذاك اليوم اللي قالوا اهلي بيروحون العمرة فكلمه ابوي وقال له بنروح بحكم ان ولده عندي ومارفض وافق ورحت مع اهلي واخذت عمره وكنت اطوف وادعي ربي اللهم اجرني في مصيبتي واخلف لي خيرا منها وكنت اقول اني ماابيه ولاابي شي منه خلاص وهو مازال يحاول وبالصدفه شفت خالته هناك وسلمت عليها حن قلبي لاهله لعايلته كنت احبهم كثير كانهم اهلي رجعنا وكلمه ابوي وقال له ان احنا رجعنا اذا يبي يجي يشوف ولده وجا اخذه وكان مايقصر كان يرسل لس مصروف ويشتري لولده الحليب والحفايظ وكانوا اهلي يقولون واجبه هذا الشي ماكنت افكر ان غيره مايسوي هالشي بعدها هو كلم ابوي وقال باخذ الولد بنسافر مع اهلي عمره لمكة انا وافقت وجهزت اغراض ولدي خذ ولدي معاه ظليت كم يوم وماقدرت خلاص تعبت على فرقا ولدي وكانوت اهلي مانعيني اكلمه رحت لابوي الصباح صحيته من النوم قلت له ابي اكلمه قال ايش قلت ابي اكلمه ابي ولدي ابي ارجع لبيتي قالوا انتي مجنونة ترجعين للنار برجلينك قلت انا ابيه قال كيفك كلمته ورد علي اخوه قلت وينه قال نايم قلت طيب قول له اني كلمت دقيقة الا هو داق قال لي روحي بعيد عن اهلك لانه عارف انهم جنبي وياشرون لي مشكلة اهلي كانوا دايم يظنون اني صغيرة ولا اعرف اتصرف وكانوا حاطين فكرة انه يلعب علي وانه ماراح يرجعك الا علشان ينتقم منك اظلينا يمكن ساعة وانا وهو نكلم بعض طبعا لما سكرت قالوا اهلي اصلا هو كذاب وعيشوني في قلق نفسي طبعا كنت عند اهلي 4 شهور كان عندنا موعد جلسة بالمحكمه علشان يصدر صك الطلاق وكنت خلاص بروح مع ابوي بس قبلها بيومين خلاص بديت اشتاق له اشتاق لبيتي حسيت اني غلطت كثير في حقة اعترفت لابوي وقال لي ليه ما قلتي ليه ساكته خلينا الرجال هو اللي غلطان وانت الصح طيب قام ابوي عطاني جواله وقال لي كلميه يااني فرحت وقولي له انك تبين ترجعين بس بشروط منها يسوي لك عزيمة كبيرة ويجيب لك طقم ذهب ومن هالكلام لان اهلي من النوع ان الرجال اللي يحب زوجته يقدرها كذا وزوجي كان من النوع اللي يكفي اقول انه محتويني عاطفيا ومايقصر علي ابد باللي يقدر عليه طيب كلمته وفرح بمكالمتي وقال لي انا ابيك ومتمسك فيك ولما قلت له هذا الشي اللي قال لي اياه ابوي وافق على اشياء ورفض اشياء ومن الاشياء اللي رفضها العزيمة قرب موعد المحكمة قلت انا بارجع لزوجي قالوا احنا ماعلينا منك تبين ترجعين رجعي بس مشاكل مانبي ولا تجين تشتكين منه قلت موافقة كلمت زوجي وفرح قال خلاص انا اليوم باكلم ابوك واجي وجا قال لي ابوي هذا زوجك وانتي كلميهطبعا وش اوصف شعوري في ذاك الوقت بس احمد الله الف مرة اني رجعت لزوجي طبعا رحنا موعد المحكمة وابوي حط شروط لزوجي انه مايضرب وانه يعاملني كويس رجعت لبيتي ولزوجي قررنا نفتح صفحة جديدة من حياتنا ونحذف الاربع سنين اللي فاتت وطبقنا هذا الشي عشنا حياة جديدة بنيناها بانفسنا تركنا الماضي بما فيه ولما رجعت لزوجي اخذت عهد على نفسي مااطلع اسرار بيتي وشوي شوي رجعت ثقة زوجي فيني من هذه الناحية محدثتكم الان كملت 10 سنوات زواج وعندي الان 3 اطفال اذكروا الله ما شاء الله تبارك الله
انا ماكتبت قصتي الا لاقول لك لا تفقد الامل وانا ما ذبح قلبي والا لما زوجي اخذ ولدي معاه للعمرة ذبحني فراق ولدي هل هو نايم ولا صاحي هل هو مبسوط ولا يصيح يبيني انت المفروض تاخذ بناتك عندك في نهاية الاسبوع وتدللهم وتتقرب منهم لان لك حق في بناتك و هم في سن يحتاجون لحنان الاب
ويارب اسال ربي انه يجمع بينكم وترجع لك زوجتك ياكريم
وانا سجلت بالمنتدى بس لارد عليك

سلام عليكم اختي العزيزه ، شكرا انج شاركتي بقصتج .... بس انا بديت افقد املى لان زوجتي عفوا ام عيالي عنيدا ومن تزوجنا عمري ما كنت قبل اهلها. مهما هم يسون يقولون هم الصح وانا غلط ، والحين هى تشوفني كعدو الكراهيه بائنه وعايشه حياتها ومرتاحه عند اهلها والبيت ماشاءالله في كل اخوانها وعيالهم وامهم فا عائشه بدال واحد عندها عشر اشخاص تروم تشتكيلهم لاكن في شي انا واثق في انها كرهتني بشكل مب طبيعي ، مهما حاولت مهما سويت ما رضت ، وعادي باجر اهلها يقنعونها تتزوج مره الثانية ، بنسبلها اهلها ملاك ، والله يعلم كيف يمكن بالغت في الكلام عندهم ، تقريباً قصتنا قريبه من بعض فقط الفرق ماعاد لى مكان في قلب ام عيالي. وهي مرتاحه تطلع وتروح تسافر ، هي رضت قبل الطلاق بشويه وعقب غيرت رايها تتحسني مجرم واكيد حد قالها انا مجرم او شي بنتقم او غيره. بس الا انا اعرفه الحرمه لما تخسر بيتها مهما كانت الاسباب تحزن بس ام ساره للاسف ما حسيت فيها هذا شي ، وبنسبله عيالي بنتي الكبيره متعلقه في امها بشكل خيالي وغير هذا لما اييبهم الفيلا عندي يمللون كل شويه يسالون متى بترجعنا متى بترجعنا عند ماما هناك كلهم موجودين اقول في قلبي وانا حبيبي ماسالتي عنى روحي وحيد عايش . قلبي واحساسي يقولون بما انها تكرهني ما راح تحس بشي لا لبيتها ولا اى شي ، وانا مكتوب لى شقا. مرات اقول هذا ابتلاء من عند الله بس لما افكر اقول كيف هذى افعالي ذنوبي والظلم له ظلمتها من جي الله عاقبني حرمني منهم. لان الله سبحانه ما يظلم اعباده الا العبد بنفسه يظلك نفسه. والله اختي ودي اشكي واشكي واشكي بس الصفحات ما بتكفى بس ما اقول غير الله يصبرني ويرجعلي بيتي ويحنن قلب ام ساره لان اقسم بالله احبها ، احاول مرات اكرها ابا اذكر الاشياء له سوتها غلط لاكن بعد ذلك ماقدرت اطلعها من قلبي. والحين هى تتعامل معى جنه ولا عمرها عرفتني وتحرمني من عيالي والله يعلم شو شو ناويه. يا اختى بما انج انتي حرمه وقريته قصه كلها شو رايج هل في مجال بترجع هل هي تفكر فيه وهل هي بتفكر بالزواج ثاني ، والاهم كيف نست العشره سنين كيف معقوله مسحتني بهاى سرعه ، ولا حست انى ندمت وترجيت وحاولت سويت المستحيل ما حست انه يحبني ويباني. الله يعلم اختى العزيزه قصتي قريبه من قصتج ياليت لو اخذ افكار من وجهة نظرج ، لانى والله حياتي جحيم ، ويمكن بعض الرجال في المنتدى يقولون والله هذا ما عنده سالفه خلاص انسانها وخذ غيرها. بس ياناس احس ظلمتها واحبها وهى ام عيالي والموضوع ايضاً فيها بناتي فا شو اسوي غصبا عنى عسى الله ما اييب حد في مكاني . الله يحفظكم

في الفترة اللي كنت انا وزوجي منفصلين تقربت لربي كثير ختمت القران كنت اصلي قيام اللي حافظت اكثر على صلاتي والاذكار وانت لاتظن ان زوجتك عايشة حياتها ترى انا كنت ظاهريا وعند اهلي والناس عايشة حياتي بالطول والعرض بس خل الناس تنام بالليل وينام ولدي كنت انام ودمعتي على خدي كنت اصلي الليل ودايم اردد اللهم اجرني في مصيبتي واخلف لي خيرا منها توكل على ربك الكريم الح بالدعاء ترى باب الله مفتوح شوف عندك الشيخ مشاري الخراز بالتويتر يوضح لك كيف تتوكل وتلجأ الى الله ويشرح لك الطريقة كذلك وثق بانك اذا وكلت امرك لله راح ربي يحققه لك وترى زوجتك ذبحها العناد والمكابر تعرف زوجي كان يحط لي رسايل في شنطة ولدي في ذيك الفترة وكنت اخبيها علشان مااحد يقراها ولا احد يدري عنها وعلشان اتجنب التعليقات السخيفة منهم طيب بناتك شاركهم هواياتهم روح معاهم سينما فيلم كرتون ترى مررررة ينبسطون العب معاهم خلهم يتعلقون بك بعد وتجنب تسالهم عن امهم شي خطط لهم رحلة للبحر رحلة سفاري خل اليوم اللي تاخذهم فيه يوم لا ينسى ابد سوو لهم حفلات مفاجئة في مطعم فاجئهم بكيكة وخل ينبسطون فكر كيف تكسبهم بطريقة غير مباشرة خلهم يتجمسون للطلعة الجاية وش بتفاجئهم فيه اثبت لبناتك انك تغيرت اثبت لهم انهم سعادتك انت حاليا توكل على ربك الكريم وركز كيف تسعد بناتك وبس شوف وش الاشياء اللي يحبونها الاكلات الحلويات كذا تكسب قلبهم وسو هذا الشي مو بدافع انك تبي ترجع لامهم لا لانك تحبهم وعبر لهم بالكلام قل لبنتك انا احبك يا بنتي اشتقت لك يا بابا واذا جيت تودعهم ضمهم
واسال الله بتفريج همك واذا ضاقت بك الدنيا توجه لرب العالمين فبابه دوم مفتوح لعباده

سؤال انت خلال هال7 شهور طليقتك
ماتواصلت معاك لا برسائل ولا مكالمات ولا عن طريق البنات ولا انت كذلك
كتبت 3 ردود وانمسحت