السلام عليكم ورحمة الله تعالى وبركاته

اختي في الله
اعتذر عن التأخير الخارج عن إرادتي حيث اني مسافر للعلاج انا وزوجتي

في البداية
كان من الاحرى ان تكون عندك مهنية في التعامل مع زوج بنتك!! لاسيما أنك ام زوجتة والمفترض ان تكون لك هيبتك عندة ووزنك ، وتكون لك شخصيتك القوية!! بحيث من يتصل عليك ويحاول يتشكى من بنتك تقولين له هذا بيتك وهي زوجتك وحلوا مشاكلكم مع بعض من غير لا أدخلوني في حياتكم الشخصية ، وتنصحينة بكم كلمة تعضينة فيها عن كيفية التعامل مع المشاكل وعن الصبر وخلافة من الامور اللي تساعدهم في حل مشاكلهم ، وماتسمحين له انه يكلمك عن تفاصيلهم سواء في الزين او الشين ، وإذا شفتي رقمة بعد كذا لاتردين علية ، وإذا كرر الإتصالات أعطي تلفونك زوجك يكلمة وينقدة بكم كلمة عشان مايحاول انه يتشكى من بنتك ويخلي هالشي ذريعة له او سبب يخلية يسوي في بنتكم اللي يبيه من عدم احترام وسوء معاملة وهو مطمأن من ناحيتكم لأنه يعتقد انه حاطكم بالصورة وانه ماينلام بلي يسوية فيها ، وهذا اللي حصل للأسف.

الحل الآن الآتي
انك انتِ تطلعين من الموضوع قدام زوج بنتك واهلة ، ومالك دخل إلا في بنتك بينك وبينها فقط!! وماتدخلين بعد كذا بينهم على الاقل قدام زوج بنتك واهلة!!

وتخلين الموضوع بيد الرجال!! بيد زوجك وعيالك ويفضل وجود عمانها وخيلانها (خلية يشوف عزوتها) ، ويقعدون معاه ويفهمونه ان بنتكم مو مهزلة ولاهو مشتريها من سوق العبيد!! وتكون اللهجة حادة بس بطريقة دبلوماسية من غير تجريح عشان يحس برجولة زوجك وعزوة بنتك (لأن بعض الرجال اذا شاف اهل زوجتة ارض خصبة ومالهم شخصية يبدأ يتمادى على بنتهم وهو مو فارقة معاة وهاذي اعتقد انها شخصية زوج بنتك!!)

ويقعد زوجك يفهمة انها بفترة وحام وان هالحالة تصير مع الحريم ويقعدون مو طايقين ازواجهم وان هالشي مالهم سيطرة علية هالشي نتيجة تقلب الهرمونات وخلافة!! وكان من الأحرى انه يصبر ويتحمل وهذا من سمات الرجال الحقيقيين ، ويقول له هذا قدام مشكلة بسيطة سويت كذا اجل اذا واجهتكم مشاكل اكبر وش تبي تسوي ؟؟ لكن اسمع تراك اخطيت وجانبت الصواب بطريقتك وأسلوبك!! واذا صارت لنا اي ردة فعل فهي من باب (لكل فعل رد فعل) والإساءة ماتقبل حتى عند الحيوانات اجلكم الله.

لاترجع البنت إلا برضاوة عشان يتأدب ومايتعودها مرة ثانية

إذا الرجال حرم وطلق على جيتها وهي ماجتة!! أسألوا شيخ هل وقع الطلاق بهذا؟؟

في حال وقع وإلا ماوقع ردوها له تراه طايش وصغير ومايفتهم ويمكنة يسمع من حريمة ويودنه يمين ويسار ، صدقيني اليا كبر راح يدبر ويفهم ويعقل خصوصاً اليا شاف اعيالة ، وياما شفنا انواع كثيرة اشد من زوج بنتك وبعد مانضج وشاف اعيالة تسنع.

إضاءة!!
الرجال اللي يتشكى مافيه خير ولاهو برجال والمفروض مايعامل معاملة الرجال.

والشاعر يقول
مايشكي من الوقت رجال .. أنا أعرف أرجالن شكى الوقت منها.

فلا تعطونة اكبر من حجمة وهو صغير وورع ، عالجوا المشكلة ولاتكبرونها وبسطوها تراهم اصغار.

وموفقين يارب العالمين.

__________________
استغفر الله واتوب إليه