اختي الكريمه ، أنا في المرحله الجامعيه الآن والأغلب على طبعي الصمت أو العزله ، لكن كثير من الأحيان أنزعج من عزلتي ، فاتقرب لبعض الزملاء في الكليه ولابد اني اتقرب ، لكن ما بيني وبينهم علاقه قويه ، يعني بعضهم كونت معهم صداقات وطلعت معهم كم مره خارج الجامعه ، إذا كنتي تريدين تكوين علاقات مع بنات الجامعه انصحك بأن تكونين علاقات مع بنات خارج القسم يعني مثلاً ادخلي على اي وحده تشوفينها من البنات بحجة انك تبين تستفسرين عن شيء وبعدها اسأليها مثلاً انتي من اي قسم وفي اي مستوى وعرفيها بنفسك انا في التخصص الفلاني والمستوى الفلاني مثلاً واقترحي عليها انكم تفطرون مع بعض او تاخذين رقمها وتتواصلين معاها ،

اما البنات اللي يتهزون فيك او يحقدون عليك فهذا طبيعي لان أكثر الطلاب والطالبات في الجامعات يحقدون على المجتهد او المجتهده بشكل أو آخر ، اعتقد نظامكم انتم يا البنات في الجامعات (قروبات) يعني كل مجموعة بنات يكونون مع بعض ينزلون مواد مع بعض ، انتي حاولي تبدأين بالحديث مع اي وحده ولا تستحين من اي شيء عادي ادخلي معها كيف حالك وش مسويه في هالماده وكيف الدكتوره ووش سويتي في البحث والاختبار ومن هالكلام إلى أن تاخذين رقمها وتصيرين تسالين عنها وتحرضين على التواصل معها إلى ان تطيح الميانه وبعدين انتي وهي تبحثون بعد عن صديقه ثالثه مثلاً وتكونون قروب ،

على فكره انا مثلك كنت احاول ادخل في الشباب لكني اجد منهم تطنيش وبالنسبه لي اتحادث مع شخص واحد او اثنين بالكثير اريح وافضل من اني اتحادث مع مجموعه لان طبعي عاقل شوي والشباب مهابي نوعاً ما إلى ، الآن لي ثلاث سنوات في الجامعه وطبيعتي في الجامعه ادخل والم على الشباب في القاعه احاول اجلس جنب احد اعرفه كان معاي في ماده سابقه مثلاً وادخل معه في حديث ، او اجلس ويكون جنبي احد ما اعرفه ولا يعرفني اخش عليه كيف الحال في اي مستوى انت ان شاء الله امورك طيبه في الدراسه ومن هالكلام والكلمه تجر الكلمه ، انصحك تكونين مبتسمه وتحاولين تمزحين مزح خفيف ، حاولي تدخلين في نشاطات الكليه وتكونين نشيطه معاهم ، حاولي تدخلين مع اي بنت وتطيحين الميانه من اول مره وتسوين نفسك انك من زمان تعرفينها ، بس انتي حاولي انك مثلاً تبحثين عن البنات اللي يجلسون لحالهم وادخلي معاهم

على فكره انا احب افطر لحالي في الجامعه زي ما قالت مسترجله واجلس على النت او اروح انام في السياره او اذا كان وقت الضحى اتوضأ واروح اصلي صلاة الضحى ما تيسر لي من الركعات واحاول اجلس احفظ لي كم آيه من القرآن

بعد انصحك انك تدربين نفسك على الكلام مع البنات والمحاوره وتعرفين طبيعة البنات وطبيعة سوالفهم عشان تعرفين تدخلين معاهم ، اما مسألة انك ماتعرفين كيف تردين عليهم ، لا يااختي الكريمةردي وحاولي تردين باسلوب جميل مثلاً اذا قالت لك (انتي فلانه تجيبين هالدرجه) قولي ايه الحمدلله قولي ماشاء الله ، وإذا أحد استهزئ بطريقة كلامك اعطيها نظره واسكتي مثلاً او ردي عليها قولي الحمدلله وش حلاة كلامي مثلاً

بس ودي اسألك سؤال عندك علاقات مع بنات خارج الجامعه ؟ قريباتك بنات عمك بنات خالاتك صديقات قديمات ؟؟


الله يوفقك اختي وييسر أمرك

__________________
استغفر الله الذي لا إله إلا هو الحي القيوم وأتوب إليه