السلام عليكم ورحمة الله وبركاته


اخواني رجل الرجال والبليغ

انااا اواجه مشكله وابا ارائكم ونصايحكم في الموضوع والله في حيره من امري استخرت واستشرت اهلي بس بعد في حيره من امري

من فتره عرضت مشكلتي في قسم المقبلين على الزواج بس الحين الموضوع على المحك واهلي ينتظرون قراري قريبا جداا

اللي خاطب عندنا عمره 28 ... من اكثر من 5 سنين اجته حالة اكتئاب مايخرج من البيت ابدا لمدة سنتين ومن بعدها اهله حااولوا يعالجونه والحين يعالج في مستشفى نفسي ياخذ حبوب اكتئاب ( وعلى كلام الدكنور انه ياخذ ربع حبه لمدة شهرين وحتمال خلاص تكون اخر جرعه )
قبل الصوره ماكانت واضحه اللي يقول انفصام واللي يقول عين واللي يقول سحر بس اخوه ماشاء الله حافظ القران واكد لنا ان اخوه يشرب حبوب وقال لناا عن مكان المستشفى واسم طبيبه

اليوم اناا وابوي وامي رحنا المستشفى وقابلت الدكتور وسئلت عن الولد وطلبنا يفتح لنا الملف وقال لنا الولد فيه حالة اكتئاب وخوف من المجتمع . قال مشكلته مش كبيره نفس الحالات الاخره

اناا ابا اعرف هل اللي عندهم اكتئاب ياثر على حياتنا مستقبيلا يعني من ناحية تربية العيال ( ياثر ولا ماله دخل) اللي فيهم هذا المرض صعب التعايش معاهم ولا لا ؟؟؟ يعني تعاملنا معاهم غير عن الناس الطبيعيه نصيحتكم لي بشكل عاام اذا وافقت عليه كيف اتعامل معاه فترة الملكه و بعد الزواج ...


جزاكم الله كل خير

آمل فعل ما يلي:
1) أسألتك –بارك الله فيك- يجب أن توجه للطبيب المعالج لحالته فهو الأدرى بتشخيص الحالة وعلاجها.. ولا بأس أن تسأليه بكل ما يدور في خاطرك.
2) أما مسألة الموافقة من عدمها فهذه ترجع إليك لكن يجب أن تكون بعد وضوح الصورة تماماً من الطبيب المعالج.
3) يمكنك بعد عمل فقرة "2" من استشارة طبيب آخر.
4) عندها احسبي أمرك جيداً.. ثم استخيري.
5) لكن لا بد من تطبيق الخطوة رقم "1" ورقم "3" فوراً.
6) اسألي ربك بهذا الدعاء "اللهم إن كان هذا الرجل خير لي في ديني ومعاشي وعاقبة أمري وعاجله وآجله فزوجني إياه، واجعلنا قرة عين لبعضنا البعض.. وإن كان شراً لي في ديني ومعاشي وعاقبة أمري وعاجله وآجله فاصرفه عني وصرفني عني".

ابنتي الكريمة :
الاكتئاب عرض لمرض والمرض لم يتضح من كلامك عما قاله الطبيب المعالج وزواجه في هذه الحالة يحمله مسؤولية هو غير مهيأ لها وقد تسبب له أو لك أموراً أنتما في غنى عنها وكما قال أخي الكريم البليغ في الفقرة 1 و2 من كلامه وهل سألتي الطبيب
1- ما هو مرضه المسبب للإكتئاب
2- هل الزواج في الوقت الحاضر مناسب له منك أو من غيرك أو يسبب له مضاعفات أو يكون علاجاً له وعلى مسؤولية الطبيب قرري بعد الاستخارة كما قال أخي الكريم.
لا تجعلي الخوف من عدوم وجود الخاطب البديل أو القرابة أو أي سبب دافعا للزواج بل اعتمدي بعد الله على غير قناعتك بأنه مناسب لك
أسيأل الله لك وله الخيرة من أمركما .

__________________

لتوفير الجهد والوقت للجميع :
1- كتابة الوقائع ثم المشاعر ثم المطلوب.
2- ما أقوم به هو التعامل مع عقل صاحب أو صاحبة المشكلة وشخصيتهما ونظرتهما للحياة لترقيتها للأفضل بإذن الله على ضوء ما يكتبان هنا.
3- لا بد أن تكون لدى صاحبة أو صاحبة الموضوع الرغبة في القبول بالنصح والرغبة في التغيير لا طلب الدوران معه على محور شكواه والبكاء معه.
4- لا يمكن بعد الله أن أعدل من ظروف الكاتب أو من شخصيات أطراف العلاقة في مشكلته إلا بتواصلهم معي هنا شخصياً.

السلام عليكم ورحمة الله وبركاته


جزاكم الله كل خير ابوي البليغ ورجل الرجال وانااا اسفه لتاخر بالرد ...انشغلت بعرس اختي والانترنت كان مقطوع

روحتى للدكتور كانت بعد الحاح كبير على ابوي وروحتي للدكتور مره ثانيه شبه مستحيله من ابوي يقول كلام الدكتور واضح ومايحتاج الذهاب مره ثانيه
اللي تقدم لي كان معارض للذهاب للدكتور فاخوه اللي اكبر منه فتح له ملف باسمه والدكنور نفسه مايعرف شو سبب الاكتئاب بس يعرف ان الرجال فيه اكتائب من وصف اخوه الكبير لحالته اخوه في البيت وانه يحتاج حبوب

للامانه انا واجهة ضغط من اهلي خوفوني هذه يمكن يكون نصيبك ويمكن تاخذين رجال ثاني ويسير له حادث ويمكن ينعاق فكله واحد اما هذا الرجال اهله طيبين واذا راح للغلط او سبب لك مشاكل لا سمح الله الاهل لهم دور كبير في مراجعته وبعد اخوه الكبير حافظ القران يعني مابيكذب علينا في اخوه قال لنا الصدق وان اخوه لو مش حق زواج مابخطب له عندكم واختي الكبيره بعد قالت لي انتي متكبره وتبين صفاة من صفاة وربي الحين يختبرك يمكن لو فوتي هذا الرجال ماياجي لك واحد ثاني كعقاب لان البنات في هذا الزمن يتمنون اي حد يخطبهم بس محد ياجي لهم ...واخواني الكبار ساكتين عن الموضوع لانهم يحسون ان ابوي وامي يبون الرجال واذا عارضوهم بيزعلون منهم فقالوا لي نحن بنوقف معاك بس في حالة رفضك لانا مستحيل نخليك تتزوجين واحد ماتبينه وانا مابا اتم بدون زواج واعنس فحترت كثير .............

اهلي عطيتهم الموافقه بس اجلو الموضوع لبعد عرس اختي وعرس اختي تم من اسبوع فالحين الخوف رجع وصرت افكر بالموضوع طول الوقت اكلم ابوي وامي انهم خلاص يرفضون ولا اتوكل على الله واتزوح واللي يسير حياه الله

1) أتفهم وجهة نظر أهلك تماماً.
2) بما أنك أعطيت الموافقة فاسألي ربك دوماً بهذا الدعاء "اللهم إن كان هذا الرجل خير لي في ديني ومعاشي وعاقبة أمري وعاجله وآجله فزوجني إياه، واجعلنا قرة عين لبعضنا البعض.. وإن كان شراً لي في ديني ومعاشي وعاقبة أمري وعاجله وآجله فاصرفه عني وصرفني عني"..
3) ما زال الخيار مفتوحاً لك بالرفض أو الموافقة.. وما زالت فرصة التفكير سانحة أمامك.

جزاكم الله خير ...

فترة الخطبه طولت كثير لها تقريبا نص سنه او اكثر ... واهلي يحاولون بكل الطرق اني اوافق طبعا جتهم الموافقه بعد مارحنا للدكتور ( موافقه مع شوي تخويف ) وكنت اتوقع ابوي بيرد على الرجال بسرعه بما انا طولنا في الرد فسئلت امي قالت ابوك شكله خايف ومتردد وللحين مارد فعندي مجال اني اتراجع لان ابوي ماتكلم بس لو تكلم بيكون الوضع صعب جدا

ابوي رجل الرجال الدكتور تكلم معاي بشكل عام عن الاكتئاب قال لانه ماشاف المريض بنفسه بس يقرا ملفه المرضي ... قال مرض الاكتئاب يصيب 10% من الناس في العالم .. وبعد قال ماقدر احدد لك اذا الرجال بيتعالج 100% ولا لا بس اللي مكتوب عندي انه يستخدم جرعه بسيطه وانه فتره ويخلص علاج بس انا مش رب العباد بقول لك مابيرجع يمكن يرجع ويمكن لا .... وبعد ااضاف وقال لو مرض خطير نفس الجنون او الانفصام بحذرك منه ( وبعد ذكر لي ان الرجال يعالج من فتره شبه طويله من سنة 2010 يعني تقريبا 3 سنين )

السلام عليكم ورحمة الله وبركاته


ابوي البيلغ ورجل الرجال .... عندي بعض الاسئله محيرتني وماادري اذا تفكيري مبالغ فيه ولا لا ؟

الرجال يوم امه تخطب له في البدايه عادي تقول نحن خايفين ترفضونا ؟ لان ام الرجال يوم خطبت لولدها كلمة امي بالتلفون عن الموضوع وقالت انا خايفه ترفضون ولدي وغابت مدة سنه ثم ردت واتصلت وقالت نفس الككلام بس امي قالت نحن مابنردكم لو الولد ماطلع عنده شي عقب خطبوا رسمي

والشي الثاني الخاطب مادخل بيتنا الا يوم الخطبه ... مازاارنا في العياد وحتى عرس اختي الي كان من اسبوعين ماحضره ... هل هذا الشي طبيعي ولا ؟


جزاكم الله خير

السلام عليكم ورحمة الله وبركاته


ابوي البيلغ ورجل الرجال صدق منحرجه منكم بس ماعرف اذا بتقدرون توجهوني وتنصحوني ولا مشغولين لان وضعي بدء يتعقد اكثر عن قبل وبديت احتار اكثر ... وانا ماحطيت موضوعي في قسم المقبلين على زواج لاني الاعضاء ماشاء الله يبون الخير بس المشكله كل واحد رايه يختلف عن الثاني بس اذاا ماشي مجال هنا بحط موضوعي هناك ...



اخر تطورات الموضوع ....

طلبت اجتماع مع اهل البيت اللي هم ابوي وامي واخواني الكبار ... ابوي قال فالك طيب اليوم بنسوي الاجتماع وهالكلام من خمس ايام ... وكل يوم ياجل ماعرف يتهرب ولا صدق مشغول ... واحد من اخواني اتصل علي وقال بكلمك بالموضوع قلت له ابا اجتماع قال الاجتماعات فاشله ومامنها فايده عقب قااال ياختي ترا الولد ماضمنه لك بس " مظهرين " الولد رجال وطيب هذا من كلااام ربعي يسوق ويشتغل ويجلس مع الرجال عقب قلت له اي انسان بيسوق وبيشتغل ويجلس مع الرجال وبيقهويهم تم يقول اناا ماعاشرته عشان اضمنه بس كلام ربعي .. عقب انقطع الخط واتصل مره ثانيه قال خلاص بنتكلم في الاجنماع

الحين الصبح امي فتحت الموضوع قال يلا شو ردك قلت لهاا وين الاجتماع ؟؟ قال اي اجتماع قلت لهاا ابا كلمة الكل في المجلس قال الكل عطاك كلمته عقب قلت لابوي ترضاه لي يقول انا ماضمنه قلت لها محد يضمن حد انت ماتضمني له بس ابا اعرف ترضاه ولا لا يقول انا قلت لك رايي وعقب قالوا شو تبين بالضبط قلت كلمة الكل قالو كلنا تكلمنا الا اخوك الكبير واخوك الكبير يقول انا مابقول لكم لا تزوجونها او زوجوها عقب قلت محد بيجبرني بس ابا اعرف رايكم في الرجال هو يرضاه ولا لا عقب ابوي عصب وقال اخوك يقول انا مابرضاه لبنتي وهذا تفكيري بس انتوا كيفكم هذي بنتكم وامي بعد عصبت قالت خلاص سمعتي كلمة اخوك خلاص يلا ارفضي وقولي فلان قال ماراضاه عقب قلت ابا اجتماع من الكل


الحين صح قلت ابا اجتماع بس تقريبا الموضوع وااضح الكل عطاني رايه ابوي للحين احس انه متتردد امي احسها تباااااه بقو واخوي الكبير مااايباه واللي بعده يقول راي ربعه في الموضوع وهو ماله دخل ...اخواتي قالو شوفي الرجال نحن مانقدر نعطي راينا


ماعرف الحين شو اسوي احتر


جزاكم الله خير

جزاكم الله خير ... ابا مشورتكم ونصحكم