نور الايمان ..

صارت مستجدات و طبقت شوية من نصايحك ..

أختي الكريمة روح الطير

مع أني عندي كلام بس أخاف تزعلي منه

لذلك أكتفي أن أدعي لك

بأن ييسر الله لكِ حياتك ويسعدك ويكتب لكِ الخير والتوفيق والسداد

بارك الله فيك

__________________

- صارت مناقشة مني له ، و بعدين افتكرت كلامك ..
إنه طفشان من كلام أهله ، و ما راح يتأثر بالكلام ..

المهم ، اني طلعت اللي بقلبي ..


*******************************


- دقيت على مركز مطمئنة .. و طلبت احجز ..
( ما استنيت موافقة زوجي ، لإنه رافض ،، بس بأحطه أمام الأمر الواقع وقتها )

قالولي ، الدكتور مضغوط و عنده دورات برة السعودية ..
و ما تقدري تحجزي ( حضور ) .. غير بعد ستة أشهر ..

قلت لها تحجز لي ، و أخدت بياناتي و رقم جوالي ..
و قالت بعد ستة أشهر الموعد ، و احتمال الدكتور يفضى مثلا بعد شهر أو شهرين ..
هو بيتصل علي قالت .. و يقول لي أجي ..

قلت لها ، بيجي زوجي معاي ، لازم تاخدوا بياناته ؟
قالت مو لازم خلاص تكفي بياناتك و يجي معاك ..


**********************************************


جلست فكرت مع نفسي و سويت الشيئين هذولا ..

لحظة عشان لا يفصل النت

قبل رمضان ، كان زوجي بيمر بضائقة مادية .. مثل ما يمر بالفترة هذه ..
و رفضت أسامحه بسبب اهماله لعمله وقتها و استهتاراته ،.

و عاقبته بإني طلبت يجيب لي شغالة و يسدد مخالفاته ( بأي طريقة ) ..
و كنت أبغى أسافر ( كنت مخنوقة بسبب موت أمي و المواقف الي حصلت )
و كنت ماقدر عشان ممنوع هو يجدد جواز سفره و عليه مخالفات ..

و وقتها تحملت إيجار البيت و تكاليف أخرى .. فما رضيت أسدد عنه مخالفاته
اللي تزيد كل مالها و ما يتعلم من أخطائه ..

فتفاجأت بعد فترة ، يقول لي ( راح أجيب لك شغالة )
أسأله كيف ؟
يقول راح أسدد المخالفات و أجيب لك الشغالة و أحل كل المشاكل ..
و لما أسأله كيف ؟
يقول لي ( مالك دخل كيف ،، بس راح أحل المشكلة قريب و يرفض يقول )

.
.

بعدين في شوال لما اكتشفت الموضوع ،،
لقيت إنه كان مخطط يسرق منها 15 ألف ريال ..

( ما أعرف إيش أفسر .. تصرفه ؟ )

.
.

************************************************** ****


المهم ..

طلب مني أدعي له ، إنه ربي يساعده يلاقي وظيفة ..

.
.

قلت له ..


خذ دورة ستة أشهر ، دبلوم حاسب أو ادارة أعمال ، أو سكرتارية ..
و تعال قدم بالجامعة .. و بتلاقي وظيفة ..

* المشكلة بأشوفه يقدم بالوظايف و بالوسيلة و والوسيط و يتصل عليهم قدامي ..
و يرسل لهم السيرة الذاتية و يروح للمقابلات .. بس ما يرجعوا يتصلوا عليه ..

قلت له ، معليه .. لازم تاخد دورة .. و الترم الجاي تبدأ تسجل انتساب ..

.
.

و قلت ضيعت الإنتساب الترم هذا و لحد ما انتهى التسجيل ..

سكت و بعدين قال ..
المشكلة ، إنك تقولي لي ( أنا ادفع لك انتساب )
( أنا ادفع لك للدورة ) ( أنا أدفع تصلح سيارتك ) ..

و بعدين ما أشوف شي .. كأنه بس تسكتيني بالكلام ..


أقول له ، طيب بأقول لك .. روح أسأل عن الإنتساب ..
أنا أروح كمان و أسأل ؟

أسأل و جيب الأوراق و تحرك و تشوفني كيف ..

.
.

الصراحة مرررررة وحدة ..

جاني بدل ( مكافئة بقيمة 3 الاف ) ..
و قلت له ( بأعطيك ألف ) .. و عشمته و طنشته
<---- هذه كانت حركة مقصودة مني .. وقت طنشته ..
كنت أبغاه يحس لما يوعد و يطنش و يعشمني على شي و يقول نسيت ..

بس البقية ، هو ما بيتحرك و لا يروح يسأل ..

.
.

المهم ..

بعد ساعتين كنت فاتحة اللاب توب ، و قلت له ( تبغاني أدور لك على دورة تسجل فيها ؟ )
سألني دورة إيش ؟

قلت له أي شي ..

قال لي طيب ، شوفي لي ..

و اتفقت معاه ، خلال الست أشهر .. لو درست بالمعهد و أخد الدبلوم ..
راح أتكلف أنا بمصاريف البيت و مصاريفه ( مو استهتاراته ) ..
بس برضو يشتغل بأوقات الفراغ و يتحرك و يدور ..

.
.

راجعة ..

عشان سلك النت ، كل شوية ولدي الصغير يفصله و يشرد ..

كنت أفكر اعمل أشياء كثيرة .. تخلي الضغط عنده يرتفع و السكر ..

طبعا هو زعلان عشان جواله ، و جالس بدون جوال ..
و أنا طنشته فترة .. و عصب و قال قسما بالله لو رجعتي الجوال ماني ماخدة و كان بيطلع من البيت يروح الشغل
و أصحابه لما يبغوه ، يدقوا على جوالي و أعطيه و لا هو يدق عليهم ..


.
.

بس بعدين ( عشان ربنا ) .. و قلت بأعامله ( بطريقة روح الطير ) بالتعامل مع مشاكلها دائماً ..
و افتكرت كلام ( نور الإيمان ) بإحتساب الأجر وووو إلخ .. ( زي ما كنت زمان أول ما تزوجت )

.
.

رحت رجعت له جواله ،، و سلمت على راسه ..
و قلت له :

إنت تغلط علي .. لإنك متأكد إني كل مرة أرجع أسامح و صرت تستهين بيا .. و ترى أقدر أعمل أشياء كثيرة ..
بس لإني إلى الآن ( شاريتك ) .. و أنا خلاص ما أبغى منك شي ..

ما راح أخليك تحتاج لأحد و كل شوية تدق من جوالات أصحابك .. خذ جوالك و خليه معاك ..
أصحابك دقوا على جوالي كم مرة و ارسلوا كول مي .. كلمهم ..
( عشان واحد بيمر عليه و يوصله العمل بسيارته )

ما راح نخسر بعض عشان جوال ، و عشان فلوس ..
( و هو يدري إني زعلانة بسبب طريقته و سرقته ، مو علشان الفلوس )

و قلت له .. ( و ماقدرت أتحمل ، الدموع تنزل من عيوني زي الشلال )
أنا ربي اللي بيرجع لي حقي ، مو بالجوال .. هو اللي شايف كل شي و حاسس بيا ..
أنا ما أبغى منك شي .. و إنت كل مرة تغلط علي ..

يمكن ربي يبغى يعطيني مكان في الجنة ؟
خلاص ما أبغى منك شي ..

.
.

أتأثر و عيونه دمعت و حاول يخبي عشان لا يبين ضعفه قدامي ..
أعرف إنه تأثر ( لما أنفه يحمر و يتنفس بسرعة ) ..


*************************************************



أنا طبعا رافضة ادفع قرش واحد في السيارة اللي استأجرها ..
لإنه استأجر السيارة في شعبان .. و في رمضان ( وصل الحـ ... ة هذيك )
صح مرة وحدة ، لما عمل حاله سواق تاكسي ..
و مرة تانية لما عزم بالمطعم .. بس برضو ..

فالحكاية ( حكاية شي نفسي ) ..

.
.

يعني مثلا ..

زوجي مثلا يشتري لي أي شي أو يدفع لي قيمة أي شي ..
و أروح اتعرف على رجال غريب ، و أخليه يستخدم الشي اللي بيدفع زوجي عليه ؟

هذا إيش اسمه ؟؟؟

و نفس الشي بالنسبة للسيارة ..

لو إيش ما صار ..
ما راح أدفع ريال .. و لا هللة عالسيارة اللي استأجرها و مشي بها أشهر ،،
و قلت له السبب ، و اتفهم أسبابي ..

.
.


خلي الكل يقول عني هبلة ، بس خلاص ( أبغى اللي عند ربنا ) ..
و أنا كل شي حكيته لربنا ، كل شي يضايقني فيه ( اشتكيت لربنا ) ..

لإني استخرت ربنا وقت رضيت اتزوج ، و ربنا اختاره لي ..
خلاص ( ربي هو مدبر الأمور و يعرف لي الخير فين و ما راح يضيعني )

قررت أعطيه كل بعد يومين ( 100 ريال ) .. يدبر فيها مصاريفه من بنزين و حلاق و شحن جوال ..
و لا إنه يجلس بدون ( و لا .. ريال ) ..

يعني بالشهر 1500 ..

و هو ما يعرف يدبر الأمور المالية .. فما أعطيه كاش ..

حتى مرة كانت معاه 4000 ريال جزء من إيجار البيت
و قال لي خليها معاك ( عشان راح أصرفها لو جلست معاي )

.
.

( بغض النظر عن موضوع السرقة ، فهو توقف عن السهر و نفذ وعده )

.
.

نور الإيمان ..

نفذت نصايحك ..

و نيتي عشان ربنا ( ثم عشان الأولاد ) ..
و ربي ما راح يخيبني ..


و ما تصرفت كذا ضعف أو عدم قدرة ..
أخواني يستنوا فرصة مني ، إني أقول لهم يتدخلوا .. و ما راح يقصروا ..
و هو يعرف أخواني كيف .. بس ما رضيتها لأبو أولادي ..

أختي الكبيرة ( تقول ، لازم الحل تخلي أخوك يجي يضربه )
قلت لها ( مجنونة إنت ؟ فين نحن ؟ في الشارع ؟ و لا إيش ؟؟؟؟ )

لإنه هي الوسيط بيني و بين أخوي ، لإنها تتحمل عصبيتهم ..
و أنا ما أتحمل ..

بس هديت الموضوع معاها ، و كذبت عليها و قلت لها كذا و كذا و سوء فهم ووو إلخ

.
.


بس غلطة أخيرة منه ..

بتكون النهاية ..

جلس يومين برة ، عشانه فهم كلامي غلط ..

لما قلت له ( ترجع الفلوس قبل الفجر ) ..
قال لي ( ما أرجع البيت غير بعد ما أدبر الفلوس )

أحسبه بيدبره في الظهر أو العصر مثلا ..

و لما شافني سكتت ،، حسب إني وافقت إنه يجلس برة لحد ما يدبر المبلغ ..

كان يروح بيت أهله يجلس ساعة بعد ما يخلص الشغل، و يخرج من عندهم و ياخد مفتاح سيارة أخوه ..
و ينام في داخل السيارة لحد الفجر ..

رجع البيت ، جورابه ( الله يعزكم ) مرة عفنت و جسمه مرهق ..
و تركته ينام ..

قلت له ( و لا يهمك تغيب يومين عن أولادك و بيتك ؟ )
قال لي ( ماشاء الله عليك .. عن مية رجال )

قلت له ( لا تقول كذا .. تضايقني )
قال ( إنت طلبتي مني اجلس برة ، لما قلت ما أرجع البيت لحد ما أدبر الفلوس )

(( قلت على بالي نفس اليوم ))

قال ( هذا بيتك مو بيتي )

قلت له
( هذا بيتك إنت )

و بعدين سألته
( يعني لو اشتريت بيت ، كل ما زعلت تخرج و تقول بيتك ؟ )

قال
( لا .. بس إنت رضيتي إني اجلس برة و ما قلتي شي )

بعدين قلت له ( و أول مرة أقولها له )
( ترى حطّ في بالك .. إنه مافي فكّة مني .. و لا في فكّة منك .. كذا ربي كاتبنا لبعض ..
و دام فيه 3 دحين .. يعني مافي فكّة مني )

انبسط و تغيرت ملامح وجهه ..
( و قال أخيراً اقتنعتي ؟ )

و كل مرة يرددها لي و هو مبسوط ..
( خلاص اقتنعتي مافي فكّة )

.
.


المهم ، يومين غابهم .. و بدأ ينتكس ..
بدأ يهمل صلاته ،.

أصحيه لصلاة العصر ، مو راضي يقوم .. في الأخير رضي يقوم ..
و رجع يرقد في الصالة قدام التلفزيون .. و متسدح ..
قومته بعد أذان المغرب بساعة .. يقول لي ( صليت ) و رجع نام ..

قلت له ( ما صليت )

قال لي ( إلا .. لما قمتي تتكلمي بالجوال ) و لسى مغمض عيونه ما يبغى يقوم ..

قلت له ( لا ترجع تعمل زي كذا .. لو أنا ماني فيه ، يعني ما حتصلي من حالك ؟
مافي شي بداخلك يقول لك قوم صلي ؟ خلاص لاحق عالنوم .. قوم صلي )

.
.

تركته و رحت ، شفته قام من ورايا و صلى ..

.
.


لما رميت كل شي على ربنا ( ارتاحت نفسي ) ..

نسيت أقول شي ..

وعدته إني أبدا ما أقول ( إني صرفت في كذا ) ..

.
.

نور الإيمان ..

كذا تمام ؟؟؟

المهم تكوني انتِ مقتنعة بما قمتي به عن رضا داخلي وقناعة ، تم وضع الخيارات امامك وانتي اخترتي ، لا يُنكر عاقل انك بنت اصل وبمية راجل مثل ما قال زوجك ، مشكلة زوجك صرتي تعرفي رأيي فيها تماماً ، الحزم والشدة مطلوبين مع زوجك سددي وقاربي وعرفتي الشيئين اللي اعترضت عليهم ذكر انك تعطيه وذكر عيوبه ، وطالما احتسبتي اجرك عند الله فهذا الاساس ، سألتيني كده تمام ؟ ان شاء الله تتحصلي على موعد مع المركز في اقرب وقت وبعدها راح اقول كده تمام ، ومن الان لوقتها انتي اخترتي ما يناسب حياتك وان شاء الله ربي يرزقك على قدر نيتك في حياة مرتاحة ومستقرة ويهدي زوجك لما يحبه ويرضاه