السلام عليكم ورحمة الله


ادري ان العنوان مريع ولكن للاسف هذي الحقيقه

انا متزوجه من 17 سنه اكبر اولادي عمره 16 ..حياتي كانت تعيسه عشت مع زوج عصبي يعاني من الوسواس والشك..
عادي جدا يمر شهر مايبتسم او يقول كلمه زينه لي او لعياله فصرت انا بعد اعامله بالمثل بالذات اني تزوجته مغصوبه

مرت السنين عايشين جو متوتر مشحون الكل شتيل بقلبه على الثاني حتى لو مافي سبب واضح!

ماتذكر مره رد علي السلام بنفس حلوه ولا حتى قال صباح الخير ولو ابداها ممكن مايرد او يرد بدون نفس

ولامره طلعنا واهو يبتسم كله معصب ومبوز ويسب بالشارع ويشتم ويبي يتهاوش مع الكل. .. البقاله .. جرسون المطعم .. الهندي المسكين اللي يشغل الالعاب .. الى ان نوصل للبيت العيال كرهوا يطلعون معاه صرت اطلع للصغار مو حبا بالطلعه معاه

لكن يكسرون خاطري من حكرة البيت وجو النكد اللي ابوهم معيشنا فيه ..

حتى جيراننا من اول ماسكننا في بيتنا الجديد خلق معاهم مشكله بدون سبب واضح

ليه كل يوم عندهم سياارات وزحمه ؟؟ كيفهم يابن الحلال بتتحكم بالخلق بعد !

عيالي الكبار الحين صاروا رجاجيل 16 و14 دايم يخوفهم من اشارع وحابسهم وقافل كل ابواب البيت بمية قفل لو بيده كان حتى الشبابيك الغاها

ولما طلعوا غصب عنه مع عيال عمهم يوقف بالشارع ينطرهم لين يرجعون عااادي يوقف اربع او خمس ساعات ينطر

وهو يودع طبعا وهو اللي يستقبل علشان يضمن الباب انقفل زين وبين كل عشر دقايق يتصل عليهم ومسجات لين طفشووو

وصارو ينحرجون يطلعون مع احد بسبب مضايقات ابوهم لهم

وان حصل وجوني زوار اهلي مثلا يظل قاعد على حافة الصاله لو انه تعبااان او مييت او مريض عااااادي يقعد ينتظر لين يروحون
ويقفل الباب ويرتاح ولازم يراقب عيالهم ويراقبني لاصعدت هااا راحووا ؟؟

مايحتاج اقولكم اني بطلت ستقبل احد فبيتي بسببه

شخصيه نكديه من الدرجه الاولى مهما كتبت فيه ماراح اوفي حقه وهذي ابسط صوره انقلها لكم علشان تتعرفون على هالانسان الغير طبيعي طبعا ماقلت لكم عن معاملته السيئه لامه وخواته هذا يبيله موضوع ثاني

لب الموضوع ان عيالي كبروا مو نفس قبل ارقع لابوهم واقولهم مايقصد وهذا عاادي كل الابهات جذي لاا

صاروا يكرهونه بمعنى الكره ويتمنون له الموت .. اقسم بالله يتمنون له الموت يقولون لو حياتنا بدونه اكيد بتكون احلى

ودايم يلوموني اني ليه تزوجته وليه جبتهم على الدنيا دام هذا ابوهم ؟ وانا ماباليد حيله اول كتت اتنازل واسكت على مغثته علشانهم الحين هم اللي مقررين وخالصين وكل مره يطلبون مني اتركه علشانهم لانهم تعبوا وراح يتعقدون

مافي شي يخليهم يحبونه ولاااشي ولاتقولون ابالغ ..

والقهر انه يدري اننا مانبيه لا انا ولا عياله وعااادي كنه العيد ولا احساس ولا مشاعر ثلووووج ولايهتز لا لدمعه ولا لكلمه

اللي ابيه منكم يااخواني شووركم شنو اسوي. .. انا الحمدلله في دوله تحفظ حقوق المراه وتقدرها

وعن نفسي اهم شي وبالدرجه الاولى عيالي وبس ماهمني لازوج ولا اهل حتى لان محد اهتم فيني عشان اهتم له

ووجود زوجي بحياتنا مجرد حاجه مو اكثر ..

انا خايفه على عيالي وماني عارفه شسوي

موضوعي مو مرتب وافكاري ملخبطه اخذت يوزر صديقه وفتحت النت وكتبت بدون تفكير بس محتاجه شور حكيم يدلني على الصح

مابقى بالعمر اكثر عشان اصبر... ابي حل ؟

اللي فهمته من موضوعك هو أنك تزوجتيه مغصوبه وهو عارف هذا ... انتي تكرهينه وأولادك كمان وهو عارف هذا
وتتوقعي منه تكون نفسيته مرتاحه ؟ ويكون معاكم حباب وحنون ؟؟؟ وما يكون موسوس وخايف ولازم يتأكد من قفل الأبواب ؟؟

وكأنك بختام الموضوع متخذه قرار الطلاق وتنتظري من يأيدك فيه

عندك عيال غير الاثنين اللي تكلمتي عنهم ؟
عندك مصدر رزق يكفي أطفالكم ويكفيك لو تطلقتي ؟

__________________

اختي انا مغصوبه وهو عارف واجبرني على العيشه معاه ولا حاول يحببني فيه لان هذا طبعه من قبل لا اعرفه والله لايسامحاللي كان السبب .. فبرايج شلون الوضع راح يكون ؟ هو غلطان والا تشوفينه معاه حق ؟
يستاهل كرهي لانه اجبرني اعيش معاه والا لا ؟؟ هذا امر انتهى من سنين

وعيالي مخلوقين عالفطره ماانخلقوا على كرههم لابوهم الا بسبب تصرفاته الطفل يجي بالكلمه الزينه والمعامله الطيب مو العكس

والوسواس حبيبتي من يومه وهو هذا طبعه كان مجنن خواته فلا تحطين اللوم علينا عزيزتي

وقرار الطلاق اي والله اتمناه من سنين بس لاني مو لحالي وبرقبتي خمسه خايفه من بكرا والا لو لحالي كان تغير الوضع

ومصدر الرزق موجود والحمدلله واخر شي افكر فيه لكن خايفه من عيالي وعليهم ومحتاره

عزيزتي فكري الف مره قبل لاتكتبين لي رد متى يوصل الابن والابنه لمرحلة يتمنى عدم وجود ابوه بحياته ؟؟

ابوي ياما هزأنا وضربنا وهاوشنا ونمووووت عليه ولا مره كرهناه ونفقده كل دقيقه لانه مورينا حبه لنا وحنيته

مو لان امي ميييته عليه وهايمه فيه بالعكس كانت دايم تتهاوش معاه لكن مورينا جانب ثاني جانب ابوي غييييير وفاصل بيننا وبين مشاكله مع امي

يكفي انه اب طبيعي

وتمنيت لعيالي اب طبيعي ولكن الشكوى لله

صعب توصل لج الفكره صعب

ما دام مصدر الرزق موجود .. والأولاد أفضل لهم الحياة بدونه ... وأنتي مو بحاجته

وين المشكلة ؟؟ خايفه على أولادك من شنو ؟ هل اختفاؤه من حياتهم ممكن يكون له تأثير سلبي عليهم ؟

أعتذر منك عزيزتي اذا طريقة ردي شوي جافه ... في موضوع ثاني موترني شو وأعصابي تعبانه .. اعذريني أختي

__________________

الاولاد .. اذا غاب ابوهم ..
راح يتعبوك بالتربية ..

لا تتكلمي و تدعي على زوجك امام ابناءك ..
لانه الشي هذا راح يكرههم فيه بزيادة

هو في الاخير ابوهم ..
سواء رضيوا او ما رضيوا

لا تساعديهم عالعقوق
خليك عون لهم على كسب رضا ابوهم

حتى لو انك بتتركي زوجك

هذا ابوهم و دعائهم عليه .. عقوق
حتى لو هو مجرم او كافر لاسمح الله

واحد من اخواني لما كان مراهق .. كان ابويا يقسي عليه
و كان كذا يتذمر من ابوي و امي من حبها لاخوي .. تحزن عليه و توقف معاه

لما ابويا مات الله يرحمه و اخويا كبر
و صار يفهم بالدنيا و تزوج

صار يقول لأمي .. انت السبب في اني انا و ابويا كنا بعيدين عن بعض
ليش كنت تتدخلي بيننا ؟
و صار يقول لزوجته .. لاتسويي زي امي

.
.

ولدح ماراح يكون مثل زوجك

بيكبر و يتزوج و ينشغل بحياته
و لو تربيهم لوحدك
راح يطلعوا عيونك ..

السلام عليكم ورحمة الله وبركاته ..

ممكن أطرح بعض الأسئلة .. تهمني كثير لتشخيص حالتك ..

هل مصدر الرزق التي تتحدثين عنه ( وظيفة أم عملا تجاريا ) وهل مصدر الرزق كان قبل الزواج متوفر أم بعده وإذا كان بعد الزواج .. فبكم سنة .

للمعلومية ( أنا شخصيا وصل بي الأمر مع أبي لأبعد مما وصل لأولادك مع أبيهم ) .. والآن أسكب الدم قبل الدموع .. وأسأل الله أن يمتع أبي بالصحة والعافية ) .. وأن يرزقني بره .. ويمد عمره في طاعته ..

( زوجك يحبك ويحب أولادك ) والمصحف أمامي وأستطيع الحلفان .. لكن أنتي لا تحاولين بكفاح .. فوضعكم الحالي لا يختلف عن وضعي قبل 15 سنة ..

أتمنى تجاوبيني على ما سبق .. لأشرح لكٍ بالتفصيل الممل وضعكم الحالي ..

فليس هو شر محض وليس الخير كله أنتي .. كان الأولى أن تأتي بحسناته وسيئاته .. وليس السيئات فقط..

...

ما استشفه ان جو النكد ليس زوجك المسؤول الوحيد عنه فانت تشاركين في ذلك.
وكيف تسمحين لهم بالعقوق والدعاء على أبيهم لمجرد خوفه الشديد عليهم دورك ان تبرري لهم حبه وخوفه عليهم لا ان تسكبي البنزين على النار.
ان كرهتيه لماذا انتظرتي خمسة اطفال منه حتى تتذكري انك في دولة تحفظ حقوق المراة وأنك مكتفية ماديا.
فكري في المستقبل اذا استقللتي منزلا مع المراهقين وغدوا شبابا يريدون الخروج والسهر والسفر ولا يريدون منك متابعتهم او الاتصال للاطمئنان عليهم انتي الآن ستخرجيهم من سلطة أبيهم الضابطة أأنت قادرة على تولي زمام أمور التربية لوحدك ؟؟. فكري في مستقبل الأولاد فكري في مستقبلك واستخيري الله. رأيي الشخصي لا تجعلي أولادك حجة فانت تمقتينه من قبل ان يأتوا وان أرادو ان يلوموا أحدا فانت الملامة لانجابك هذا العدد من الأولاد من زوج كما وصفته هل من المعقولة طوال 16 سنة لم تذوقي معه طعم السعادة لم لم تتخذي وسائل منع الحمل
كتبتي وانتي غاضبة جداً. أرى ان تصدقي مع نفسك ان كرهتيه لا تجعلي الأولاد هم السبب. لنفسك عليك حق من ابسط حقوقك ان كرهتي زوجك ان تتركيه خصوصا ان وضعك المادي والاجتماعي جيد ولا تخافي الملامة وفقك الله لكل خير

عزيزتي أول شي حاولي قد ماتقدرين ماتبينين كرهج لزوجج جدام العيال
أما سالفة قفل الباب..الله يكون بعونج عليها
لازم تناقشينه وإن مافاد تخلين أحد أهلج يتكلم معاه

هو أكيد عارف إنج تقدرين تتطلقين وتاخذين حضانة العيال بعد..وهو بيظل وحيد
.فهو عارف إن المطلقة عندنا تشرشح طليقها وتاخذ ماوراه ودونه

فاستغلي هالجانب لصالحج..وبيني له إنج والعيال تبونه يتغير
ويخفف القيود الحديدية اللي مسويها عليكم غصب..خلي يعرف إن الحياة بهذي الطريقة
أبدا مو حياة طبيعية..!!

وإذا بيظل على أسلوبه..ماراح تكونين مجبورة على الصبر أكثر

بس لازم أحد من أهلج يساعدج ويتكلم معاه..
أسأل الله أن يهديه ويصلح أحوالكم..ويغيرها لأحسن حال