متابع معك أختي الكريمه
أكتبي كل ما جرى بينكما

الله يسعدك يااخوي ابيك تنصحني لان هذا الرجال بيجنني يسوي المصيبه وبيقلب الموضوع علي وينتظر اعتذار بعد

ارسلي على الساعه عشره بالليل
رجعتو
ايوه
متى
اذان العشا
اعطيتي الولد عسل
باقي
يالله خير
بغيتو شي
وش الخط الاحمر اللي بيننا
يعني الكلام الي بيني وبينك محسوب
ماني فاهمه
يعني الكلام والمزح الي يجرح ماينقال معي
طيب على أمرك

والكلام الي فيه تفهم ولا ماتفهم ما ينقال
كذا احنا متفاهمين
لا باقي
انا عندي خط احمر مثلك
وشهو
الضرب والتجريح
الضرب انا ماسك نفسي عنه من أول

اعرف ان المره الثانيه ماراح اسكت وراح تكبر
لان ابوي مااعطاني اياك عشان تضرب فيني كل ماعصبت وتخوف فيني
شوفي أنا ماضربت
مو عاجبتك بيت اهلي موجود تقدر توديني اذا مره مو طايقني
أما الضرب فماني ساكته ولاراح أسكت مثل قبل والله لايعيدها من عيشه ان كنت مهانه بهذا الشكل
أي اهانه انا الي هنتك ولا انتي تقفلين في وجهي وتقولين إهانه

يوم اشرد واقفل على نفسي الباب عشان لاتعطيني كفوف وتشد شعري
أنا وولدي
أنا ماقفلت الخط

على اكشن ولا MBC2 هذا الفيلم انتي شكلك شايفته في منامك
لاياشيخ ناسي الخبط اللي على الباب و التهديد في التلفون كأني ذابحه أمك وليتني سويت شي
الخبط اللي على الباب فوره زعل وثاني شي انا اخبط على الباب ولا فيك

لان الفيلم شفته في المرات اللي قبل وضربتني فعارفه وش راح يصير
انتي مثل اللي يذكر اليتيم البكى
لأني عارفه طريقة ضربك
وش شفتي من ضربي عشان تعرفينه؟
اللي قلته لك فوق
شد شعر وكفوف
ايوه
متى شديت شعرك وأي كفوف هوه كف واحد واعتذرنا عليه وراضيناك وش تبغين غيرها
(طبعا لااعتذر ولا راضاني وكان كفوف وشد شعر )

في أية بيت؟ هذا ولا البيت الأول
متى ضربتك في البيت الأول
وانا حامل في الصاله يوم كسرت الصحن وشقيت ثوبك
ليه انتي وش سويتي؟
قولي
قفلت الخط
يعني زي اللي الحين يعني مو أول مره يعني شفتي وش يصير اذا قفلتي الجوال وباقي يابلادي واصلي
وبتشوف وش بيصير لو زدت ضربت
أقول اذا وش بيصير انا من اول اهدي الموضوع وانتي تهددين

لاني بنفجر منك ومن تعاملك
وأنا حرام علي أنفجر ولا انتم الحساسات واحنا حديد
الا فولاذ مو بس حديد
ولا انتم اللي بشر واحنا بهايم
قلبك حجر مايلين
اسلوبك زفت مايتغير
وش عندي غير البكا؟؟
الحين انتي عارفه ان تقفيل الجوال يرفع ضغطي وتسوينها مره ثانيه
لاتدعي علي بشي أنا ماسويته؟
وانتي عارفه عواقبه وباقي ما تغيرتي
انتي قلتي بعظمه لسانك قفلت الجوال في البيت الاول
وصارت هوشه
قفلته في البيت الاول صح
وباقي تقفلينه
لكن هنا ماقفلته
وش صار هنا؟
قلتلك وش صار
اللي قلتيه انه ماقفلتيه
قلتلك تبي شي قلت لا قفلت
ذحين كلمه لا تعني قفل
والله مااحسبك بتجيني مثل الوحش كذه
يعني اقفل في وجهك اكثر من مره عشان اذا كنتي زعلانه وقلت تبين شي قلتي لا
ليش؟
قال؟ ليش ليشانتي عارفه الي يرفع ضغطي وتسوينه وتقولين ليش
ماعاد بقفل كذه ياسيدي
هذي ما فيها سيدي هذي فيها احترام الشخص الاخر
طيب على أمرك
انتي لو دق عليك ابوك وقلتيله تبي شي وقالك لا تقفلين
قلت لك غلطه وماتتكرر تبي مني طلب ثاني
ايه ولا خلاص
خلاص ماباقي شي
انت لك طلبات
لا مع السلامه أجل
مع السلامه

انتهى كلامنا ونمت في غرفة الولد باقي وش رايك في اللي صار ووش تنصحني؟؟

__________________
اللَّهُمَّ إِنَّا نَسْأَلُكَ نُفُوساً مُطْمَئِنَّةً تُؤْمِنُ بِلِقَائِكَ، وَتَقْنَعُ بِعَطَائِكَ، وَتَرْضَى بِقَضَائِكَ.

للتوضيح بس الكلام هذا هو اللي قاله مو انا..
ولا انتم اللي بشر واحنا بهايم
واسلوبك زفت مايتغير

__________________
اللَّهُمَّ إِنَّا نَسْأَلُكَ نُفُوساً مُطْمَئِنَّةً تُؤْمِنُ بِلِقَائِكَ، وَتَقْنَعُ بِعَطَائِكَ، وَتَرْضَى بِقَضَائِكَ.

شككني في نفسي فرحت بردك كثير احسه اعاد التوازن في داخلي واني ماكنت غلطانه في تعاملي معه
ردك افرحني كثييييييير الحمد لله يعني ماكنت ظالمته
برايك ليش الزوج يرفض الاعتذار اذا اخطأ ؟؟
يعني انا استغرب والله لو قال كم كلمه لطيفه طيبت خاطري كان رجعت طوالي بدل التعب النفسي اللي احنا فيه
اما الكلام معه مباشر فلسانه سليط ويدخلني في متاهات مالها اول من اخر
لكن الظاهر ان مافيه الا تنازل عشان تمشي الحياه لان هذي ماهي حياه هذا نكد ورفع ضغط
مااحس في فمي كلام ينقال بعد كلامنا لبعض افكر اروح انام معه في غرفة النوم بدون كلام بدون شي عل وعسى يشوفني جيت له ويلين شوي بما انه بدا يهدي الموضوع زي مايقول ؟
في اليوم اللي راح كان يحاول يكلمني ويسولف بس انا نفسي واقفه مو قادره اعدي الموضوع كذا ومع كذا رديت عليه وتكلمت
اذا والله شفت مبادره لو شي بسيط رحبت واذا لا فمايستاهل احد يكلمه

__________________
اللَّهُمَّ إِنَّا نَسْأَلُكَ نُفُوساً مُطْمَئِنَّةً تُؤْمِنُ بِلِقَائِكَ، وَتَقْنَعُ بِعَطَائِكَ، وَتَرْضَى بِقَضَائِكَ.

سأعمل بكل مانصحت به هنا باذن الله
كلمة شكر قليله جدا في حقك
جزاك الله كل خير واثابك على ماتقدم لكل محتاج وكل مهموم فرج الله لك كل هم وحقق لك كل ماتتمناه ان كان خيرا لك في دنياك واخرتك

__________________
اللَّهُمَّ إِنَّا نَسْأَلُكَ نُفُوساً مُطْمَئِنَّةً تُؤْمِنُ بِلِقَائِكَ، وَتَقْنَعُ بِعَطَائِكَ، وَتَرْضَى بِقَضَائِكَ.