اخواني واخواتي .. اتمنى فعلا منكم النصيحة يعلم الله اني في ضيقه واختنق كل يوم حتى المرض صابني

انا ماصرت اقدر اتحمل أكثر الهم بدا يخنقني تعبت من زوجي كل شى بحياتي انقلب

وموضوع الطلاق امر صعب .. الكل بيوقف ضدي خاصه بسبب الصوره اللي رسمها لنفسه الكل يمدحه ويشكر فيه ويثني عليه .. امي وابوي لو اقول لهم راح ينجلطون انا بس قلت لهم على الخلاف هذا بس علشان احطهم بالصوره ومره تألموا وطول الوقت قلقانين علي هم صحيح وقفو معي ونصحوني اجلس في بيتي واحافظ عليه اواعطيه واعطي نفسي فرصه واحاول اتناسى واغض النظر بس الزواج بدل مايكون فرحي صار همي.
ابوي مارضا حتى انام في بيتنا ليله مع اني ترجيته .

والامر الاخر انا تزوجت كبيره وبعد خطبات كثير ورفض .. وانا وحيده ماعندي خوات ومافي حد فاضي لي كذا انا اروح واجي معاه نختلف نتزاعل نضحك وتمشي الدنيا بعدين كيف بقضي حياتي لحالي صعبه مره .بعد ماحبيته وتعلقت فيه وتعودت على انه يكون موجود بحياتي.

والاهم انا اذا بكون صريحه مع نفسي فأنا ماابي زوج غيره طول العمر و انا ماصرت اثق في اي احد خايفه اطلب الطلاق واتحدى الكل وبرضو افشل في زواج ثاني . وانتم عارفين المجتمع مافيني اواجهه كل هذا لحالي انتقادات واسئله ونظرات وتشمت وفوقها عارفه الشباب ونفوسهم الضعيفه وانا عارفه زين اني ببكي طول عمري وبندم لو انا اللي بادرت وتركته .لو تجي منه اقل شى بقول ماحبني وماحب يكمل معاي ..

فوق كل جروحه وخياناته حامله معي هم ثاني مايتقبل مني اي شى لا راي ولاكلمه ولا انتقاد ولاسؤال اي شى يقلبه زعل وهواش صار همي بس كيف يكون راضي البنت تتغلى تعاتب تزعل مرات حتى لو بس من باب المزح والدلع انا مااقدر كلها تنقلب علي وهو عادي جدا يزعل يعاتب يقسى يجرح ويقول كلام وتصرفات تسم البدن مرات احس اني مااقدر اوقف على رجليني من زود ماقلبي يألمني ودموعي غصب احسها تنزل من داخلي حتى احس بنغزات والم بصدري . حتى الكلمات العفويه لازم احسب لها وياويلي لو تطلع كلمه والا زله اكره نفسي من اللي يسويه مواقف كثيره .
لو صور عاديه بالواتس اب..يقولي اغار غيرها ولا تبينين حالتك النفسيه للعالم .وطبعا هو مايعرف اني مخبره اهلي واهلي ماكلموه ويتعاملون معه عادي . حتى لو ارسل له مسج حب بدل مايرد شكرا او احبك يعصب من ارسله لك يالله طيب انت ترسل صور تفداك انفاسي وصباح الحب وغيرها ماسألته من مرسلها له .
طلعات حتى مع خوياتي يغار ويتجج يبيني بس ارجع .
زوجي يرجع من الدوام متاخر يعني مرات 7 المغرب مرات 8 او حتى 9 وانا ارجع 3 او 4 يعني عندي وقت اريح وارتب الشقه واضبط نفسي بعد اذا ريحت وبعدين كلمته سألت عنه او كلمني عادي اقوله مثلا وحشتني يتحجج كيف وحشتك وانتي نايمه وتاركتني ويجلس يعاير فيني .
وخل يكتب بالواتس اب او يدق وماارد يزعل .
ادلعه كلمات عاديه عفويه وربي ماقصدت مره قلت له انت قطوتي وش قصدك وكيف تقولين كذا وسالفه .
كل كلمه والثاني قالي مالك دخل ومو شغلك واخر شى قالي خوذيها قاعده بحياتك مالك دخل باي شى خاص فيني
مااقدر اسأله عن اي شى مثلا ها حبيبي وينك الحين القصد من سؤالي متى بترجع ابي اشوف يمديني اتجهز او يمديني اسوي عشا مثلا وش يرد .. وش قصدك يعني تحقيق انا بالشارع .
مره كان مسافر وشفت عنده كيس انه رايح السوق قلت حبيبي رحت السوق عصب وقوم القيامه تتدخلين ومو شغلك وبالنهايه وشو الموضوع كيس فيه اوراق من مكتب جده للشرقيه يعني لو رد علي من البدايه حبيبتي كذا كذا فيها شى .وقيسي عليها مواقف كثيره واخرها البارح ..

ماكان فينا شى وطالعين ومعزمين نحج السنه وانا لي فتره مقرره اغض النظر واطول بالي مع اني من داخلي ابدا مو مرتاحه وقلت فرصه نغير انفسنا واعطي نفسي فرصه بعد ماارجع من الحج واشوف الوضع صار احسن افكر بموضوع الحمل ..

نتناقش اقوله الايام اللي مانكون محرمين فيها عادي الواحد اذا يبي يحجز غرفته مع عايلته يعني بعد مناسك العمره او بالمدينه المنوره اذا قررنا نروح .. اللي اعرفه انه يصير اما وقت المناسك واحنا محرمين الرجال لحالهم والحريم لحالهم .. قالي لا ومايصير وكل سفره الحج لازم انتي مع الحريم وانا مع الرجال .. عجزت افهمه راي مو راضي يقتنع وانتي بتفتين في الدين والشرع وانتي وحده مغروره وتتفلسف وشدخل هذا ماادري .
اخر شى سكت وماتكلكت باي كلمه ويظل يتكلم ويتكلم يقول هذا اللي قاصر بالحج بعد اروح واقابلك واصلا انتي تسدين نفس اللي ماتنسد نفسه ومو انتي اصلا اللي بتدفعين .. رديت غير اني ماقلت لك احجز لنا مع بعض ولا اصريت ولا الحيت كنا نتكلم عن يصير او مايصير .. وعموما وصلت الفكره قول انك ماتبي مثلا تدفع زياده لو طلبنا لنا غرفه او انك ماتبي تقابلني مو اسد نفسك انا وظليت ساكته طول الوقت ومابغيت عشا .

راح للصاله وتركني لحالي انام ونام هناك رحت له قلت طيب قوم نام بالغرفه والصباح نتفاهم لكن مافي فايده والصبح رحت الدوام ومالي خلق لا اشوفه ولا اكلمه حتى جوالي خليته على الصامت .

مو عارفه وش اسوي معاه تعبت جد تعبت احس قلبي ذاب مو معطيني ومعطي نفسه فرصه نتفاهم يتفهم نحب بعض ابدا جالس لي على الوحده انا افكر يمكن يكون السبب لاني ليله اللي صارت المشكله قلت له كلام مره قاسي فحب يرده .

تعبت ماابي اترجاه واتعذر مع اني مااعتذر الا اذا كنت فعلا غلطانه وغالبا هو اللي يجي يراضيني وماابي اظل زعلانه وانتظر منه كلمه علشان ارضا . صرت ادعي على نفسي بالموت ماصرت احس بطعم شى .