رد : مشاكلي النفسانية.. اختي لكل شيء حد
أهلين اختي متفائله...
آآآآآآآآآآآآآآآآآآآآآآآآآآآآآآآآآآآآآسفه... اليهال سووا احتلال لللابتوب... بغوا يشوفون فلم كرتوني... و نظراتهم تعور القلب... فعطيتههم اياه....
سامحيني اختي...
رمضان كريم.. كيف رمضان معاج؟ بصراحه عندنا الجو حااار.. الله يجيرنا من حر جهنم...
نرجع لموضوعنا...
قريت ردج على الفيديو القصير... و حبيت الكلام اللي كتبتيه...
"فهمت ان الناس تتاثر بطريقة التعبير والكلمات فان كانت طريقة التعبير كلاسيكية كان تاثر الناس بها قليل ولكن ان كانت سهلة وفي نفس الوقت باسلوب جميل و original جذبت الناس..."
فعلا الناس تتأثر بالكلام... و انتي تتأثرين وااااايد بكل شي حولج... لأنج شخصية حساسه.. و في نفس الوقت انتبهتي ان أسلوب الكلام هو اللي يجذب.. يعني انتي ذكرتي في أكثر من نقطه ان عندج مشكله في الكلام و ترتيب الأفكار و قلت ان في ناس شاطره في الكلام و انتي لا... بس لاحظتي في الفيديو إن الشطاره مب كل شي.. بل الأسلوب هو كل شي..
"مع العلم اني اخذت وقت لاباس به في استيعاب مارايته وحاولت ان اناقشه مع نفسي وان اترجم الفهم الى كلمات.. يعني لو شخص تاني كان كتب الاجابة بصفة مباشرة بعد ماراى الفيديو.."
كم تقريبا خذتي وقت علشان تستوعبين الكلام؟ دقيقه؟ 5 دقايق؟ ربع ساعه؟ نصف ساعه؟ و ليش تعتقدين ان لو شحص غيرج كان بيقدر يكتب الإجابه بصفه مباشره بعد الفيديو؟ كتابتج و أسلوبج في ايصال الفكره كانت رائعه... بس محتاجه شوية ثقه في النفس...
"يعني هنا يتوضح اني عندي مشكلة في سرعة الفهم وربط الافكار وايضا في ترجمة الافكار الى كلمات .. وهذا المشكل دائما يحدث لي يعني مع اشخاص اجدهم يعبرون بطلاقة عما فهموه ولكن انا اجد صعوبة في سرعة التعبير.. سواء كان التعبير عن مااراه او عن مااحس به."
اللي يعبرون بطلاقه عندهم الثقه اللي انتي تفتقدينها... هذا هو الفرق بينكم... ممكن فعلا تكونين شوي بطيئه في الفهم... طبعا انا ما اعرفج شخصيا علشان أحكم انج تفهمين بسرعه او لا... و لكن هذا ما يعني انج ممكن تظلين بهالشكل طول الوقت... بالنسبة لي أظن ان الثقه تتولد بالإحتكاك... و بالإطلاع... كلما كان الشخص مطلع... كلما كانت ثقته بنفسه أكبر... و ممكن كلامي ما يكون صحيح مئه بالمئه... و لكنه صحيح بنسبه كبيره...
"انا احس اني لاافهم نفسي و احس ان هناك شخصيات كثيرة داخلي وقرارات كثيرة ويصعب علي اخذ قرار حتى ارى ناس اخرى اخذته.. "
أحيانا نحتاج فتره لإتخاذ قرارات مصيرية... و في بعض الأحيان نحتاج فتره قصيرة لإتخاذ قرار أخرى... التردد دائما يكون في الأشيا المصيريه و الصعبه.. مثل الوظيفه... شراء السياره... الزواج.. الطلاق... المستشفى اللي راح نعالج فيه... بعض القرارات ممكن ناخذ أشهر لإتخاذها... و البعض الأخر ممكن ناخذ فتره اسابيع قصيره لإتخاذها...
الموقف اللي ذكرتيه عن تلك البنت... صدقا ما أظن الفطنه تلعب دور فيه... بنت و جائت و جلست معاكم... انتي بعد اعتبري انها تمضية وقت فقط... مش معنى هالشي ان نيتها مب صافيه... هي حبت تقضي وقت الإنتظار بالدردشه معاكم.. و ممكن تتكلمين معها في مواضيع عامه... بس هي طبعا غلطت يوم انها تركتج و انتي تتكلمين.. و كان الأجدر انها تستأذن...
الحين نجي للنقاط اللي ذكرتيها:
1- النسيان:
النسيان مشكلة العصر انا اسميها... مشاغل الحياه تخلينا ننسى كل شي و بسهوله جدا... طيب شو الحل؟ حلول بسيطه جدا...
- ألعاب ذهنيه تلعبينها لتقوية الذاكره... اكتبي في جوجل memory improvement games
- كبسولات أوميغا 3 ممتااااااااااااااازه جدا لتقوية الذاكره...
- الفراوله تزيد الذكاء و يقال انها تزيد التركيز بعد..
- بخصوص الطبخه... حطي منبه لج... هذا أفضل حل في الوقت الحالي..
2- انعدام الثقه:
الثقه راح تنبني على مراحل... كلما زاد اطلاعج و ثقتج في المعلومات اللي معاج... راح تزيد ثقتج في نفسج.. كلما انتي عرفتي قيمة نفسج... راح تزيد ثقتج في نفسج.. كلما انتي طنشتي التعليقات السلبية... راح تزيد ثقتج في نفسج... قلتي انج مب جميله؟ طيب منو عطاج الشهاده انج مب جميله؟ وين الإثبات على هذا الكلام؟ بتقولين لي المجتمع؟ بقول لج المجتمع ما يمل و لا يتعب.. و دوره فقط الإنتقاد... و للأسف النقد الهادم و ليس البناء... بصراحه من طريقة كتابتج... شفت انسانه فاهمه و عارفه هي شو تبي بالضبط.. أفكار مرتبه... و جمل سليمه... حتى لو كان هذا الشي خذا وقتج منج لكتابته.. و لكنه في النهايه طلع بشكل سليم و مرتب و سلس و سهل القراءه... طنشي المجتمع و عطيه إذن من طين و إذن من عجين...
3+4+5 كلها مرتبطه ببعض.. و حلها الإطلاع... و الإطلاع و الإطلاع... ادخلي على موضوعي اللي في التوقيع... خذي لفه على الكتب الموجوده.... في كتاب مهم ما راح اقول اسمه... ابيج انتي بنفسج تكتشفينه.. و عندي شبه يقين انج بتعرفين اي الكتب اللي تحتاجينها حاليا... في كتابين ذكرتهم متأكده انهم راح يرفعون مقدار الثقه عندج لفووووق...
هل في امكانية انج تشاركين في المنتدى... المنتدى هذا رائع جدا... ادخلي شوفي مشاكل المتزوجين... فكري كيف تعطين النصيحه الحقه... اقري ردود أخواني البليغ و ابو حكيم... و ردود الخاله بيتا و مسز داني و مدن السلام... تعجبني ردودهم و تسلسل الأفكار فيها... و بعد اسلوبهم في الكتابه رائع... تخيلي ان هذا اسلوبج في الكتابه...
بصراحه اختي متفائله... انتي محتاجه بس شوية ثقه علشان تبرزين... لأن اسلوبج في الكتابه وايد حلو و مرتب... محتاجه تكونين مطلعه على العالم حولج.. و مب شرط تطلعين علشان تتقوين... ابدئي من الداخل... ابدئي من العائله.. و ما اقصد من والدج او والدتج.. اقصد المجالس النسائيه... إذا أحد استهزء.. طنشي و لا تبينين لهم انج متضايقه... صدقيني ينقهرون أكثر...
19-07-2013, 11:48 PM
ضوابط المشاركة
العرض الشجري