قرأت موضوعك وسأرد عليه على شكل نقاط

* من المعلوم أن الزوجة تتبع زوجها وليس العكس وبناءا على ذلك أرى أن والدك أخطأ عندما شرط عليه الإقامة في بلدك وإن كان يريدك تحت عينه فليزوجك بمن يحمل جنسيتك

* لو كان سالم يحبك بصدق لحارب من أجل الضفر بك ولم يتزوج بهذه السرعة فالذي يحب ويعشق إن عجز عن الزواج بحبيبته ﻷي سبب كان لن يعجز عن العيش أعزبا حتى يقضي الله أمرا كان مفعولا

* الرجل تزوج وزوجته ليست معه لظروف دراستها وﻷجل ذلك ربما حن لك في لحظة ضعف وحب أن يرجع العلاقة لظروف الغربة وقد قال لك أنه يقدر زوجته ويحترمها وهي لم تقصر معه وأقول لك من الطبيعي أنه لم يهيم بحبها ﻷنها بعيدة عنه

* لو قدر الله لك وتزوجتيه لا يحق لك أن تطلبي منه طلاق زوجته فأنتي من دخلت على حياتها وليست هي فمن أنتي حتى تطلبي منه طلاقها ؟!

* الزواج عن علاقة محرمة مثله مثل الزواج التقليدي فيه الناجح والفاشل وغالبا يفشل هذا النوع من الزواج في بلاد الخليج وما بني على باطل فهو باطل

* لو كنتي أنتي الزوجة وزوجته هي الحبيبة ماهي ردت فعلك ؟!

* لو كتب الله لكم الزواج وبعد مدة من الزمن برد الحب وأحب غيرك وتزوجها ماهي ردة فعلك ؟!

* هناك مقولة تقول : إذا نكح الحب فسد

* نصيحة أخيرة : اتركي الرجل وشأنه واطلبي من ربك أن يرزقك زوجا يسعدك

__________________
إن بعض القول فن ، فاجعل الاصغاء فناً ..
>> المعرف لرجل <<

مرحبا اخويه ..


ㅊ لاتقول انه ابوي اخطأ لانه ماغلط ابويه يوم وافق على سالم وشرط عليه حب يجبر بخاطري ويضمن راحتي
ㅎ حب يرضي امه لانه رضا الله من رضا الوالدين لاتشكك في محبه سالم لي ...
ㅍ تحليلك من الجايز يكون غلط وغير صحيح..
ㅈ انا زوجته بعد ... بس ماراح اضيع وقتي عشان طلاقها بالحيله اقدر اخلي سالم دوم معاي .. من له حيله فليحتال مافي شي مستحيل في هالوقت
ㅊ مادام حللناه واتبعنا شرع الله ماراح يكون باطل ان شالله
ㅎ بنفصل عنه وبتركه يعيش حياته بهدوء مع حبيبته
ㅍ بنفصل بدون تردد وبدون ضجه ..
ㅈ لااؤمن بهالمقوله
ㅅ اشكرك ع النصيحه كفيت ووفيت في ميزان حسناتك ماقصرت ... وتقبل الله منا ومنكم طاعتنا ربي يحفظك

بتحتالين عشان تاكلين حقها في زوجها يا روضة؟!

والا هذي بعد لها تفسير ثاني؟!!


وتقولين ان تحليلي بدا ياخذ منحى بعيد وايد عن موضوعج؟!

احنا ما نحلل من راسنا فديتج .. احنا نقراج ونقرا كلامج اللي انتي تقولينه بنفسج.

__________________


اللهم طِيبَ الأثر .. وحُسْنَ الرحيل.

اه قصدج حق الزوجيه ... لكل حادث حديث مجرد افكار ادور براسي انا الحين قمت اغار عليه كيف باجر الله يتمم ع خير .. والسلام

لازلت مقتنعة بأن السالفة لا هي حب ولا شي (تجاهلي هالنقطة وما عليج من اعتقادي)


لكن في كل الأحوال .. الحب مشاعر حلوة وخيّرة .. وما في إنسان يحب بصدق ويطلع منه شر أبداً.

__________________


اللهم طِيبَ الأثر .. وحُسْنَ الرحيل.

اذا السالفه موب حب شو تكون ... لايكون حاطه عيني ع ولد الراجحي وانا ماادري انا حبيت شخص ع قد حاله موب حب يوم وليله شاركته اسراره وتفاصيله قبلها
واي شر اللي تطرينه يامهره ليش تعرفيني عشان تعرفين اللي بقلبي .. لاحوله ولاقوة الا بالله ..

بدل لاتقولين الله يحقق امانيج تحللين بهالشكل .. ابرايج حللي بكيفج

قلت لج لا تعلقين على رأيي في سالفة الحب .. تجاهليه تماماً .. رايي وانا بكيفي وانتي مب ملزومة فيه.

وعلى كل حال .. مب لازم يكون ولد الراجحي .. والمصلحة مب لازم تكون مادية.



اما عن اللي في قلبج .. فلا والله حشا ما اعرف شو اللي في قلبج.

قلت لج انا اقرا كلامج .. اقرا اللي تقولينه بنفسج.

مرة تقولين (أفكر اشرط انه يطلقها) .. ومرة تقولين (افكر ادق عليها واقول لها شيلي قشج وردي بيت اهلج) .. ومرة تقولين (بالحيلة باخليه دوم معاي)

بالله عليج هذا شو يسمونه؟!!



الله يحقق امانيج يا روضة .. بس بدون ما تأذين حد أو تجورين على حق حد.

__________________


اللهم طِيبَ الأثر .. وحُسْنَ الرحيل.

لو بتم ارمس عن اللي في خاطري بتمين تلفين وادافعين عنها من جذي لازم احافظ ع معنوياتي توب لانه اللي تمنينه من فتره طويله قرب يتحقق .. ان شاالله يارب وبحق كل دفعه بلى ياربي ترزقني سالم زوج وحبيب ... ربي مايخيب ظن عبده استقبلت ايميل من سالم بارحه في الليل لاني معاهده نفسي مايسمع صوتي طول الشهر وبيسمع ردي بشرني سالم انه نزل يومين لجده رتب اموره مع خاله وولد خاله اللي بحسبه اخوه وقالي عقب العيد عند ابوج ان شالله وتمنى اكون فكرت زين واستخرت وطلب مني مااخيب ظنه ...
اصيل سالم ومعدنه اصيل وموب خساره وقتي اللي مضى معاه ... كلها ايام وراح انسى كل ليله قعدها بهم وكدر ووحده
يالله اانك قلت ادعوني استجب لكم ودعوتي لك يارب وبحق هالليله المباركه انك ترزقني سالم زوج وستر وحبيب وسند وعون لي

ادافع عنها؟!

وليش ما تقولين اني احاول انبهج وافتح عيونج عشان ما تظلمين بدون ما تحسين؟!

لا تظلمين سالم (إن صدق في نيته) .. ولا تظلمين زوجته .. ولا حتى تظلمين نفسج.


انتي مب قلتي ما عندج خوات فاضيات يسمعونج وينصحونج؟

شو هي النصيحة اللي تبينها عيل؟! .. والا تبين خوات يسمعونج ويقولون لج انتي صح وخلاص؟!



انا ما اعرفج يا روضة ولا اعرف سالم ولا اعرف زوجته .. ونيتي مب اني ادافع عنها .. انا نيتي اني انصحج رغم اني ادري ان كلامي مب على هواج.

ولاحظي انا في كل ردودي عليج ما قلت لج: لا تتزوجينه.

تبين تتزوجينه؟ .. تزوجيه .. لكن لا تدخلين حياتهم وانتي في نيتج الأذية والشر بأي شكل من الأشكال .. ولا تاخذين من سالفة (ان سالم ما يحبها وانه تزوجها بس عشان رضا امه) حجة تعطين على أساسها نفسج حق مب من حقج.

موافقة على انج تاخذين ريال متزوج؟ .. خذيه وأقلمي نفسج مع حياة التعدد مثل ما رب العالمين قال .. مادامج تقولين ان الشرع حلل له .. مب تاخذين ريال متزوج وتقلبين حياة الكل عشان نفسج ومصلحتج انتي.

الغاية عمرها ما كانت تبرر الوسيلة يا روضة .. فديري بالج.

__________________


اللهم طِيبَ الأثر .. وحُسْنَ الرحيل.

مهرة ..

رائعة و راقية جدا بنقاشك ماشاء الله تبارك الله ..

.
.

بنت بو ظبي ،،

أعجبتني طريقة حوارك و ردودك مع مهرة و مع من عارضك ..

ربي يوفقك ..