المشاركة الأصلية كتبت بواسطة لكل شي حد

اختي مرهقه...

كان عندي شك في الموضوع و لكن اخر موقفين من زوجج أكدوا لي الموضوع.... زوجج يحس بتأنيب ضمير شديد.. يحس انه السبب في وفاة ابوه... يحس ان تقصيره مع ابوه كان فادح... و للاسف هو قاعد يطلع هالشي فيكم....

هو يسترجع كل شريط حياته مع والده حاليا... و يحاسب نفسه حساب عسير على كل تقصير بدر منه اتجاهه.. يوم توفى ابوي الله يرحمه... كرهت نوع معين من الطعام... لان والدي طلبه مني تلك الفتره و جبت له بس جبته متأخر و رفض ياكله.... فتره طويله جدا كلما اشوف الاكله هذي و انا استحقر نفسي.... عاتبت نفسي على كل شغله.... مع ان الكل يشهد اني ما قصرت... ولكنها النفس العجيبه... اثناء سكرات الموت كنت معاه.... ماسكه يده.... قلت لنفسي وقتها و استغفر الله من قولي هذا "سامحني يا بوي... على كل العلم اللي انا وصلته و دراستي... ما قدرت افيدك و امنع انك توصل هذه اللحظه".... تأنيب ضمير شديد شعرت فيه على مدى ست اشهر و لكنه خف مع مرور الوقت... مازلت افكر ان في شي انا سويته غلط... ما زلت زعلانه لان في حركه معينه كنت اسويها له دوم انا وقفتها بعد خلاف صر بيني و بينه... هو باب و تسكر من ابواب الجنه... زوجج يمر بنفس الموضوع... و لان ابوه كان رافض هذا الزواج هو يصب كل غضبه عليج...

ما لج ذنب... اتفهم هالشي... بس قلت يمكن اذا عرفتي سبب تصرفاته تلتمسين له و لو شيء من العذر... وجودجج حاليا يذكره برفض ابوه... صحيح هو على خصام معه من قبل... و لكن ممكن انه يعتبر زواجكم اكبر خصام صار بينهم...

زوجج محتاج رجل عاقل و حكيم... يذكره ببعض المواقف الطيبه له مع والده الله يرحمه... يذكره بحقوق الزوجه و حق الابناء...

بصراحه ما اعرف اذا نصيحتي لج بأنج تتركين الامر كما هو و تسافرين افضل او لا... مع الاستمرار بالدعاء لوالده... و ابنج خذيه معاج... استديني المبلغ و خذيه... علاقتج متوتره وايد مع زوجج و الوضع راح يتشعلل اكثر لو طلبتي المبلغ حاليا...

لو ترسلين له دعاء للميت تختصين والده فيه و تطلبين له الرحمه و تذكرينه ببعض مواقفه الطيبه مع والده ممكن يقرب القلوب لبعضها... زوجج محتاج يسمع انه ما قصر مع والده في شي...هالشي راح يترك الاثر الكبير... هو محتاج حضن حاليا يقول يا فلان انت ما قصرت و رايتك بيضا و تقدر تبر والدك بعد وفاته باشيا كثيره و انا معاك في كل خطوه...