راح احاول اختصر الموضوع على قد ما اقدر

ربنا اراد اني اكون الولد الوحيد لابويا وامي جيتهم بعد 4 بنات بعد شوق وعطش زي ما يقولوا

بس جابوني على كبر الفرق بيني وبين ابويا وامي حوالي 40 سنة واصغر وحدة في اخواتي الفرق بيني وبينها 12 سنة

وكل اخواتي اتزوجوا من زمان وانا لسا اعزب وعمري الان 31 سنة ولا قد سبقلي الزواج ومحد عايش في البيت

غيري انا وابويا وامي اما اخواتي يجيو يزورونا كل نهاية اسبوع واهلي الحمدلله طيبين بس للاسف جدا جدا نكدييييييين

ابويا كبير في السن ومريض وامي كبيرة في السن ومريضة ودايما يتضاربو على اتفه وابسط الاسباب

والبيت دايما يقلب حريقة وسب من تحت الحزام وزعيق حتى لما يكون اخواتي فيه لازم تصير مشاكل ومضاربات وزعيق

وانا اكره الزعيق والنكد وما احب المشاكل ابدا ابدا والله عمري ما حسيت بجو اسري وما حسيت بجو عائلي

وحاولت كتير اعدل الوضع بس للاسف هما كدا يحبو النكد ويعلم الله ان شهر رمضان كله انا ادعي في سجودي دعوة وحدة

(( يارب هدي سر ابويا وامي واخواتي واحسن خلقهم واجعلنا يارب اسرة سعيدة ))

وطبعا الوضع دا من زمان من يوم ما كنت صغير وانا افتقد الجو الاسري عشان كدا من صغري كنت احلم بالزواج

احلم اكون اسرة سعيدة واربي اولادي تربية صحيحة كلها محبة وفعلا ما ابغا غير زوجة تعينني على طاعة الله ونكون اسرة مثالية

بس للاسف كيف اوصل للشي دا في وضعي الحالي

اولا : انا اهلي يبغو يزوجوني وطبعا لاني الوحيد لازم اعيش معاهم في نفس العمارة ليا شقة خاصة عشان اتزوج فيها

بس كيف راح يكون وضع زوجتي مع اهلي في الجو المكهرب اللي كلو مشاكل ونكد ومضاربات

وسب من تحت الحزام وساعات مد ايادي وحتى اولادي كيف اربيهم في البيئة دي

تانيا : لاحظت ان امي واخواتي يغاروا عليا جدا بس يقولوا العكس

تخيلو ليهم اكتر من 6 سنوات يخطبولي وعمري ماشفت وحدة من اللي خطبوهم !!

كل ما يروحوا بيت يقولوا مو حلوة ، بيضة ، سمرا ، قصيرة ، طويلة ، تخينة ، نحيفة .. الخ )

دايما يطلعوا في البنت عيب ودا وانا اصلا ما قلت اي شروط كل اللي قلتو ابغا وحدة بنت حلال وتخاف الله

وانا فعلا ما ابغا غير كدا وما يهمني الشكل ابدا ولا قد فكرت فيه بس هما اللي يعقدوا الموضوع

وياما حاولت اقلهم طيب انتو ما عجبتكم البنت الفلانية خليني انا اروح اشوفها يمكن ارتحلها ويصير نصيب

يقولوا لا انت ايش فهمك احنا لازم نخترلك زوجة كويسة ويجلسو يعيبو في البنت الين يجيني احباط

والله تعبت نفسيا واحس اني ما راح اتزوج رغم انهم بيدورو وامي دايما تبكي وتقول نفسها تشوف اولادي

بس الكلام لوحده ما يفيد ابدا ومني عارف ايش اسوي انا ما اكره اهلي لانه مهما كان دول اهلي

بس احيانا احس انه نفسي اهج من البلد كلها تخيلوا العيد اللي هوا فرحة لكل المسلمين كان كلو مشاكل ونكد ومضاربات

وفعلا صرت اكره المناسبات العائلية اللي في بيتنا لان كلها مشاكل ومضاربات

الحمدلله على كل حال وانا راضي بقضاء الله وقدره بس ايش تنصحوني اعمل

واتمنى اي احد يقرا موضوعي ما يخرج بدون ما يدعيلي انه ربنا

يهدي سر ابويا وامي واخواتي ويحسن خلقهم ويجعلنا يارب اسرة سعيدة

واسف اذا طولت

[IMG]http://im33.***********/g5zBM.jpg[/IMG]
قيل للسعاة أين تسكنين... قالت في قلوب الراضين بقضاء الله