السلام عليكم

جزاكم الله خير على هذا الموضوع انا عضوه هنا قديمه وسبق وطرحت مشكلتي بس بطريقة مفصله لكن فقدت المعرف واكتفيت فقط بالمتابعه

ولأن في قلبي حرقه وغصه مايعلم فيها الا الله قررت اسجل من جديد عشان اخذ رايكم وتشورون علي لأني بدوامه فضيعه

اولا بعطيكم الاشياء المهمه اللي تخص مشكلتي

انا زوجة اولى لمعدد عدد كذا مره وكانت اغلبها بالسر لين اكتشف الموضوع وماتستمر ويطلق

زواجه الاخير كان من سنتين
زوجي ظالم ومستهتر وغير مبالي واتكالي

تزوجها من اربعه سنين ورضيت بس كانت في بلدها وكأي وحده كانت نفسيتي تعبانه بس ملتزمه بحدودي لكن للاسف ماعجب زوجي وزوجته وطلعوا اشاعه انهم تطلقوا وارتحت نفسيا - وبطبيعة الحال كان ع ذمته 2 بالسر وكنت اتنازل عن كثير من حقوقي لاني طفشت من المشاكل

لما قررت زوجة زوجي تشرف طلقني زوجي وطلق 2 معاي بسبب اني عرفت الموضوع

رجعت بدون ذكر تفاصيل

من رجعت ظروف زوجي سيئه جدا لدرجة مايصرف علينا وان توفر معاه شي صرف عليها وينكر مع اني اتابع رسايلهم بالواتس تطلب اللحمه والكبده والسبانخ وال وال وال حتى كمالياتها الشخصيه مو مقصر معاها

وانا نهائيا لدرجة والله العظيم وربي شاهد عايشه على صدقات وحسنات مجموعه مدرسات بعد مابعت اللي اقدر ابيعه

حتى فاتورة النور جلسنا بدون نور لحد ماتسلفت وسددتها بالبدايه كان يكابر ويضرب ويتحدى بس الان يهدي ويقول اتحملي واصبري واعوضك

مايعدل نهائي - بالاول كان ماينام اساسا عندنا بس الان الحمدلله تعدل الوضع شوي

حبيت اقولكم ومااتهم احد بس عشان تعرفون حجم الضغوط اللي علي

من رجعت لزوجي اي علاقه خاصه بيني وبينه يصير لي نزيف شديد بدون سبب وجلست سنه كامله وانا الله عالم بحالي واستمريت على الرقيه انا وهو واهل بيتي والحمدلله من كم شهر الوضع افضل بعد مالقينا عملين سحريه وطلاسم ابطلناها على يد احد المشايخ

بعدها صار وحملت وتعبت كثير بسبب ارتفاع الضغط وصار عندي اجهاض وبعد شهرين حملت مره ثانيه بكرم من الله وربي يتمم لي على خير

بحملي الاول عرفت زوجته وقلبت الدنيا زعلانه انه ليش هي ماحملت لانها هي العروسه مو انا وكنت اشوف رسايلها واستغرب انهيارها حتى كانت تدعي على نفسها بالموت
ولما حملت مره ثانيه رفض زوجي اعلم احد نهائيا وماادري وش السبب
عرفت زوجة زوجي ان زوجي متزوج قبلها كثير وزعلت وبكت وقلبت الدنيا واشتكت لاهله وانه خلاص لاعاد يفكر يتزوج وهي مو منقصه عليه شي وقايمه بحقوقه كامله
زوجي يحاول مايقصر عليها ولايزعلها ابدا ويسأل عنها لو كان عندي عكسي تمام ولو تغيب او ماترد يقلق كثير عليها اشوف هالشي واحس نار بصدري
انا طلقني ولا ارضاني ولايصرف علي ويعزيني بالصبر دائما
وان ناقشته قال انا بطلقها بس اجمع المؤخر والمفروض انتي تحمدين الله وتصبرين وتحاولين تكسبيني
انا كل مره كنت اكسبه واسترده بس طفشت خلاص ديون وهم ومرض كلها انا دفعت ثمنها
بصراحه زوجة زوجي جميله بلد مشهوره بالجمال وصغيره جدا جدا يعني مافيه شي يجبرها تاخذ واحد اكبر منها ب 25 سنه
غير ان جمالها حطمني بوسط هالظروف ومو قادره اجاريها الماده مو مساعدتني ( علما ان جميع زواجات زوجي قبل اجنبيات )
والله العظيم يابنات ماالبس الان غير جلالة الصلاة بسبب حملي لاكريمات ولاعطورات بالقوه ادبر اكل اهل بيتي
حالتي النفسيه زفت صبرت كثير وش اخذت
ليته حافظ علي وقال هذي ام عيالي ولاباعني ع الاقل القى شي يجبر كسري
لدرجة صايره احلق شعري من الهم والله العظيم ماكذبت بحرف والله يشهد علي ودائما متحجبه بشرشفي

بتقولون كيف يعاملك يجاملني بعد حملي علاقه خاصه لي خمسه شهور مافيه وعذره الحمل وقبل كان النزيف
طلعاته وروحاته معاها طلباتها مجابه وحسب كلامه لانه بيطلقها مايبغى يقصر عليها بشي لكن انا لاحق يعوضني

وهي الله يهديها ان كانت مو قاصده وينتقم منها ان كانت قاصده بس توصل للناس اللي حولي وشلون هي سعيده وانه زوجي دائما يعاشرها بشكل متكرر وانه سبب لها وجع بظهرها
وانه يطلب منها ترقص ويطلب منها انه ماتنصح لان جمالها كذا عاجبه حتى بالليالي تشتكي انها صغيره وماتقدر ع النومه لحالها ومو متعوده وعشان كذا كان زوجي فتره طويله هاجرنا وماينام عندنا لانها تخاف

انا اللي دفعت ثمن زواج زوجي هو تمتع بس

كتبت هالكلام كله وطولت عليكم لاني من فتره ودي ارسل لها مسج اكتب كل شي بخاطري واجعل بيني وبينها ربي واذكرها انه انا مالي ذنب ان زوجي مزواج فلاتزيد جروحي بتصرفاتها
لكن ارجع اقول هي مالي علاقه فيها الخلل من زوجي

ناقشت زوجي قلت انا حامل وتعبانه جد تعبانه ومضغوطه اسمح لي ارسل - يرد وحده بتمشي وش عليك فيها صارت مثل ابرة البنج اللي يسكتني فيها

يطلب مني ارجع احاول اكسبه واتبعل له

بالله وشلون بشرشف صلاه ؟؟ يقول حتى لو هجرتك اطلبيني - ماعاد لي قلب او طاقه والله انا كمان انثى ماعوضتني ماديا ولامعنويا ولاحتى بتعدل كيف بتكون نفسيتي

ظروفنا والله العظيم صعبه صعبه

اعذروني طولت عليكم لكن هل انتم معي ارسل لها المسج او لعل فيها خير وتذكر زوجي بالعدل وببيته وتخاف الله فينا

عزيزتي لعلّ.

أتمنى ألا تكوني قد أرسلتِ لها شيئاً.

__________________


اللهم طِيبَ الأثر .. وحُسْنَ الرحيل.