وعليكم السلام والرحمة


من حقك تشعرين بالتقدير والاحترام .. لكن من كلامك زوجك مو حاس بتقصيره .. ربما غير مدرك لحاجاتك
يعني المشكلة مو فيك ولا فيه في امر خارجي وهو نظام العلاقة

حسيت انه علاقتكم سايبة مافيها حدود وقوانين ..
مهامكم متداخلة ويمكن الظروف اللي تمرون فيها لها دخل وكونك طالبة برضو يأثر عالبيت من ناحية التعب والمسؤوليات فتحسين بالضغط بينما جهدك موزع بين دراستك وبيتك.. يعني دخلتي الحياة الزوجية في فترة مضطربة والانتقالات الكثيرة ما سمحت لكم ترسمون ملامح واضحة لهذي الحياة وهذا الشي يجي بالتدريج يعني يبنى سنة ورا سنة وهو الامر اللي ما اتيح لك

لكنك بنت ذكية .. وقادرة انك تدبرين امورك وتحسنين ادارة بينك وعلاقتك مع زوجك تحتاجين بس تعرفين اللي لك واللي عليك وتحطين خطوط واضحة لزوجك حتى يعرف متى يكون مقصر

مطلب اي زوجة من زوجها يتلخص بثلاث امور: اهتمام .. نفقة .. احترام

ركزي على هذي الامور .. طالما تحققت لك اي مطالب اخرى ممكن تكون هامشية او مترتبة عليها يعني اذا تحققت لك هذي الثلاثة بديهيا تلحقها الامور الثانية



هذي ملاحظات على طريقة تعاملك مع زوجك قد يساعدك تطبيقها:

لا تضعين نفسك في مقارنة مع اهله ابدا .. ابدا
ان كنت تحتاجين منه يقضي لك حاجة .. لا تفكرين كيف بيتصرف لو كانت لاخته .. ركزي على نفسك .. والموقف اللي تنتظرينه منه وطالبي فيه


سوي اللي عليك ولا تستنين منه شي .. اهتمي بابنك وبيتك وبامور زوجك من اكل ولبس .. انتي تسوين اللي عليك لانك بنت اصيلة ملتزمة بواجباتك وتخافين ربك


هذي الامور كل زوجة مسؤولة عنها بحدود طاقتها .. ولا تحتاج عليها مكافاة او شكر .. ان جت من الزوج فخير وبركة وان ما جت فانتي تقومين بها حتى لا يلحقك اثم في حال تقصيرك.. وان كان عندك عذر فعذرك امام ربك ولا يجرحك عدم مراعاته ..

حاولي ما تحطين شي من عندك لمصاريف البيت مهما كان طالما هذا الامر ما يلاقي تقدير.. والفلوس اللي يرسلون لك اهلك خليهم يجمعونها لك احسن طالما زوجك مقتدر ولا تاخذينها الا لشي انتي محتاجته زي رسوم الجامعة

موضوع المضايقات اللي تصير لك برا البيا بطلي تحكين له عنها .. وحاولي تتحاشينها قدر الامكان




كتبت لك هذا على عجالة وعندي نقاط اخرى بحاول اكتبها لاحقا ان شاء الله


الله يسخر لك زوجك ويصلح جميع امرك