أهلا بكِ عزيزتي

أمس كان هناك مشكلة فنية بالمنتدى .. موضوعك ما فيه مشكلة وبمكانه الصحيح ..

لي رجعة لموضوعك ..ليتك تكتبي شرح أكثر عن طبيعة المشاكل بينكم .. على ماذا تدور المشكلة وكيف توصل لأن للطلاق والتهديد به
وما أسباب طلاقكم المرتين السابقات؟ وكيف رجعتوا؟

وان شاء الله قريبا يدخل اخونا ابو حكيم للمنتدى ويكتب رده هو أيضا

__________________

السلام عليكم اخت Beta، اشكر اهتمامك جداً
انا بطبيعتي عصبية وهو عادي ولكن عنما يتعصب يكون شديد العصبية،لا انكر انه يحبني كثيراً جداً ، خناقتنا كلها هايفة حاجات صغيرة تقلب بخناقة كبيرة ويتعصب علية وفي اثناء عصبيته يقول انتي طالق ثم عندما يهدأ يندم ويقول مكانش قصدي اقولها خرجت من فمي من غير ما اشعر ويبكي ويقولي انا بحبك ومش عايز اخسرك.في اول سنوات زواجنا كان لما يزعقلي مثلا او يتنرفز علية للاسف كنت اتنرفز وازعق واقوله متكلمنيش كدة ومتغلطش لانه للاسف غلاط فبيستفزني وكانت الخناقة تكبر ويضربني ويشتمني ويقولي احنا مينفعش نكمل مع بعض وانا قررت اسيبك فأبكي واتحايل عليه واتأسف واتزلل واقوله انا بحبك ومقدرش اعيش من غيرك وبلاش نهدم البيت يوم اتنين تلاتة لغاية مايرضي يصالحني، بعد مرور االسنين هدأت كثيراً يعني لما يتنرفز او يغلط اسكت وادخل حجرتي وافضل فيها وهو يشعر بغلطه وييجي يعتذر حتي كانت آخر خناقة من اسبوعين تقريباً وهي كما ذكرتها من قبل تركني في مول ومشي وكنا ليلاً وذهبت للمنزل بمفردي واغلقت علية حجرتي وجاء ثاني يوم يزعق و يتهمني اني مشيت وتركته ،للاسف انا كنت متنرفزة منه جداً كيف يتركني من دون ان افعل له شيئا ويتلكك ويزعقلي ويمشي وانا لم انطق فقلت له انت رحت في داهية وسيبتني لوحدي بليل عايز ايه فضربني واخذ يسبني انا واهلي وانا لم ارد عليه وسافر وعاد ولم نتحدث الا بعدها بثلاثة ايام جاء يهدد كالمعتاد احنا مش هينفع نكمل مع بعض وانا مبقيتش بحبك وانتي كمان فقلتله لا انا بحبك بس انا كمان مش عايزة اكمل معاك عشان زهقت وتعبت من اسلوبك انت عمرك مهتتغير هو فوجئ بكلامي كان منتظر اني اتحايل عليه واني ماقدرش اعيش من غيره فبكي وقالي انا عايز ارحمك مني بس خايف اظلمك وكلام كتير وقالي احلفي ع المصحف انك عايزة تسيبيني قلتله لا مش هحلف قالي ازاي بتحبيني وعايزة تسيبيني قلتله عايزة احافظ ع كرامتي قالي بس لو تم الطلاق دي هتبقي اخر طالقة قلتله عارفة احسن عشان اخلص وميبقاش فيه رجوع قالي انا مش هطلقك نعيش منفصلين مع بعض عشان الولاد قلتله لا، طبعا انا بضغط عليه عشان يفهم اني جبت اخري معاه وزهقت عشان يبطل اسلوبه ده وانتهي الكلام ومن ساعتها كلمني مرة واحدة وبس ورحت اقوله حاجة اعد يعيط ويقولي انا مش عايز اكلمك وخلاص احنا اتفقنا اننا مش هنكمل مع بعض قلتله انت بتعيط ليه قالي انا اعصابي تعبانة وابعدي عني مش عايز اشوفك ومبيطلبش مني حاجة خالص، انا مش فاهمة هو عايز ايه كلامه قبل كدة معايا انه مش عايز نطلق وافعاله دلوقت انه هيطلقني عشان مبقاش بيحبني ، هو عنده مشاكل ف عمله هل يكون لها تأثير ع حالته دي ، انا بحبه لانه ف الوقت العادي طيب وحنين ورومانسي ، هل يعاقبني عشان قلتله انا كمان عايزة اسيبك ومش عايزة اكمل معاك، انا منهارة ومش فاهمة اتعامل معاه ازاي، هل اتركه كام يوم حتي يهدأ ؟ شكراً علي المس

حكتب مختصر جدا عشان تاخر الوقت عندي وبنفس الوقت مش قادرة اسيبك من غير رد لاني حاسه بيكي
جوزك عاوز يطلق مش عشان بقا دلوقتي مش بيحبك .... انما لانه تعب جدا وارهق ويئس من وضعكم واللي بيحصل ده كله منك ومنه
وزي ما هوا غلطان لانه بيتعصب أوي فإنتي كمان غلطانه لانك من البداية وهو الموضوع لسه هايف بتفضلي تناقشي لحد ما يوصل لحالة العصبية وبعديها بتسكتي وتهدي ... وده غلط يا حبيبتي.

هو مش حيطلق فما تخفيش وظروف شغله اكيد لها تاثير كبير

كان يودي لو تقوليلي الحاجات الهايفه اللي بتتخانقوا عليها
وكمان عاوزه اسألك اذا تاكدتم من الطلقتين اللي فاتوا من شيخ ثقة او قاضي اذا وقعم وللا لا ... لانه من كلامك جوزك بيكوت متعصب جدا لجرجى بينسى هو عمل ايه .. زي اخر مرة لما سابك بالمول وتاني يوم بيلومك ليه سبتيه

اعذريني حطلع من النت دلوقتي لكن عاوزاكي متخفيش وان شاء الله حكمل معاكي انا وابو حكيم لغاية متنتهي المشكلة وتعرفي ازاي تخليها متتكررش
تصبحي على خير

__________________

اشكر قلقك واهتمامك جداً ربنا يكرمك ويجازيكي خير.
اول طالقة لنا كانت في اول زواجنا كنت في اول حملي الاول واول مرة اسافر واتغرب واترك اهلي وعملي وحياتي كلها ومع الحمل في اول ثلاثة سهور كنت تعبانة جداً علطوول دوخة وترجيع من اي ريحة وكان لما زوجي يقترب مني اجري ارجع وكنت بتكسف اقول له عشان ميزعلش وكنت دائما تعبانة ولا اتكلم ففتكر اني اصبحت لا احبه ولا اطيقه وفي مرة ضربني وقال انتي طالق وترك البيت وكلم اهله وهم سألوا شيخ وقال يقع الطلاق بس يرجعها في ساعتها وخلاص وبعدها اعتذرلي زوجي وقال لي انا افتكرت انك بطلتي تحبيني.اما بالنسبة لخناقتنا الهايفة فسوف احكي اخر خناقة ، كنا كويسين جداً ونازلين نتفسح وكنت ارتدي عبايتي وهي بجيوب وليست اول مرة ارتديها معه وكان الجو بارد قليلا فوضعت يدي في جيبي واحنا في المول ففوجئت به يزعق ويقول شيلي ايدك من جيبك مش منظر العباية كدة بتبقي ضيقة مع العلم انها واسعة وهذه ليست اول مرة فقلت له ايدي ساقعة وانا مش شادة العباية خالص ومشيت ناحية المحل فجاء خلفي وشدني جامد من ذراعي وزعق وقال بتمشي وتسيبيني قلت لا انا مسيبتكش فقال شيلي ايدك بقول قلت له لو سمحت اخفض صوتك عشان الناس حوالينا قلتها بمنتهي الهدوء قال تحبي احلف عليكي طلاق دلوقت انا اتصدمت وقمت دخلت المحل ولم ارد عليه جاء خلفي وقال شيلي ايدك من جيبك وانا والله كنت شيلتها لاني كنت بتفرج علي الاشياء ف المحل قلت له شيلتها خلاص قام قال ثانياً تحبي احلف عليكي طلاق دلوقت قلت له احلف واستمريت في اني اعمل نفسي بتفرج حتي لا يتطور الموقف وهو مشي من جنبي وكان بيتفرج فانتقلت لمكان آخر ف نفس المحل فجاء من خلفي وقال انتي مش مستعنياني قلت له ليه انا عملت ايه فقال اقسم بالله انا ماشي وسايبك ومشي فعلاًوهذه ليست اول مرة يفعلها فعلها قبل ذلك وكان معي الاولاد وجريت وراه ركب سيارته ومشي ولما كلمته في الموبايل مبيردش علية، فالمرة دي قلت مش هجري وراه وتركته يمشي وكنت مصدومة انا لم افعل شئ يستحق رد الفعل ده عشان يهدد بالطلاق ويتركني ، هذا مثال للخناقات الهايفة . يا ريت تقولي اي لو انا غلطانة انا فعلاً مبقيتش عارفة اتعامل معاه ازاي ، احنا كل الي يعرفنا بيقولي زوجك بيحبك جداً وبيغير عليكي جدا طيب ليه كدة انا مش حاسة معاه بالأمان حاسة انه ممكن يسيبني في اي وقت وانا فعلا بحبه وعارفة انه بيحبني جداً.
عايزة اسأل حضرتك بتقولي هو مش هيطلق طيب حضرتك امال ليه مقاطعني وحلف انه مش هنكمل مع بعض واني لو عايزة مطلقش نعيش منفصلين، انا تعبت والله ومش عارفة اتعامل معاه مع انه في الوقت العادي طيب وحنين، اشكر تعبك وطولت عليكي ربنا يجازيكي كل خير.

معلش كنت عايزة اسأل حضرتك هو دلوقت مبيكلمنيش خالص ولما حاولت صدني وبكي وقالي مش عايزة اتكلم معاكي وانتي في حالك وانا في حالي، هل اتركه فترة ليهدأ ام احاول ان اتكلم معاه تاني اني بحبه واني مش عايزة اسيبه وقلت كدة بس في الاول لاني كنت مخنوقة منه؟

ايوا حبيبتي ابعدي عنه شوي لكن لو كلمك خليكي لطيفه معاه لأنه مضغوط جدا ومتضايق كثير .

يا ريت لو تقضي كل وقت فراغك الفترة دي بقراءة القرءان ... انتي عارفه القرءان بيهدي النفوس ولما يكون مقروء بالبيت بتهدى نفوس كل اللي بالبيت وربنا بيبعد عنكم وسوسة ابليس .

من شرحك لطريقة تطور مشاكلكم لاحظت أنك بتحاولي تسكتي وتبعدي عنه ... لكن ده مش صح دايما ومش كل طرق السكوت صح .
لما كنت بالمحل وطلب تشيلي ايدك من جيوبك وشفتيه بدأ يتعصب كان التصرف الصح أنك تشيليهم ولما يهدى تناقشيه برأيك ... الكلام معاه ومحاولتك تفهميه المنطق وهو متضايق وغيران مش حيجيب نتيجة ولا حيسمع حجتك من أصله .. هو مش حيشوف غير أنك مسمعتيش كلامه وبتعاندي فيه .
ولما تبعدي عنه وتروحي مكان تاني خلال النقاش وكأنك مستسخفاه وما يستهلش تكلميه من أصله .. ده مش تهدئة

المقصود بالسكوت هو السكوت عن النقاش وقبل ما يتطور الموضوع ..
لما تروحي البيت تبقي تناقشيه بطريقة يفهم منها أنك طوع أمره بس برضه بالعقل والمفروض أنه هو كمان يسمعك ويفهم نظرتك .

أمور الغيرة بالذات صعب النقاش فيها والرجل عادة بيقفل مخه معاها .

الله يجيبك يا أبو حكيم ... ان شاء الله حتلاقي برد أبو حكيم الحل .

ولي رجعة ان شاء الله

__________________

حاضر هبعد عنه وهو مش بيكلمني خالص ولا بيطلب مني شئ، بس هفضل كدة لغاية امتي ؟ربنا يجازيكي خير وفعلاً انا بقضي وقت فراغي في قراءة القرآن والتسبيح والدعاء

معلش احب اضيف لحضرتك اني بقيت بسكت وبمشي لما يحتد النقاش ليس استخفافاً به وكلن حتي لا يتطور الموضوع لان زمان كان يتنرفز احاول اشرح وجهة نظري وادافع يشتعل الموضوع فبقيت ابعد حتي يهدأ هي دي بس وجهة نظري وفعلا ممكن تكون طريقتي غلط ، انا فعلا محتارة