شوفي دامك في بيت الناس ما معاك الا تسايري وتمشي
وضعك ماله حلول جذرية ... مثلاً قسمك لو قلت لك غيري الباب
السحاب وحطي باب ثاني ينقفل ... انت ممكن ترتاحي لكن
راحة مؤقتة وراح يدخل الشيطان بينك وبينها وراح تفسر وتؤل
وتبدا حرب عن حق وحقيق...

المناسبات والخرجات كلمه وحده قوليها مافيني اروح
واسحبي نفسك او غيري الموضوع اووتبسمي وهي تعيد وتزيد
ولما يجي الوقت الموعود اطلعيلها وانت مو متجهزه
وان سألتك قوليلها انا مو اخر شي قلته لك ما ابغى اروح!!

لا تجلسي حاكره نفسك وتفكري فيها قصدها ولا مو قصدها
وتتعبي قلبك ... انا اشوفها وحده تحب تسيطر على حياتها
ولا حظي انت اللي في بيتها مش العكس عشان نقول ممشيتك
على كيفها...

واخر نصيحة اقولها لك من تجربة ... اذا حياتك انت وزوجك
ماشيه تمام والادمي متعلق فيك ومايحب يزعلك ولك بصمة
واضحة على حياتكم الزوجية كل امورك مع
اهله تتعدل لانهم يخافو يوقعوا مع ولدهم ويخسروه
وعلى فكره الحريم مافي ادهى منهم ... ومن نظره يعرفوا
الحرمه اللي مكوشه على كل شي في حياتها
من شخصيتها من لبسها حتى من كلامها ويهابوها كثير
لان عينهم على ولدهم في النهايه ومايبغو مشاكل معاه
هذا اذا كانو هم والمشاكل حبايب .... وفي اهل لما يشوفوها
سعيده مع زوجها ويسمع منها يدعولها لانهم يبغو لها زي مايبغو
لبناتهم ...

المهم اسسي حياتك مع زوجك وبقية الناس محطات مؤقته
في حياتك ...