السلام عليكم ورحمه الله وبركاته
كيفكم احوالكم علومكم
بدخل بالموضوع على طول وبسال اهل الخبره عارفه انكم بتفزعون لاختكم ومنتم بمقصرين
شوروا عليه بالحل الافضل ووضحولي الاسباب نخيتكمياهل النخوه
الموضوع انا اللحين والحمدلله والفضل له حامل بالشهر التاسع وتعبانه واسال الله الفرج من عنده وتسهيل الولاده امين
نجي للمشكله ابو زوجي ساكن في شقه ومعه شغاله اندنوسيه ولكم عليها شوي يعني عادي تقعد وتسولف مع اولاده وضحك وسيقانها باينه لمى تقعد اللحين انا ودي اروح النفاس عند امي لان مافي احد يخدمني مافي حرمه وامي ماتقدر تترك بيتها لان ابوي تعبان نفسيا وتهتم فيه واخوي وزوجته جايينها بعد اسبوع وبيقعدون عندها شهر واسبوعين ويش اسوي اولد عند امي واسيب زوجي مع ابوه والشغاله لحاله لان ابو زوجي عجوز مرره وهي تداري وزوجي قالي ماراح اسيب ابوي بقعد معه وانا ساكنه بشقه معهم بنفس العماره وسلفتي بس زوجها مسافر ومايجي الا مره بشهر وماهي بطاله على ابو زوجي
اخوات زوجي اللحين متناوبين على ابوهم لان ام زوجي توها ماتت الله يرحمها لها اسبوعين
لاكن بعد فتره واللين اخلص التاسع والنفاس مدري ويش يصير بيقعدون زي كذا ولا بيلتهون وتخف زيارتهم
زوجي عنده اختبارات 25 هالشهر اللين 6 الشهر الداخل بينشغل فيها وكان بيننا سحر ربط بيني وبينه وتحسن شوي وشكينا بالشغاله والله يابنات خايفه ماودي ارجع الاقي الدنيا مطبقه فوق راسي ولازوجي تغير علي واللي يسالني واثقه فيه اقولكم ايه بس الشغاله ماخلتنا بحالنا وام زوجي معاه في البيت الله يرحمها كانت تراقبنا وكانت تسمع اصواتنا من الشباك بيننا منور واذا ماتصايحنا تسال ام زوجي تقول لهم كم يوم هاديين شورو علي اروح واخلي زوجي مع ابوه والشغاله لحاله ولا اخذ لي اسبوعين وارجع لان اهلي بعد اسبوعين بيسافرون ابها يصيفون ولازم اسافر اسبوعين كمان وارجع طياره وعندي اطفال من يخدمهم ويداريهم؟
شوووووووووورو علي تكفون؟

وابو زوجي كبير في السن الله يطول بعمره على الطاعه وطول وقته نايم غفوات وقيلوله وهي توصد الباب من جوه زوجي عنده مفتاح بس مايقدر يخش لازم هي اللي تستقبله وتفتح له وتقفل الباب من وراه وتعرفون انتم قصص الشغالات

ام زوجي الله يرحمها راحت وتركه وراها فراغ اقسم بالله ماني مصدقه انها ماتت
الله يوسع عليها قبرها ويسهل حسابها ويرحمها ويرحمنا الدور جاينا

ايش تقصدي اختي بينك وبين زوجك بسحر ربط

سحر الربط يعني زوجي مربوط عني مايطيقني ويكرهني وكني اخته بالبيت

مافي احد عنده مساعده ولو دعوه

روحي انفسي عند امك وتحصني يوميا وحصني زوجك ..لو كل واحد فكر نفس تفكيرك كان لقيتي الرجل دايماً لازق بزوجته والزوجه لازقه بزوجها..في شي حبيبتي اسمه تفويض اموري إلى الله

عزيزتي نصيحه لاتروحين خليك وجيبي لك شغاله لك اسبوعين على الاقل حتى يقوى ظهرك
وانا بكريه وربي ماخليت زوجي نفست ببيتي لان خفت عليه من الوحده ويرجع يكلم بنات امي جلست معاي عشره ايام وخدامه اسبوعين بس اهم شي لاتتركين زوجك ابدا
لازم نضحي ونتنازل في سبيل نكسبهم
الله يسهل ولادتك وترجعين لبيتك بصحه وعافيه

اجلسي في بيتك
او روحي لامك واجلسي اسبوع وارجعي بيتك

أتوقع إذا ذهبتي لبيت أهلك لن تشعري بالراحة
لأنكِ ستعانين التغييرات النفسية نتيجة تغير الهرمونات السريع بعد الولادة
و معها ستعانين انشغال بالك على زوجكِ
فالأفضل كما أظن أن ترتبي أمورك منذ الآن للولادة في بيتك .

كان الله في عونك و حفظكم من كل شر .

__________________
أستودعكم الله الذي لا تضيع ودائعه .. و احفظوا عني :
إن لم تكن إنسان إرادة تلتزم بفعل ما تريد فكن إنسان شغف و أحب ما تريد الالتزام به و ستنجح بإذن الله .