احس بعض الأخوات كلامهم عاطفي جدا ..
وكله منصب على لوم الرجل و حبه و و
مع اني احس موقفكم متساوي ..
انتي غلطتي عليه وهو قابل الغلط ب انه انجرح وتألم
شي طبيعي جدا وعادي ( لكل فعل رد فعل )
ما احس بأنه له علاقه لو كان بايع او لو كان يحب او لو لو

عادي احنا ياما نزعل من الناس اللي نحبهم
وتظهر منا تصرفات ك رد فعل للي سووه معانا
لكن يبقى القلب يحمل كل مودة و تقدير
وهذا الشي اللي أبيك تركزين عليه
( طليقك يحمل لك كل مودة و تقدير لأنه قال لك هالشي حرفيا و هذا هو المهم )

اتمنى لك الرجعه له من كل قلبي
اصعب ما علي اني اشوف قصة طلاق بهالمنتدى ، رغم اني ما اعرف احد هنا
مهما كان الطلاق ايجابي للطرفين

اللي أبي اقول لك اياه
اني مدري ليش احسك ما تعلمتي من تجربتك معاه
والدليل انه اول ما ( تبادر لذهنك انه طوى صفحتك معاه ) انتي طويتيها !
وفكرتي ب ولد عمك وكنتي على استعداد للموافقه
وفي احد ردودك كتبتي انا في مرحله اني انسى طليقي !

حسيت ردات فعلك متسرعه وعجوله وعاطفيه !
وما احسك تسمعين الا لصوت نفسك ( مهما تكلموا الاعضاء )

صدقيني انا هنا مو حاقده
لكن يمكن اشوف شي غيري مايشوفه

حبيبتي ارجع اقولك كلام قالوه لك اللي قبلي :
رجاء رجاء فكري زين بالشي اللي تسوينه و تبعاته
سواء رجعتي له او ما رجعتي !
فكري ايش هدفك من الرجعه ؟؟ ليش تبينه ؟؟
هل انتي فعلا ما زلتي متمسكه فيه ؟؟
هل ندمك عليه ندم وقتي ؟؟
هل ندمك سببه مخاوفك مو سببه حبك الحقيقي الصادق له
واحترامك لمواقفه و رجولته ؟؟

حاولي تعرفين نفسك آكثر عشان تتصرفين بوضوح
و ب منطق وبدون ردات فعل متعجله وعاطفية ..

و الله يوفقك
و زي ما قلت لك اتمنى لك الرجعه
لأن حلو ان الواحد يخلي هدفه انجاح علاقة الزواج مع شريك حياته بكل وسيله
لو كان الشريك مميز وممتاز مو لأن ( نظرتي سلبيه او مو متوقعه ان ربي ماراح يرزقك او كل الشباب سيئين ، بس لأن الأشخاص مو زي الفساتين اللي مايعجبني أخلعه و أرميه )

طمنينا عليك