تبا الصدق، العيب فيك انته...
يعني لو انا مكانك و عالطالعه و النازلة اسمع كلمة طلقني صح بتضايج بس بسال نفسي انا شو سويت غلط علشان الطرف الثاني يفكر ينهي حياته معاي،، بسال عن اخطائي او عيوبي و اذا قدرت بغيرها او بوصل لحل وسط.
بس انته على طول تفترض انه العيب فيها هي،، و عقب اتي هني و تسال اذا كل الحريم جذه، عبالك العيب من الحريم بس و الرياييل معصومين من العيوب؟
هل انت بس تحسب حساب اللي تعطيه و ما تحسب حساب اللي ما تعطيه؟
و ليش يعني يوم ما تلاقي اللي تبيه، لازم تغث الواحد ولا تمسكه من ايده اللي تعوره؟
ما تعرف تكون مسالم؟
على فكره يعني هذه الحركات و التحكم و الممنوعات نوع من انواع الانانية و عدم ثقه و نقص في الشخصية. و انا اعرف هالشيء لانه فيني ويوم قريت عنه طلع المعنى جذه
و على طاري الدراسه منو قال حقك انته! حق نفسها و علشان تطور من نفسها، ولا ممنوع تطور من نفسها و ثقافتها و مستواها التعليمي، حتى الدين يحث على العلم. بس عسب تعرف انك اناني، بتسوي الشيء اذا فمصلحتك، علشانك! عيب هالكلام!
تعرف شو لازم تفكر بخصوص مسالة الدراسه، بخليها تدرس علشان اكيد بتغرس حب التعلم و الطموح و الثقافة بالعيال، و علشان عيالي يفتخرون بأمهم، و علشان امهم تكون قدوتهم بالدراسه. و علشان امهم ما تكون اقل علميا من البنات اللي قدها مع انها احسن منهم ماديا و علشان ما يقولون ابونا ما خلى امنا عناد! وصلتلك الصورة. بتطيح من عينهم الصراحه لو طلعوا حقانيين وما يرضون على احد هالتعامل.
انته اسلوبك عطني شيء و بالمقابل شيء نفس التجارة، ما عندك صدقات و دفع بلا...
لانه يا اخوي لو كنت اتنازلت شوي، او سكت عن شيء موب عايبنك و مشيتها يمكن ما كنت بتوصل هالنقطه. و بعدين يمكن الشيء اللي موب عايبنك الحين و تشوف ماله فايده يعيبك عقب يوم تشوف فوايده اللي موب قادر تشوفها او تتوقعها الحين! خاصه اذا الشيء ما منه مضرة!
بس انا اشوف انه انت مو متعود على كلمة لاء و هذه هي مشكلتك.
عموما حتى لو حليت هالسالفه بتي مره ثانية و بتشتكي من شيء ثاني. و اول شيء بتفكر فيه انه تغير الشيء اللي موب عايبك في الطرف الثاني او في الموقف او المشكلة... بس هل فكرت مره انه بدل ما تغير اللي خارج نفسك تغير اللي داخل نفسك؟
انت أو اي احد و حتى انا ما بنقدر نغير او بمعنى اصح نتحكم باللي ايي صوبنا،، بس نقدر نتحكم و نغير ردود افعالنا و انفسنا.
وهالشيء موب سهل، بس انك تغير نفسك و تفكيرك مره وحده وايد اسهل من انك كل شوي تغير غيرك.
وعموما، جرب تختلط بناس من طبقات ثانية و لا تحكر نفسك على مجتمعك الطبقي لانه كلهم نفس التفكير.. شوف كيف الناس الثانية و كيف تفكر.
حاول تعرف نفسك و شو معدنك بدون الفلوس، بعيد عن محيطك المعتاد.
و دوم حط في بالك، يمكن هاييل اللي كل مره يمدحونك بس يبون يسمعونك اللي تبيه. شيء نادر حد يقولك الصدق في ويهك.

الله يوفقك