كتير عم يتسائل اذا موجود الحب الحقيقي
وكتير مستكثرين عليه وصف انو حقيقي
الحب الحقيقي شي كبير وبالفعل متل ما سبق وقلت موجود
ما رح اتكلم عن جدي وجدتي ولا ابي وامي ولا جد ابي اللي رفض الزواج من بعد موت زوجته وكنا نسمع اجمل الحكايات يقصها علينا عن ذكرياته مع جدة ابي رحمة الله عليها والاحتفاظ باغراضها
رح احكي عني وعن زوجي وفي متلنا اكثر وحبهن اقوى
حب زوجي حقيقي فعلا وقولا
رح احذف كل الفترة اللي كانت بس كلام اللي بعبر عن الحب وكل الايام الحلوة اللي بتثبت هالحب
رح احكي عن شي ببين معدن الشريك وببين نوعية حبه
ورح ركز على نقطة وقت مريت باسوء مرحلة فحياتي
وهيي الوسواس القهري
وحاولت كره زوجي فيني
واهملته فترة سنتين ووصلت معي قبل ما اتعالج اطلب انو يتركني
بعز صراخي وكلامي الجارح ليتركني كان يضمني ويقلي مستحيل اتخلى عنك
كان يقلي حياتي من بعدك ما الها معنى
كنت اطلب منو يروح يشوف احلى مني وانسانة تقدره
كان يجاوبني انا بدي ياكي انتي فقط وما بدي حدا غيرك ولو عرضوا عليي حور العين
كان يقلي انا راضي فيكي بحالتك هلئ ورح اصبر عليكي لاخر يوم بعمري
كان يقلي انا اخدتك بعز شبابك وصحتك كيف بدك ياني اتخلى عنك بعز ازمتك
كان يقلي اتزوجنا وما بفرقنا الا الموت وربنا جمعنا مع بعض وهوي اللي وحده بفرقنا
احتواني كتير
ووقف جنبي كتير وصبر كتير
ودايما بيمدحني وين ما بيكون
هالشي عذبني دمرني بوقتها لانو ما قادرة بادله اللي عم يقدمه
انا كيف رح انسى مواقفه
انا مستعدة عيش معو عالخبزة والزيتونة وبيكفيني
وانا كمان وقفت معو اول زواجنا واتحدينا الظروف بس ما وصلت لدرجتو
انا بحبو حب حقيقي وبنفس الوقت بحب نفسي كتير
وياما ناس فكرت اني ساحرته وكانوا بين كل فترة بس يحاولوا يظهروا سيئاتي فما كان يشوف الا ايجابياتي ويتمسك فيني اكثر
بعد 14سنة زواج من ضمنهم سنة تعارف مع خطوبة
حبنا الان اقوى وامتن مع انو بمر بعاصفات مشاكل زوجية اللي بشوفنا بقول كيف عايشين مع بعض
بس بعد كل عاصفة بنتعلم اكثر وبنتمسك ببعض اكثر وبنفهم شخصية بعض اكثر وبنتقبل سلبيات بعض اكثر
حبنا الان كأنو انولد امبارح بنحدد حياتنا مع بعض وبننسى انو متزوجين وعندنا اطفال
بنرجع نتقابل ونتعرف على بعض ونحنا بنخترع قصص وبنعيشها وبنصنعها

وقت تحس بالامان مع الشريك معناتها الحب حقيقي
وقت تخاف انك تجرح مشاعر شريكك معناها الحب حقيقي
وقت ما تحب تفارقه ودايما بتذكر الذكريات الحلوة بيناتكن وبتنسى او بتتناسى الذكريات الحزينة او المؤلمة معناها هيدا حب حقيقي
كلنا بنقدر نحب حب حقيقي
بس نعرف نعطي متل ما بناخد
وقت نرضى انو ما في حدا كامل

وقت نوصل لقناعة انو الشريك بقدر اكتفي منو واللي موجود عنده موجود بغيره والشي اللي ما موجود عند غيره وموجود فيه هيي روحه الطيبة اللي بتبقى طاغية مهما كبر الشريك بالعمر
خلونا ما نعيش بصراع مع الشريك ونترك البخل العاطفي
خلونا ما نجرح غيرنا لنبسط نفسنا
خلونا نربي جيل يرجع يتحمل مشاكل الحياة ويتخطاها وتخف نسبة الطلاق وما تصير هدم البيوت بسهولة
احترامي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه