ماني عارفه اطلب منه اروح لاهلي بالواتس او انطره لين يجي مع اني عارفه ماراح يجي الا بكره الظهر وانا نايمه ... لانه طول يومه برا البيت ومع اخوياه واهله .. ربي حسيبي فيه

وردة كيف ضربة عينك؟؟
و هل هو اهتم هاليومين باحضار مقاضي البيت

هل هذه عادته كل رمضان ما يفطر و لا يتسكر معك


طيب. ممكن حل وسط انك تأمنين سرك على اخوك
و يجي لزيارتك

__________________

لا هو ما يهتم بمقاضي البيت بس يسأل تبين شي قبل يطلع ... ايه هو كل رمضان يقطر عند اهله بس كانت فيه ايام يتسحر معاي هالسنه لا ما اشوفه الا الظهر واكون نايمه اذا جا .. طبعا رمضان اللي فات حده سهر لين 6 رمضان هالسنه لين 12 الظهر او 12 ونص ...انا مستغربه من بروده مابي منه شي بس ليش يحسسني انه ما غلط بحقي وانه ماتسبب باذية انسانه .. الحمدلله عيني خف الانتفاخ شوي بس لازالت الكدمه اليوم وانا اخذ بنتي هو شاف وجهي وحسيت من وجهه استغرب او اندهش نظرته لي كانت مو عاديه وانا ماره ضمني بس بعدت بسرعه عنه .. لو حاس بخطاه ليش ماجا وقال اتفاهم معها اطيب خاطرها خلاص انا عرفت مكانتي عنده وما الوم نفسي اذا انا اكرهه انسان اناني يبي حقوقه مني كامله لكن بالمقابل مالي حق ودايم يقولي انا رجل وانتي مراه عايش عصر الساده والجاريات يارب عوضني خيرا منه

طيب لمتى بتنتظري؟؟

__________________

بقول لك شي بس لاتزعلين مني
ضعفك هو الي مخليه يتمادى
خيانه ومشيتيها وضرب مو ناويه تعلمين اهلك
ولاناويه تطلعين تقرير
طلما انك مارحتي لاهلك ولاسويتي ولاشي فهو ضامنك
ولاتكابرين وتقولين مااحبه
لانو مجرد ماتوصل ورقتك هنا بتحسين
مشكله بعض النساء الي انا منهم تكابر
طيب واهلك وين راحو ياشيخه هذا مو رجال
هذا شبهه رجل وتلاقينه

بين الرجال مايتكلم من الخوف
اذا رحتي لاهلك واسالوك عن عينك وش بتردين عليهم؟؟؟؟!!!!
ياختي الضغف الي فيك مايجيب نتيجه لازم موقف قوي
من قوته

مايسترجي يمد ايده عليك
المؤمن القوي خير من المؤمن الضعيف
لو تتطلقين وتتزوحين مره ثانيه بيصير نفس الشي

لان من داخلك ضغيفه
بكره كيفك بتربين عيالك وانتي مو قادره تاخذين حقك
الطلاق مو حل انت مثل مريض السكر الي رفض ياخذ العلاج
وقال لهم ابترو اصبعي ماعندك حل وسط
معليش قسيت عليك بس اعتبرك مثل اختي

__________________
استغفر الله وأتوب إليه

طيب انتم برايكم الحين ايش اسىوي ،؟؟؟؟ طبعا التقرير ماراح اطلعه انسووو اقلها بس لاعرف انو معاي تقرير ياخذه من يدي ويقطع التقرير ويمد يده للمره الثانيه ... اما اهلي قلت لكم انا معاهده الله ونفسي ما ادخلهح بشي ابد ابد لان كافي اللي صار قبل ثلاث سنين كافي ضياع عايله كامله بسبب مشاكل بيني وبين زوجي وبين طرف ثالث تطلق .. انا ما اقدر اوضح لكم الخلاف اللي بين العايله لكن اللي اعرفه ان ابوي منقهر من اهل زوجي ويبي طلاقي اليوم قبل بكره بس وافق اني ارجع لزوجي عشان اطفالي وقال لولا اطفالك والله ثم والله ماترجعين لين يحطوني بقبري( بعد عمر طويل يارب ) وعلى فكره ترا لاتطلقت عيالي ياخذهم ابوهم انا من دوله خليجيه قريبه من السعوديه وزوجي سعودي يعني راعو اختلاف البلدين بكون بمدينه وعيالي بمدينه .. انا عيالي اطفال صغار تحت بعض اكبرهم 5 سنوات واصغرهم سنه ونص،.. مرات افكر بالطلاق واقول عيالي مايضيعون مرات لا احس نفسي ضايعه مشتته احس كرهته ودي انتقم منه بس ماني عارفه شلون

التقرير كان وقت ماضربك ..مو الآن بعدما خفيتي..
ثانيا هو اش عرفه معاك تقرير إلا إذا إنت اتهورت وخبرتيه..
ثالثا يا أختي نحن لا نملك عصا سحرية لعلاج مشكلتك..لا تبين تخبرين أهلك ولاأهله ولا طلعتي تقرير ينفعك بيوم من الأيام..
وش تبين حل..
والله يا ختي مالك إلا الصبر والدعاء..الله يفرج همك ويصلح حالك..

انت مو قلتي انك في العيد بتزوي أهلك. صح
باقي يومين على العيد
اذا كان واضح الأثر في عينك. ماذا ستقولين
والامر الذي حدث من ثلاث سنوات
يمكن ابوك يتعقل هالمرة و يفهم ان المقصد قرصة. و عقاب و ليس طلاق
ماذا كان موقف زوجك المرة الاولى. و كيف تعامل معك لما رجعتي
السنوات تتقدم و المواقف تتغير. مو لازم الأحداث بتكون مثل ما انت متوقعة

__________________

الحل خلاص اسكتي ومشي حياتك ولو انطقيتي مره ثانيه عادي تحمليها بروح رياضية وبوسي رأيه بعد وانتهينا هذا هو الحل المتبقي ..

زوجي لما صارت المشكله قبل ثلاث سنين رافض يطلق مع اني كان ابوي طالب الطلاق وارسل ناس وابوي ردهم وجا هو وابوه وابوي رفض يستقبلهم لكن مع الايام وافق ارجع طبعا بعد ترجي عمي لابوي وباس خشم ابوي وطلبه باني ارجع لزوجي عشان عيالي حتى لو هو مايستاهل ووافق ابوي ورجعت وتعامل زوجي معاي كان جدا جدا جميل وكان يقولي فقدتكم وووووو ... اما موضوع اني بروح لاهلي بالعيد ايه بروح بس ماودي اكلمه ابدا ... لاني احس قلبي مشحون اتجاهه ... وكثير من الاعضاء قسوو علي بردودهك لكن انا بختصر الموضوع وماراح اكتب اي جديد في موضوعي لان اكتشفت انو يا اطلع تقرير طبي يا اعلم اهلي يا ماعندي كرامه .. لا عندي لكن مابي اخذ قرار وبعدين اندم عليه عشان كذا جيت وكتبت موضوعي تساعدوني مو تجرحوني وتقولون الكرامه والكرامه لو ماعندي كرامه كان شفتو قلبي سليم له لكن انا قلبي مشحون منه واحس بكره فضيع له واحس مو طايقه اشوف وجهه او حتى ارسل له رساله اطلب فيها انو اروح لاهلي .. اشكركم جميعا والله يتولاني فهو ارحم بي من امي وابوي .. استودعتكم الله