مشكووورة اختي عالرد والله يرزقك اللي ببالك ويسعدك يارب بس حابة اوضح انه هو ما قد طلقني انا.. انا اقصد انه كان متزوج قبل وطلق قبل زواجنا بكم شهر بس واعتذر عن عدم التوضيح ..
يعني انتظر؟؟ .. انا راح اشوف اليوم اخلي امي تكلم ولد خالتي ونشوف مع اني احيانا الشيطان يوسوسلي وافكر انه ولد خالتي مو قاعد ينقلي الصورة كاملة عشان يصلح الموضوع بس الله كريم وعلى اساس هالشي ان شالله اقرر اكلمه واكلم اخوي او أأجل الموضوع .. دعواتكم ..

السلام عليكم ورحمة الله وبركاته
اسعد الله صباجكم وعيد سعيد وينعاد عليكم بالصحة والعافية يارب ..
كنت حابة اني ارجعلكم بمستجدات تفرح او عالاقل شوية تطورات بالموضوع بس الحمدلله على كل حال .. مع انه ما صار شي بس حسيت اني حابة افضفض شوي انا حاولت اني اكلم اخوي بس مارضي يكلمني ويقولي مالك دخل ومتزاعل مع كللل اللي بالبيت من قبل رمضان والى الان ما ندري ليش او من ايش زعلان ولا يكلم اي احد فينا الله يهديه والوالد يقولي ارجعي لاخوك يعني مافي فايدة .. ما علينا المهم اني حاسة بمشاعر متناقضة جدا فترة اقول اني ابي ارجع لزوجي ولما اقرا رسايله اغير رايي وصلت لمرحله ماني عارفة اذا احبه او لا ماني عارفة اذا كنت اصلا لسة ابيه او لا والاخبار من ولد خالتي انقطعت بحكم انه عيد وماحد فاضيلي انا ومشاكلي فما ادري خايفة من اللي جاي خايفة اتطلق وخايفة ارجعله وخايفة اقعد معلقة عند اهلي ماني عارفة كيف اتصرف لاني ماني عارفة ايش ابي حتى لما استخير ما اعرف على ايش استخير لاني مو عارفة اي قرار باخذ .. اسفة ان كنت غثيتكم بدون داعي بس جد مو عارفة ايش اسوي ولا تنسوني من دعواتكم والله يكتبلي ويكتبلكم الخير يارب وان شالله اطمنكم عني قريب وارجع اشكر كل من رد علي وساعدني ولو بدعوة وما نسيتكم وان شالله ما حنساكم من دعائي .. في امان الله

الله يفرج همك حبيبتي استخيري الله يختار لك الخير. حاسه فيك الحياه بدون زوج ضياع وصعبه جداً. الله يصلح حالكم.

__________________
حينما تتخذ القرار الصحيح لا تبالي لقلبك ؛ تألم يوم، شهر أو حتى سنة بقرار عقلي صحيح ، أفضل من أن تتألم طيلة حياتك بقرار خاطئ من قلبك".

امين يااارب وتسلميلي اختي عالدعوة

دامك تبينه اذا طلب رجوعك ارجعي
ثقي انه لو فيه صفات طيبه وخلوق سيتجنب مسبة اهلك
اصبري واركدي راح يجيك انا متاكده

__________________
من عاش لله ومات لله فقد ربح دنياه وأخرته...

ارجعيله يابنت الحلال
محد نافعك صدقيني بكره إذا تطلقتي إنتي الوحيده بتدفعين الثمن
فوق هذا كله اليوم يشجعونك بعد طلاقك يلومونك و يضغطون عليك
تصييرين مثل اللعبه بين إيدين أهلك لأنك سمحتيلهم مره وحد يتدخلون بحياتك
رح يتعودون يتدخلون كل عمرك إذا مالحقتي نفسك وحططيتي حدود لحياتك الخاصه
و فوق هذا كله مارح يكونلك كلمه ولا رأي عند أهلك
بيزوجونك على كيفهم يازعم إنهم أدرى بمصلحتك و عشان ماتطلقين مره ثانيه
إنتبهي تخربين بيتــك ماأحد نافعك
ياما زوجات عيبوا بخوات أزواجهم و أزواجهم يسمعون و عارفين
مافيه ولا واحد منهم طلق زوجته لعيون خواته ! ماسألتي نفسك ليش
هذي كلها تفاهات قيل و قال حكي فاضي إنتي مالك ذنب
ليش تتطلقين عشان ترضين أهلك بكره لو تطلقتي
إذا حسيتي بالوحده لحالك أو أحتجتي لأحد
محد من خواتك أو اخوانك بيترك بيته وأولاده لعيونك عشان يونسك ويقابلك ويشوف طلباتك
أصحي و فكري بعقلك !
أنا أكلمك بحرقه لأني مجربه مأساة الطلاق
و معاملة الأهل بعد الطلاق

__________________

اللهم أكفني ما أهمني بما شئت و كيفما شئت إنك على كل شيء قدير

انا اشوف انك متعقله واتبعتي خطوات طيبه و امك بجنبك والأعضاء ماقصروا نصايحهم طيبه

نصيحتي انك تكثفي الدعاء وتتصدقي بنية الفرج

ألحي بالدعاء وتحرّي اوقات الاجابة
فرج الله همك عاجلا غيرا ءاجل

في البداية يجب أن تكون الرغبة لدى زوجك بالعودة ... تأكدي مرة أخرى برسالة هل أن تريد ترجعني ولالا ... جاوبني لك صدق؟ هكذا .. إذا قال نعم .. فقولي لوالدتك بكل مشاعرك ودعيها ترتب مع والدك لعقد جلسة صلح مع والدك بينه وبين زوجك ... وأن يأتي زوجك مع عمه ووالدك يكون متواجد مع أخوك للبدء بصفحة جديدة ... الرغبة مطلوبة قبل كل شيء ...

اختي ترى هذا زوجك ما في اي احد بالعالم يقدر يمنعك عن زوجك اذا تبينه حتى لو كان ابوك انتي لكي الحق تماما انك ترجعيله بدون علم اهلك لان هذا زوجك وصار ولي امرك مو ابوكي..لكن حاولي ارضاء ابوكي واخوكي اجتنابا للمشاكل المستقبليه لان مهما كان هذول اهلك .. لكن الصراحه الا الزوج واشلون هم يتحكمون بطلاقك منه مو بكيفهم انتي الحين مسؤوله من زوجك من من اهلك والله يصلحلك الاحوال

السلام عليكم اخواني واخواتي ،، صباح الخير
حابة اشكر كل من رد علي بنصيحه او دعوة
اخواتي بنت غالية ، رزان طلت ، E V A , leprof_86 واخوي زوج متمرس شكرا من جد واتمني تكونون بصحة وعافية يارب
اتمني جد اني ما اكون ثقلت عليكم بس جد لقيت بهالمنتدى اللي مالقيته باحد ولا حتى اهلي كل مالمح بالموضوع يتهربون ،، الحمدلله على كل حال عالعموم حابة اقولكم على اخر الاحداث بالموضوع مع انه ما اتوقع راح يكون له حل بس عشمانة بدعواتكم لي ..
قبل كم يوم وصلني خبر ان زوجي قبل العيد كان يجي الين باب البيت عشان يرجعني بس اخوي الله يهديه ما كان يرضى يستقبله فبعدها قررت اني اكلم زوجي و بمجرد ما ارسلتله رساله انه ياليت نتكلم لما يفضى رد علي وقال اذا حابه ترجعين فاهلك عارفين العنوان وكلام فاضي ما اسمح .. بعدها بيوم تقريبا ارسلتله رساله ما ادري كيف ارسلتها ( قدر الله وماشاء فعل) عالعموم كان مضمونها انه اللي قاعد يصير معانا ممكن يكون بسبب الكلام اللي كان يقوله في زوجته الاولى واهلها وخواتها وانه مستقبلا راح يكون عنده بنات ولسه عنده خوات فلازم يخاف عليهم ( للعلم انا هالكلام كان في بالي من بداية الزواج بس كنت امسك نفسي واقول ما حتدخل بس في الاخير ما قدرت) عالعموم قالي الكلام ما يخصك وما اسمحلك تقولي كلام فاضي لا عنها ولا عن اهلها ((( وشوفي نفسك))) مع اني يشهد الله اني ما قد جبت سيرتها لا بشين ولا بزين واذا تكلم عنها اسكت وما اقول شي مع انه يقول عنهم كلام استحي حتى اني اسمعه وقاللي اذا تبين ترجعين للبيت اللي حلفتي انك ما ترجعيله واللي طلعتي منه بدون رضاي خلي اللي اخذك يرجعك انتي وعفشك ( مع انه هو اللي حلف اني ما ارجع اذا طلعت وهو اللي اتصل على اخوي وقاله تعال خذها ) المهم ورجع قال لا عاد ترسلين شي وكلام فاضي ما ابي وان الشرع حلله 4 ،،
رايي بالموضوع ادري ان اخوي غلطان وادري ان زوجي سوا اللي عليه بس مو قادرة ارجعله بهالطريقة وخصوصا انه اخوي ما بيرضى يوديني وابوي صحيا ما يقدر وانا قررت واستخرت اني راح اترك الموضوع كذا وراح ارضى باللي راح يصير ايش ما كان لاني تعبت وانا احاول ارضي كل الاطراف ..
،،،وفي نقطة مهمة انا خايفة اذا رجعتله بدون رضا اخوي بس برضى امي وابوي مع انها جدا صعبه علي خايفة انه ما يقدر هالشي ويعايرني فيها او يستغله عشان يقهر اخوي لانه دايم يقول عن اخوي ابي اكسر خشمه وهو من قبل الزواج لاحظت انه ما يطيييق اخوي ابدا ما ادري ليش اسفة بجد اسفة اني اخذ من وقتكم كثير وادري في مواضيع كثير اهم من موضوعي فممكن تعتبروه فضفضة ..