السلام عليكم .. شخباركم
عجبني هالموضوع وقلت خلني ارد عليه ..

اممممم مدري بصراحه وش بيكون موقع كلامي من اعراب الموضوع لكن
ابقول ان الامور كلها تكون حسب التفكير او حسب تقبل الموضوع

وحدة من خوات زوجي دااااااائماً دعاها لاخوها اللي هو زوجي دائماً بهذي الصيغه
(( الله يزوجك )) .. قدامي طبعاً وبطريقه ماكرة لاثارة غيرتي بس ماعمري فكرت في انها
جادة هي دايماً تمزح ومزحها كذا .. وبالتالي انا مستحيل ازعل او تهتز فيني شعره او اذا رجعنا البيت اقلبها ع راس زوجي .. لا مستحيل .. ليش؟
لان اولاً ادري انها مقصدها الدعابه اولاً واستشفاف ردي وغيرتي كيف بتكون
ثانياً لاني واثقه من نفسي ومن زوجي ..

آخر موقف صار .. رحنا عمره في رمضان واخته ذي معنا وحنا بالسياره نتجاذب اطراف الحديث
قالت لزوجي بعد ما تهاوشنا انا واياها ع كوب قهوه [[ هواش ودي وبريء ولطيف يعني ]]
قالت يابو فلان انا خلاص قررت ازوجك والمهر من عندي وانا اللي بدور لك عروسه .. قال يعني بس البس بشتي واجي عريس قالت ايه بس .. قلت لعمتي كانت معنا اشهدي ياعمه والله ثم والله اني راضيه وموافقه بس تدفع هي المهر من جيبها عطيه ما يكون سلف ولا تسأل عنه بعدين .. قالت اشهد .. قالت اخت زوجي هيه انت ترى ترجع لي الفلوس بعدين بيني وبينك قال لا وش دخلني انتي تبغين تزوجيني وتدفعين عني المهر .. قالت انقلع وانا وش استفدت كذا .. قال مدري عنك انتي اللي اقترحتي قالت روح جعلك ماتعرف غير ام فلان ياناكر الجميل قال انتي روحي دوري لك عريس بدل ما تنشبين بينا وقاموا يتراددون وانا اضححححححك ..


شوف .. خوات زوجي بنات جداً بسيطات وطيبات ويتعاملون معي بعفويه وطيبه زايده
عشان كذا انا بالمقابل اتقبل كل شي منهم ولو احس بخبث او مؤامرات من وراي اكيد باصير اتصيد الكلام واحلل وافسر وانكد عيشتتي وعيشة زوجي بس لا النوايا صافيه ..


اتمنى ان ردي ماخرج عن اظار الموضوع

__________________
استغفر الله العظيم وأتوب إليه .. سبحان الله ..الحمد لله.. الله أكبر