موضوع جميل ...عشان نأخذ منه المفيد مو إفتخار بأبناء بلد يعادي دولتنا ودول الاسلام ...
فكر معي الشاب لما يفكر يتزوج ايش اول حاجه يفكر فيها يطرح مواصفات معينه واغلبها تصب في جمال الشكل بعد ما يلاقي هذي الفتاه يبدأ يتثقف في الجانب الجنسي وللأسف بعض الاهل وخاصه النساء من خوفها ع أخوها او ابنها لايتركهم يلمحوله عن أمور لازم يستخدمها مع زوجته واحياناً الاهل مايدخلو لكن الاصدقاء تلاقيهم انتبه عودها ع أسلوبك ومن دا الكلام أخويه قالو له الاتكلم زوجتك ايام الملكه بتدلع عليك وبتسير مشاكل
كم حاولنا فيه حرام عليك والله توقعناها بتتطلق والحمدلله كانت صبوره معاه ودحين سار زوج وأب صالح

نجي للبنت أول مايجيها عريس ويعجبها ووافقت تفكر في التجهيز وتعدي الفترة بين ملكتها وزواجها بالتجهيز وروحة وجيه ع الصالونات وللاسف نادراً ماتلاقي بنت تثقف نفسها في الفتره هذي
ويجوك صحباتها وربما أهلها زوجك ع ماعودتيه كل اسبوع عوديه يوديك السوق كل إجازه سفره وهدايا وووو

عمرك سمعت ببنت تتعلم الطبخ ع الاقل مارح نقول تفهم ايش لها من مسؤليات وايش الي عليها
بين ملكتها وزواجها في الغالب ماتلاقي بنت تتعب نفسها تتعلم تتطبخ بتقول يوه ملحقه ع الشقا خلوني اكمل راحت عندكم
بصراحه انا ع كثر البنات الي تزوجو عندنا السنه هادي اغلبهم مايطبخو

اذا هذا تفكيرنا قبل الزواج أجل بنفكر في حقوق الاطفال الجايين ياعمي مجرد ماتحمل البنت مهاوشه ع الاسم 😬

لكن بصراحه الام عندنا بعد ماتنجب هي الي تتحمل الابناء اكثر من والدهم
في موضوع له علاقه بالمسؤليه تذكرته لما شفت موضوعك تعبت منه له اكثر من سنتين مع اولادي الصباح لما يتجهزوا للمدرسه انا أصحيهم وافطرهم واجهزهم وابوهم من بعد مايصلي الفجر يروح ع غرفته يطقطق بالجوال لما يجي وقت دوامه
وانا زهقت جالسين كل صباح لوحدنا مايشاركنا حتى الفطور بعدها سويت زيه لانه مافي حل لاحوار ولاغيره
بعد ماافطرهم اقولهم شوفو ملابسكم هنا اذا انتهيتو البسوها وانام في غرفة المعيشه معاهم
جاء وقت ذهابه للدوام تجهز وع باله كالعاده بيلاقي الاولاد ينتظروه عند الباب مفرشين ومتعطرين ومتستشورين😬
لقاهم يسولفو بدون ملابس والام نايمه بسرعه جهزهم ومشو
اليوم الثاني نفس الشي
وهكذا حتى مر اسبوع والاطفال أكلوها من كثر مايعصب عليهم وكانه يقولي اسمعي وانا طناش
بعدها اتخذ اسلوب تاني يافلانه انا تعبان بنام جهزيهم
يافلان حتى انا تعبانه مانمت بنام
طيب نامي بعد ماتجهزيهم : طيب
اول ماراح نمت
بعدها حس ع دمه وسار يقوم معانا ويساعد في التجهيز
والجوال مايمسكه وانا عشان أشجعه كل صباح اشغل الفواحه في غرفة المعيشه واجهز فواكه لانه مايحب يفطر حليب وخبز

وأمور كثيره هذا فيض من غيض 😩
الرجل عندنا مايهتم بالاعتناء بالاطفال أبداً
مادري هذا الشي يقلل من رجولته يعني؟؟ عشان بس نفهم ونعذر!!!

يتقاسم الزوجان تربية الابناء و عبأ البيت في بلادنا :
★ يطبخ اذا اقتضى الحال
★ يسهر اذا مرضوا الابناء
★ينظف البيت حين مرض الزوجة او من باب المساعدة !
★ يشتغل في المطبخ يغسل المواعين ( في اوقات متقطعة )
★ يمضي اوقات فراغه مع اسرته غالباً...

أبو زوجي ضرب مثلا في حسن معاملة زوجه ( طبخا ، و غسيلا ، و شطف بيت و ما الى ذلك .... ) حتى انني مرة وجدته يعجن خبز و الله يشهد ...
هذه امور مفروغ منها عندنا اللهم ان كانت له اعباء و ظروف خارجة عن السيطرة !

أما ان رفض التعاون فهذه عقلية خاصة به وحده، فقدوتنا النبي صلوات الله عليه كان نعم الزوج لزوجه في بيت الزوجية !
فما الفرق بين الرجل الغربي و المسلم غير الاخلاق و الملة و الدين ؟؟

__________________
أشهد أن لا إله إلا الله و أشهد أن محمدا رسول الله صلى الله عليه و سلم

مرحبا متفائلة، شكراً لك على وجودك، وأنا أقدر ذلك كثيراً، واسمحي لي أن اختلف معك بنقطة وأتفق معك في بقية نقاطك.

_ فكرة أبناء بلد يعادي دولتنا ويعادي الإسلام، هذه معلومة يجب أن تصحيحها، الحقيقة أن أغلبهم مادروا عنا ولا فكروا بالإسلام ولا بغيره، بلشين كيف يدورون لقمة عيشهم، وهذه من المفاهيم المغلوطة، كما أنها من التلقينات التي كنا ومازلنا نسمعها مِن مَن يتصدرون للحديث أو يسمون أنفسهم علماء أو مفكرين أو كتاب إلخ..، وبالوقت نفسه لا أنكر ولا يمكن أن أنكر أن هناك شريحة قد تكيد للإسلام والمسلمين ولكن لو قارناهم في مجتمع الغرب بأكمله فإنهم لايصلون ولا حتى ل 1% .

أما بخصوص بقية الموضوع، فأنتي تصفين الوضع السطحي لمفهوم الزواج من قبل الرجل والبنت وعدم استعدادهم له، فضلاً عن فهمهم للحياة الزوجية وواجباتهم ودورهم، وحقيقة معنى الزوااااااااااااااااااااج الغائبة عند الكثيرين، وأنا أتفق معك في هذا الجانب، وأكثر مواضيعي وردودي بالأونة الأخيرة يتحدث عن هذه النقطة بالذات.

__________________
ياصبحِ لاتِقبل !!
عط الليل من وقتك..