السلام عليكم ورحمة الله وبركاته

كيف حالكم اعضاء هذا المنتدى الجميل
يمكن بعضكم يذكرني وكثير مايعرفني
تقدرون ترجعون لمواضيعي ماحصلتها للأسف
حبيت اطلعكم على جديدي طبعا انا تطلقت ظلم وبدون ادنى تقصير مني
بعد مرور اربع سنوات ابشركم رجع لي ابو أولادي ندمان
ويصف اللي سواه بالجنون ولعب العيال 🙄 عاد احنا حريم وعاطفيات ونصدق
كل كلمه تنقال أتمنى انه فعلا ندمان
المهم لي تقريبا شهر رجع لنا وهو جدا مشغول وقاعد يحسن وضعه المادي
على انه بيوفر لي مسكن ووافق على شروطي بس يبيني اصبر على ظروفه
انا انسانه قنوعه وبسيطه رجعت له وعارفه ان عنده زوجه وله ولد منها فكرررت
في مصير عيالي مع ابوهم افضل بكثيررر
الله يجعلها رجعة خير يارب
سؤالي للمعدد زوجها هل تغارين عليه وتفكرين فيه
انا بصراحه احس محروووق صدري بقوه كان لي
وصار الحين نصه بس لي 😅
مشكلتي ماتقبلت الوضع شوي هو راح لديرة زوجته الثانيه وفيها اهله
احس اني مزعجه ماودي انصل عليه ودي انساه فترة تواجده هناك بس عجززت
مو من كثر اتصالاتي مره في اليوم بس اتطمن عليه واسكر احسه ينحرج ولا وده يحرجني
ادري وضعه غير والعله فيني ابي انسااااااه فترة غيابه
كيف ماقدرت اتظاهر الثبات والقوه وداخلي هش ضعيف
مع العلم ماأبين لزوجي شي ابدا ولا اضايقه بالعكس
اسولف معه ببشاشه
ابيكم تساعدوني صدري مره ضااااايق
لما اقارن كيف كان قبل مايصبر عني والحين تغير صار عنده بديل ومكتفي 😢😢😢
شاكره لكم حبايبي


تم تعديل العنوان ليتناسب مع المضمون

مو متذكره مواضيعك للأسف بس ع العموم ألف مبروك الرجعة
الغيرة شي طبيعي لكن سيطري على نفسك خليه يكلمك هو لاتتصلين عليه لأنك أكيد ماترضين هي تكلمه وهو عندك ، طالما منتي متقبلة الوضع ليه رجعتي؟ لا راح ترتاحين ولا راح تريحينه ، إنتي إنفصلتي عنه فترة طويلة يعني المفروض تكونين تعودتي على غيابه ، كم من وحدة زوجها تزوج عليها ولاتقبلت الوضع وقلبت حياتهم لجحيم ، الغضب وعدم الرضا والتسليم إحتمال مع الوقت يزيد ، إذا في شي مو مريحك ولا إنتي قادرة تتقبلينه وتتأقلمين معه في اللي متقدم لك سواءً أبو عيالك أو غيره المفروض ماترتبطين فيه الكلام هذا موجه للنساء عامة ، لكن بما إنك تزوجتيه خلاص حاولي تسلمين بالوضع وترضين باللي كتبه الله عليك وتأكدي اللي تحسين فيه حتى زوجته تحس فيه ، وإشغلي نفسك بأي شي وإنسي إنه متزوج غيرك وإعتبريه بالشغل وإدعي دايم إنه الله يمسح على قلبك

__________________

وبدأت تحدي إنقاص الوزن الهدف إن شاء الله 55 كيلو

رجعت اقرأ قصة طلاقك وحزنت كثير
ورغم كل مافعل رجعتي له
حبيبتي انتي قلبك كبير

ماعندي اي نصيحة
والله انك ذهبه
الله يعوضك خير ويريح بالك

رجعت الموضوعك وردودك فتبين لي انك
امرأة نادرة بهذا الزمن..امرأة تتوج
على روؤس النساء تقديرا لتفانيها وتضحيتها
امرأة تقبلت قضاء الله وقدرة وهي مؤمنة
زوجك كان لدية كنز عيظم بل درة لم يحتفظ بها
صحيح بعض الرجال لديهم مثل هذي المراة ولا
يشعر بيقمتها الا بعد فقدها الف مبروك الرجوع
واسال الله لك حياة زوجية موفقة
اختم ردي ماشاء الله تبارك الله

__________________
سبحان الله وبحمده سبحان الله العظيم

__________________

مواضيعك السابقة

من الاقدم للاحدث

طلقني وكسر قلبي :

http://www.66n.com/forums/showthread.php?t=236638

ولما احكمت حلقاتها فرجت والحمد لله:

http://www.66n.com/forums/showthread.php?t=237547

فلذات الفؤاد :

http://www.66n.com/forums/showthread.php?t=243127

هل ارفع دعوى نفقة على طليقي:

http://www.66n.com/forums/showthread.php?t=253794

__________________

قرأت مواضيعك كلها

الله يعينك وييسر لك امرك ويعطيكي اضعاف نيتك الناصعة البياض

الطيبة حلوة ومطلوبة

لكن فيه ناس كثيرة تستغل هذه الطيبة

والظاهر زوجك كان منهم

السؤال : هل تغيرت اخلاقه ام هو مثل ماهو؟

بعدين كيف اغتنى واتزوج مدرسة والحين ماعنده فلوس؟

__________________

بعد اطلاعي لمواضيعك السابقه
احييك على كمية التسامح التي تمتلكينها داخل قلبك بعد اللي سواه فيك ..


وبرايي زوجته الثانيه هي من تحترق غيره كونها تزوجته وهو ليس بمعدد هي من تتألم اكثر
الله يكون بعون الجميع


سؤالي
انت ضامنته بيكون عادل بعد اللي سواه ؟

من بعد ماقريت مواضيعك ، ماودي أقول شي يضيق صدرك ، لكن جد إنتي خسارة فيه ، في مثل يقول : “لا تُعاشِر نفساً شبعت بعد جوع فإن الخير فيها دخيل ، وعاشر نفساً جاعت بعد شبع فإن الخير فيها أصيل .” ، إن شاء الله ماتندمين

__________________

وبدأت تحدي إنقاص الوزن الهدف إن شاء الله 55 كيلو

هلا اختي ضيعتني العاطفه

والله رجعت بعد استخاره ودعواااات
وفكرت في مصير عيالي لأني عارفه لو بتزوج غيره بيسحبهم مني
صحيح فترة انفصالي طويله وصبرت عنه بس يعلم الله كم عانيت وتألمت
فرحت برجعته اسأل الله ان يتمم لي على خير
بس ابيه هو يبحث عني ويشتاق لي مابي انا اللي اتصل عليه دايم
هو بيجلس تقريبا اسبوعين مو معقوله اقطعه مااكلمه
بس ابي اثقل عليه
انا والله اني ثقيله بس مدري وش فيني صرت خفيفه 😢😢