بتعرفي زينو انت ومعصبة بتشيلي الهم عن القلب ربي يسعدك دنيا وآخرة 😙😙😙😙
انا وعم اقرأ بس عم اضحك على اسلوبك الحلو
تعي روقي وما بدها هالقد وان شاءالله يقول الف مرة انت غلطة شو المشكلةما انت عارفة معزتك ومكانتك بقلبه والعصبي بيصير يحكي شمال ويمين والحمدلله انو ما بيقول كلام نابي او مسبات او بيقل احترام ساعتها عصبية وقلة احترام صعبة
بس عصبية مع كم كلمة لا بيقدموا ولا بيأخروا كفشة خلق طنشيهن
او اعطيه جوه خليه ينفس وما تهتمي
بتعرفي حبيبتي لو انك ما بتعرفي مكانتك عنده كنت قلتلك اهتمي وكلامه قاصده
بس هو بيرمي هيك كلام وبعدين ما كأنه صار شي

زينو بتعرفي صرت قايلي هالحكي كتير انا بس عصب بحكي اكتر من هيك
وبين الكلمة والكلمة بقول لزوجي انت اكبر غلطة
بس هو ما بيعمل منها مشكلة لانو فهم شخصيتي انو وقت عصب بدي احكي اي شي لنفس عن نفسي وبيعرف انو ما بحمل بقلبي ولا بيدوم الزعل بينا يعني سحابة وبتمر
مع اني ما بعصب مع اهلي الا نادرا وعلى شي محرز ومع الناس واصحابي مستحيل عصب
بس مع زوجي واولادي بحسهن اقرب الناس الي وحتى من نفسي برتاح معهن وما في اي قيود وبنفس عن حالي وبفش خلقي لانهم حافظيني عن غايب وبتصرف متل ما بدي بحس كأنهم نفسي

وومرات بطلعه لزوجي لفوق لفوق ومرات بنزله وهوي اذا عصب مع انو قليل ليعصب نفس الشي
وما بيهتز فيني كلمة من كلامه ولو جاوبته ببعض المرات او بطنشه لاني بعرف انا شو بالنسبة الو وهوي شو بالنسبة الي
بس لا بنعود نحاسب بعض ولا شي بنرجع نضحك ونمزح وبنعيش الجو
بس بجلسات المصارحة اللي صارت قليلة مع مرور السنين ممكن نحكي عن هالشي ليتفهم الشريك انو مهما قلت او قال ما ناخد عالكلام وقت العصبية

زينو يا رفيقتي مستحيل تمشي الحياة على ريتم معين
في طلعات ونزلات
ما في هدوء دايم ولا تعصيب عطول
متل ما بنقول هبات وبتروح
بس كله بيهون وقت نشوف الشريك وحده من بين كل العالم
فرح نطنش كتير ونتقبل اكتر ونقدم وناخد يعني خليط من كل شي
دعواتي ترافقك حبي

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه