المشاركة الأصلية كتبت بواسطة غزلان1ا

السلام عليكم ورحمة الله وبركاته
انا بعرض مشكلتي واتمنى تساعدوني لاني تعبت من التفكير😢!
المشكلة هي انا متزوجة لي 6 شهور وعمري22، زوجي انسان ماعنده احساس بالمسؤولية ابداً
يعني عادي يطلع مع اصحابه من العصر لما الفجر وانا طول هالوقت لوحدي بالشقه صح اخاف من الوحده بس مستحيل اتصل اقول وينك تأخرت من هالحكي! اعرف هالاشياء تزعج الرجل لكن برضو مستمر في السهر والطلعات وانا دايم لوحدي حتى والله العظيم تمر اسابيع ماطلع من الشقه ولا يطلعني، والله افتح الشباك ابي بس اشم هوا.. برضو لما يرجع ريحته شيشه ودخان، سألته مره انت تشيش؟ قال ايييه مو عاجبك؟ تقدرين تشكيني عند اهلك...
رضيت بقدر ربي وماعلقت..
ثاني شي بخيل معاي بشكل! يعني عادي يعطي امه اصحابه لكن معاي وعلى بيته بخيل جداً، والله ماتصدقون لما اقولكم للحين البس ملابسي من بيت اهلي اللي قبل زواجي ولا عمري رحت السوق ولا اشتري زي الاوادم!
ثالث شي انا طلبته يوديني مكه يومين من اول ماتزوجنا لكن يأجل يأججل وانا اسكت، اتصل عليه صاحبه قبل اسبوع قال بروح مكه تجي معاي! قال اوكي تم! وجا قالي انا رايح مكه الويك اند الجاي هالاسبوع اجلسي عند اهلك بالرياض لاني بطير من الدمام! (يشتغل بالدمام واهلي واهله بالرياض)
طبعاً قلت له انت وعدتني توديني مكه قبل 5 شهور ولما طلبك صاحبك مافكرت انك واعدني؟ قالي هذا اللي عندي تبين ولا ازعلي، سكت ومشينا الرياض
لما وصلنا وارتحنا وكذا قلت طيب ابي السوق بشتري هديه لبنت عمي ملكتها الاسبوع الجاي! قالي بصوت عالي ماعندي فلوس ولا تطلبيني شي وانتي طلباتك كثيره وانا والله ماطلب شي وان طلبت ماطلب الا الضروري واللي ناقصني وهو عارف! قلت طيب مارديت ولا رفعت صوتي ولا شي
لما جا يوديني لاهلي قالي شوفي تبين غيري بتلقين كثير ترا! انصدمت! قلت ايش يعني؟ قال افهميها! سكت مدري ايش ارد عليه...
نزلت عند اهلي واللحين لي اسبوع ماكلمني ولا اتصل ولا سأل، مدري ايش اسوي ومدري ايش غلطت فيه اصلاً!
والله مامدح نفسي لكن انسانه محترمه ودايم بيتي نظيف والبس له واتكشخ له رغم انه مايمدح ولا كأنه يشوف اصلاً! لكن مايهمني اهم شي انا راضيه عن نفسي..

كل يوم اقول بيسأل بيتصل لكن ابداً مافيه امل!