رد: ورجعت بعد غياب .. وجهوني
متابع وأتذكر مواضيعك السابقه ..
المشكله الرئيسيه بحياتكم بينك وبين زوجك واللي هي سبب كل اشكالاتكم .. تتلخص بمساعدتك الماديه له وشعور زوجك انه بحاجة فلوسك
هذا الشعور يجعل زوجك يشعر "بالضعف المعنوي" لأنه غير قادر على الصرف كما ينبغي لأن الصرف والقوه الماديه تعطي لصاحبها قوه معنويه وسياده وقوامه على من يصرف عليهم, ومن يقول غير ذلك عليه مراجعة نفسه
وطبعا زوجك يعلم ويقر في قرارة نفسه أنه هو المسؤول عن الصرف ولكن ضعف ماديته تجعله يتصرف معك تصرفات توحي بعدم اكتراثه بك أو بالحياة الزوجيه معك عشان ما تظني أنه بحاجتك
وهذا واضح جدا بدليل ان في كل اشكال بينكم يقول لك روحي لأهلك .. يعني بيوصل لك بشكل غير مباشر ان أنا ما تهمني فلوسك ولا انتي تهميني اذا وصلت المسأله للظن إنك الطرف الأقوى بالعلاقه عشان صرفك .
كل المشاكل اللي تصير بينكم ما هي إلا تداعيات للمشكله الرئيسيه اللي وضحتها فوق
انتي من جهتك بسبب فلتات لسانك عن الأمور الماديه وصرفك فيشعر هو بالضعف لما يسمع كلامك فيثور عليك
ثم تصير مشكله كبيره بينكم على سبب تافه ما يستاهل أساسا, والسبب هو التراكمات اللي بنفس كل واحد منكم على الثاني, ولو ما كنتي تصرفي أو لو كان وضعه المادي جيد كان ما صارت من الأساس أغلب أو كل المشاكل اللي صارت بينكم
لا تقول لي زوجي ما يحب اهلي
زوجي ما حضر زواج اخوي
زوجي يبغى ياخذ عيالي لاهله
زوجي يبغى يكشخ ويصير كريم على حسابي
زوجي كل شوي بيطردني من البيت
زوجي يعاملني بقسوه وجفا, زوجي زوجي زوجي ... إلى آخر المشاكل مع زوجك, لا تقولي لي شي من هذا كله .. هذه مثل ما قلت لك كلها تداعيات لمشكلتكم الرئيسيه
انتي في المجمل معدنك طيب وعندك تصرفات كثير حلوه مع زوجك ولكن فلتات لسانك عن الصرف تخرب أغلب الزين اللي تسوينه
وزوجك كذلك في المجمل معدنه طيب وعنده تصرفات كثير حلوه معك ولكن لما يشعر بالضعف المعنوي نتيجة ضعف ماديته بعد ما ترمي لك عليه كلمتين يفلت لسانه بكلام ما له داعي ويتصرف تصرفات تزعل وتخرب الزين اللي يسويه .
أتوقع بإذن الله لو تنحل الأمور الماديه لزوجك ويقوم بواجب الصرف كما يجب بتتحسن أموركم كثير للأفضل
ولو اني اظن أن هالأمر بعيد المنال نوعا ما لأن زوجك عليه قروض كثير .. هذا رأيي والله أعلم .
التعديل الأخير تم بواسطة سـلـطـان ; 07-08-2017 الساعة 02:45 AM
07-08-2017, 02:38 AM
ضوابط المشاركة
العرض الشجري