ياأخي اولاً/ والله ان قلبي مايطاوعني ان احرمهم من امهم وآخذ شغاله عشان اربي اولادي
الاطفال مالهم ذنب . وانا كل اسبوع اخذهم عندي بالشقه يجلسون عندي يومين وأرجعهم لأمهم . ثانياً/ بعد سنه لما اجي ابحث عن زوجه ماحد بترضى تتزوجني وعندي اطفال . إلّا يمكن وحده عندها طفل او طفلين . وأنا وهي زوجتي الجديده نبغى نعيش حياه سعيده . واذا كبرو بناتي وصارو اعمارهم ١٣ سنه راح يعيشون معانا . وزوجتي الجديده فيما بعد بعد مرور سنين طويله انا ابصم بالعشره راح توافق خصوصاً بجيب لزوجتي الجديده شغاله تهتم بأطفالي . هذا تخطيطي ياجماعة الخير
واللي عنده رأي يطرحه . ولكن مستحيل مستحيل اخذ اطفالي الا بعد ان يوصلو قرب سن البلوغ والرشد . فالولد عمره ١١ والبنت ٦ والبنت ٥ . وحالياً مالهم إلّا امهم

ياخي مشكلتك انك تطرح موضوع وانت اساسا قاطع على رأي
شوف يابن الحلال حنا قبلك مجربين
اترك عنك المثاليه الزايده والكلام اللي تسمعه من بعض الحريم
عيالك الحين في بيت رجال غريب ماتدري كيف عايشين وكيف يتعاملون
وحتى لو يعاملهم زين برضو راح تصير عم لهم مثل ماقال تحملتك كفايه
يعني بكل الحالتين خسران
اسمع ياابن الحلال انا قبلك مجرب ونصيحه لك امسك عيالك عندك وعوضهم لاتقول مااقدر
انا حتى الترويش اروشهم والحين الحمدلله مايطيقون بعدي
ثانيا ابعد عن الانانيه وفكر بعيالك اكثر من نفسك
من يقول لك ان مافيه اللي ترضى بعيالك انا الحين خطبت
وسبق ان وافقوا علي بنات اعمارهم 23 و24 وانا اللي رفضت
الحين الوضع ياخوي تغير البنات ملي البيوت وبنات الحلال واجد اترك عنك هالكلام اللي تحاول تقنع نفسك فيه
وبعدين بصراحه حتى عيب مدري كيف تقبل ان عيالك يتربون في بيت رجال غريب وانت حي
لو امهم ماتزوجت كان قلنا صح ولكن كون انها تزوجت خذهم
وانت حر
وصدقني راح تكابر وبعدين راح تجي وتطرح موضوع وتشتكي

انت عندك أولاد ذكور وعادي تقدر تربيهم وحدك وتروشهم
لكن صاحب الموضوع عنده بنتين عمر 6 سنوات و 5 سنوات
وخلينا نتكلم بصراحة
البنت قبل البلوغ بسنة سنتين تحتاج أمها كثير
عشان تفهمها و تكون جنبها
والبنات راح تكون لهم خصوصيات ماراح يتفهمها الأب , وجود الأم مهم
يعني بعد 5 سنوات كل البنتين قريبات من سن البلوغ
ويحتاجوا أمهم هذا الوقت
وما أظن ينفع ياخذهم كم سنة و بعدين يرجعهم
الأفضل ينتظر تصير أعمارهم 13 أو أو أكثر بشوية 15 مثلا وياخذهم مرة وحدة

الادهى والامر انهم بنات
هذا اللي يخليني انصحه بقوه انه ياخذهم ويربيهم
اجل اترك بناتي عرضي عند رجال مدري وشلون اخلاقه ولا كيف تفكيره

ياخذهم الوقت اللي يكون مستعد فعلا لتربيتهم
كيف يقدر يربي بنات أعمارهم 6 سنوات و 5 سنوات وحده ؟!
أبدا مايقدر
حتى لو بيجيب شغالة ماينفع تربيهم شغالة
وحاليا مايبي يتزوج
الحل يخليهم عند أمهم ويستودعهم الله
ويزورهم كل أسبوع مثلا ويكون قريب منهم
ولو وقتها حس انه البنات متضايقات عند أمهم أو زوج أمهم اتضح انه رجل عليه ملاحظات
وقتها ياخذهم , أما انه يتسرع وياخذهم في الوقت الحالي هذا تصرف متسرع وغير مدروس

يااختي صدقيني مافيه شي يصعب على الرجال
ولكن اذا كان ناوي فعلا وعنده احساس بالمسؤليه
اما اللي يبي يتهرب من المسؤليه سهل عليه يحط الف عذر وعذر عشان يرتاح ويتزوج ويسافر ويعيش حياته بالطول والعرض
ولايدري عن حال الاطفال المساكين
على العموم انا فاهم تفكير الاخ صاحب الموضوع واعرف كيف يفكر نوعيته من البشر
اسأل الله اللطيف الخبير انه يلطف بحال الصغار المساكين
ولايكثر من امثال صاحب الموضوع

تحية تقدير وإحترام لك ولجميع اخواني الاعضاء
صح يكون بيننا اختلاف في وجهات النظر وفي الاقتراحات . لكنها تظل محل اهتمام وتقدير
ولكن صح طليقتي كارها كره العمى . ولعيون اطفالي انا وافقت ان يعيشون مع امهم
حتى يكبرو وبآخذهم . ومتأكد ماراح ينسون الجميل . الرسول صل الله عليه وسلم عاش يتيم
فلاتخافون . امورنا وارزاقنا بيد الله سبحانه . نتوكل على الله . والله المستعان . والحمدلله انا قريب من اطفالي . كل اسبوع اشوفهم . وأزمه وبإذن الله وبتعدي على خير . وابشركم كنت مستاجر ب١٣٠٠ . والحين مستاجر عزوبي لحالي ٥٠٠ ورجع لراتبي ٨٠٠وبعد ١١ شهر راح انتهي من قسط السياره ١٤٠٠ ريال . ومن الان ولمدة سنه البنك بيعطيني تمويل حلو وراح اتزوج . فالدنيا يحتاج لها صبر . والحين بعد اسبوعين بيجيني زياده بالراتب ٥٠٠.لأني راح اترقى .. والان ولمدة سنه بقرر عالزواج وبيصير الراتب ١١٥٠٠ وقولو ماشاء الله . وراح تشفى جراحي وأقرر عالزواج
والحين ماااا أقدر . ورحم الله امرءٍ عرف قدر نفسه

أغلب كلامك عن راتبك وكم بيصير واجار بيتك والتزاماتك ووضعك المادي ومتى تقدر تتزوج وكذلك عن فرصتك الجيده بالزواج كونك مطلق بدون أطفال, وواضح ان عيالك ما لهم أولويه عندك وجل تفكيرك بأولوياتك ومصلحتك !!
ترضى بالله على بناتك يتربون عند رجل غريب إلين يقربون من البلوغ ؟
هل تثق بهذا الرجل بحيث تترك بناتك معه ؟
نعم هو زوج أمهم, ولكن هل تعرف أخلاقه والتزامه ؟
كم أعمار أولاده الذكور ؟
طيب وإذا كان الرجال ونعم .. هل بترتاح لوجود بناتك مع أولاده الذكور في بيت واحد وهل تأمن عليهم منهم ؟
هل تضمن ما تطلع طليقتك وزوجها من البيت في يوم ما لحالهم وتترك بناتك مع عياله ؟
وهل ترتاح تترك ولدك مع بنات غير محارمه لحين بلوغه ووصول عمره 18 ؟
كم أعمار بناته ؟

إذا كنت تظن أن ولدك بيعدي مرحلة المراهقه وبالذات من 15 الى 18 بسهوله وبدون وجودك الدائم بجنبه وتربيه تحت عيونك بتكون غلطان جدا
فكر بترتيب وضع عيالك من الحين قبل ما تتزوج وترى لهم الأولويه قبل نفسك حتى لو تضطر تنقل عملك من مدينتك لمدينة أهلك ويعيشون معك عند أهلك مثلا, وجب خادمه تساعد اهلك بخدمة عيالك
مهوب ضروري اليوم أو هذا الشهر تخلص كل شي, ولكن اعط هذا الموضوع جل اهتمامك حتى لو تحقق بعد أشهر ولا سنه مهيب مشكله
المهم تجيب عيالك عندك وهم أطفال ويقيمون معك وأمهم يروحون لها زيارات بالاجازات .
اخوي .. الكلام المثالي اللي تسمعه من البعض ما راح يقدم ولا يأخر لو صار شي لبناتك لا سمح الله ولا لو غلط ولدك مع وحده من بناته لا قدر الله وانذبح ولا انطرد بالشارع
نصيحتي لك .. لم عيالك عندك ببيتك تحت جناحك, أمهم اختارت حياتها وراحت تربي عيال الناس
وانت اختار حياة عيالك بما فيه مصلحتهم وربهم عندك .

__________________

هههه يااخي الله يصلحك . تقول اسمع كلام حريم . شايفني ضعيف شخصيه وإلّا ايش قصدك . الهرجه ومافيها وبدون جدال . ماراح آخذ بناتي الا اذا وصلو ١٣ سنه وانا موافق يتربون عند امهم لانها كفو للتربيه . المشاكل غير والأم الكفو والقادره على تربية الاطفال غير . ولعدة اسباب . منها اللي عمرها ٦ سنوات . يبقى لها ٧ سنوات وراح اسحبها وبيصبح عمرها ١٣ واللي عمرها ٥ سنوات ايضا بسحبها مع اختها ويصبح عمرها ١٢ . والولد ايضا بسحبه ويصبح عمره ١٨
يعني كل هذا بعد ٧ سنوات فقط . وانا كل اسبوع ازورهم . وانا وطليقتي ساكنين بنفس الموقع .ويعني المسافه ١٥ دقيقه فقط بالسياره وانا ساكن الحين عزوبي . كيف تبغاني اخذ اولادي معاي وانا لحالي ووراي دوامات . يااخي ضلم احطم نفسيات اطفالي وابعدهم عن امهم . همي وراحتي وسعادتي هم اطفالي . ليش احرمهم من امهم . عشان والله اقهر امهم واخذ اطفالي منها عشان اربيهم .لا يااخي سعادتي بسعادة اطفالي . الام ماتعوض . تكفون لاتزيدوني هم على هم . انا مستحيل احرم اطفالي من امهم . هي تمثل نفسها وأنا امثل نفسي . . وجميع اسرتي يبعدون عني مسافة ١٥٠ كيلو ومافي احد بموقعي يقرب لي . واسرتي بعيدين. ولاتقول خذ شغاله وخليها ترعى اطفالك . ماهو انا اللي ارضى لأطفالي يتربون وبكبرون على يد شغاله . هذا اللي ناقصني شغاله وتربي اطفالي . مستحيل اوافق

هههههههههه ضحكني جملتك الاخيره اجل ماترضى شغاله تربيهم وانت عندهم وترضى رجال غريب يربيهم ههههه الله يصلحك بس
ومن قالك ان القصد انك تقهر امهم؟
بس ياليت ماتكذب على نفسك وتدعي ان همك مصلحة عيالك
انت همك مصلحتك انت عشان لو تبي تتزوج مايكون عيالك عائق

على العموم يابن الحلال سو اللي تشوفه مناسب الله يوفقك
واضح ان الكلام ضايع