اول شي يقابلك وانتي رايحه للفم الشفايف



أول مشكله يانها تكون صغيره يانها تكون كبيره صح؟

طيب لو كانت صغيره ..

ممكن ترسمين بمحدد الشفايف خط شفايف وهمي خارج الحدود الاصليه بس لازم يكون لون المحدد نفس درجة الروج تماما عشان يضبط وبيطلع حلو بعد ماتتمرنين على وضعه



0 القلوس او الملمع من اكثر الاشياء اللي تكبر الشفايف وتحليها وحسب ما اسمع انه جذاب جدا ا واكيد فهمكم كفايه.. فيه منه انواع والوان واشكال وانا عن نفسي جربت ماركات كثير ... لكن والله والله مالقيت القلوس اللي زي اللي اشوفه فالصور والتلفزيون اللي يخلي شفايفك زي القزاز مليانه ومنفوخه وتلمع ومافيها خطوط الشفايف الا فماركة فور ايفر عندهم ألوان مدمررره تجنن بدرجات روعه الوان الوردي والمشمشي والاحمر وغيره وغيره فيه بقلتر وبدون يجي زي العصار يعني ماتحطينه بفرشه زي القلوسات العاديه هو زي ماقلت عصار وفيه فتحه صغيره من فوق تضغطينه وتاخذين بفرشه من عندك ماله فرشه بس يجنن يجنن وسعره خمسين وحاجه .. وعندهم برضو قلوسات بروائح الفواكه جدا رووعه بالوان روعه ولماعه بس ريحتها شي رهيب ؟ وبرضو في فمحلات مكياجي المعروفه قلوسات حلوه



0 بالنسبه لتشققات الشفايف في فنكتار وبرضو عند بودي شوب مرطبات قويه وحلوه بالفواكه وزبدة الكاكاو وبعد كويسه تدهنين فيها الشفايف



0 اما بالنسبه للتصغير .. فاول شي ماتستخدمين الوان غامقه .. الالوان الترابيه واللحميه تناسبك كثير والافضل ماتستخدمين قلوسات لانها تزيد حجم الشفايف ..والمحدد اللي بارز ولونه قوي ومو ممزوج فالروج مايناسبك لانه يركز النظر على حجم الشفايف ..والمفروض تنبسطين بصراحه لان الموضه هالسنتين الشفايف الكبيره العالم تحقن سليكون وانتي رباااني ابسط ياعم...ولو انا منك احط اطلق قلوس ولايهمني واكبرها زياده ههههه

بس زي ماتفقنا لازم تكونين انتي اللي معجبك هالشي ومرتاحه عشان تدلعين وانتي كلك ثقه



0 اما اذا كان لون شفايفك غامق او محدده شفايفك رباني بلون غامق فالحل انك تحطين طبقة كريم اساس على شفايفك قبل تحطين الروج عشان يعطي اللون اللي تبغينه

وغالبا لما تبغيت تشترين روج عاجبك لونه خوذي نفس اللون افتح بدرجه عشان مع شفايفك يطلع اللون اللي تبين ..



0 وطبعا عشان يطلع الروج حلو لابس تكونين شايله الوبر اللي فوق شفتك العليا او على الاقل مشقرته عشان تكتمل الانوثه <<لاحظوا اني ماقلت الشنب عشان ماجرح انوثتكم ههههه



خلصنا من الشفايف ولو ماقتنعتي خلينا نروح للأسنان



0 طبعا التسوس او اذا فه اسنان بارزه او مو مرتبه الاسنان فانتي بقمة الغباء اذا سكتي على نفسك لان جمالك وجهك مايكمل الا بابتسامتك وابتسامتك عمرها ماتصير مشرقه الا باسنان صحيه على الاقل ومرتبه ونظيفه لو ماكانت بيضا ثلج.. فلازم تكون اسنانك تمام التمام وماعندك تسوي ولو اطراف اسنانك مكسره روحي لدكتور اسنان كويس يسوي لك اياها لو طرفها مكسور او كان متسوس الحين في ماده يستخدمونها تعوض المفقود من اطراف السن ومو مكلفه كثير .. وطبعا اكيد اذا اسنانك يبغالها تقويم حتى لو عندك عشر عيال لازم تسوينها كفايه اللي راح من عمرك...واذا اسنانك تعبانه ركبي اسنان واذا لثتك فيها نزيف او التهابات لازم تتعالج مالها حل لانها بتتعب اسنانك وبتسويلك رائحه فالفم وانتي فغنى عن هالاشياء اتفقنا



0 طيب الحين ان شاء الله تكونين خلاص مافي تسوس مافي سن طالع سن نازل مافي سن مكسور .. نجي للنظافه الللي مافي مفر منها لاي انسان فكيف عاد فمرأه ومتزوجه وتبي تدلع ؟ فرشه ومعجون وخيط تنظيف اسنان + فحم تفركين فيه الاسنان كل كم يوم يشيلك الطبقه المتراكمه على الاسنان من بقايا الاكل تمام ويبيضها او ملح وهيل يطيب فمك ويبيض اسنانك... هذا بشكل شبه يومي ... والحين لازم تسوين تبييض اسنان اذا اسنانك صفرا او متاثره بالشاي والقهوه او لو كنتي لاسمح الله لاسمح الله ربي مبتليك فالتدخين .. واول كان غالي بس الحين الاعلانات ماليه الجرايد عن عروض تنظيف الاسنان وتبييضها من 50 ريال وانتي طالعه ل400 واكثر واكثر حسب اللي يناسب ميزانيتك..

وبعد الحين طايحين بطبقة البورسلان اللي يدهنون فيها الاسنان وتطلع لولو زي اللي مسوية اصاله نصري بيااض ناصح واسنان تلمع وابتسامه حلوه .. بس ماعندي فكره عن اسعاره

0 بالنسبه للسان تنظيفه يكون بالفرشه حقت الاسنان وفي فالصيدليه حاجه اسمها معلقة اللسان تنظفين فيها اللسان الصباح او بعد الاكل تتخلصين من البقايا او من مسببات رائحة الفم اللي تكون على اللسان ...وفي كثيرررر انواع غسولات فم ومضمضات بكل النكهات ..لكن سيمعت ان طعمها مش ولابد بالنسبه للطرف الاخر



وبرضو في بخاخات للفم فكل الماركات وممكن تلاقينها فالصيدليه تعطر الفم ... وطبعا مافي احسن من السواااك تنظفين اسنانك وتطيبين فمك فيه .. واذا غلبتي حبة هيل تمضغينها ولا حبوب مص مثقل بولو وغيرها تقوم فالواجب ... ولاعاد تجين تقولين فمي واسناني ؟؟



الحين بعد ما صارت نظيفه ومرتبه وريحة انفاسك حلوه بتقعدين جنب زوجك بكل ثقه وتبتسمين من كل قلبك بدون ماتلفين وجهك ولا تحطين يدك على فمك ولا تخافين تهمسين له من قريب ولا تقبلينه باي وقت او يقرب منك وتتهربين منه ولا تضطرين تقولين مافرشت اسناني ؟



وبالنسبه للزينه ... طايحين الحين بالكرستالات اللي تنحط على واحد من الاسنان الاماميه .. وطالعه حلوه على كثير بنات ممكن تحطينها من باب التغيرر والاحلى تكون صغيره ... سعر ها مع التركيب عند دكتور الاسنان ب400 واذا ماتبين ممكن تشترينها من محلات التجميل العاديه ب20 او 30 ريال تلصقينها وتشيلينها وقت ماتبين وتحلي لك فمك خصوصا اذا اسنانك حلوه

.......


الأخت الفاضلة ،
برجاء الاطلاع على الفتوى التالية فيما يختص بوضع المناكير:

السؤال: ما حكم صلاة المرأة التي تضع المناكير على يديها؟
الاجابة: الشيخ: إذا لم يصح وضوئها لم تصح صلاتها لقول النبي صلى الله عليه وسلم لا يقبل الله صلاة أحدكم إذا أحدث حتى يتوضأ فمادام الوضوء غير صحيح فالصلاة غير صحيحة أيضاً.
المفتى : فضيلة الشيخ محمد بن عثيمين( رحمه الله )

خلصنا من جسمك نفسه نجي عاد للبسك وطبعا مستحيل اجيب طاري لبسك برا البيت لاني ادري انك بتكونين خبيررررررررررره فيه وكل شي على الموضه تعرفينه بس للي برا البيت سبحان الله ... تعالي نتناقش انا وياك ونتكلم بصراحه

أدري انك فالبيت تبين ترتاحين طيب هذا متفقين عليه بس ليش هالراحه ماتجي الا بقميص قديم ولونه غبي ووسيع كنه مو لك وموديله نص ونص ؟

ليش مجرد مسمى اسم لبس البيت صار معناته قميص قطني من ابو عشرين ولا من ابو خمسه مشي حالك ..وان تكرمتي لبستي بودي ولا بلوزه من اللي كرفتيهم لبس برا او شكلهم طلع مو مره مع جنز قديم ولا أي شي ومشي حالك وغالبا حافيه ولا شبشب من تزوجتي ماغيرتيه ليه؟ طيب ليش الاكسسوار بس برا البيت طيب اقنعيني ؟ يعني بتفقدين توازنك لو لبستي حلق كل يوم؟ ولا يعني اصبعك بيطلع من مكانه اذا لبستي خاتم ناعم .. ولا بتختنقين اذا لبستي سلسله لو بدون تعليقه ؟



طيب قوليلي من اللي قال بس ان اللبس المريح لازم يكون شين او خلينا نتجاوز ونقول مو جذاب ... طيب ليش ممنوع لونه يصير فاتح وحلو ويفتح النفس طيب القميص الواسع اللي مكبر سنك ومزود حجمك ومخفي ملامح جسمك وماظن بتجرأين على حركة دلع وحده وانتي لابسته؟

ومن قال ان القميص اذا صار جذاب وناعم ويفتح النفس بيصير مو مريح ههههههه

عليكم اشياء تقهر وتفرس على قولة المصريين ..



طيب مو أريح البنطلون القطني او الجنز او أي قماش فالدنيا مو شرط يكون لاصق فيك وكاتم انفساك؟ مو احلى بودي ناعم او توب او بلوزه احلى من القميص اللي كمه مكشكش وزرايره تهبل ويقهر قهر



طيب الشبشب الله يكرمك يوم انك تلبسينه كل يوم وكل وقت مع كل لبس وفالمطبخ وفالحمام وفالصاله وممكن تدخلين به غرفة النوم ليييييييه



الشباشب مو غاليه واقصد شباشب البيت اطلق ماركه بيكون سرعه 49 ريال ومن أي محل بتاخذينه بعشره وعشرين يعني بس لو كل مره تروحين تشترين جزمه للفستان الفللاني وصندل للطقم العلاني ب60 ريال تجيبين ثلاث اربع شباشب للبيت الواحد ب10 و15 وش بيكلف

طيب ليش القمصان كيف بيجيك نفس تدلعين وانتي كاشخه بقميص لابسته امس وقبل امس واللي قبله ؟ طيب فرضا صرتي وسيعة وجه وتدلعتي منهو بالله اللي بيتقبل منك؟





ليه ماتمرين أي محل رخيص وتاخذين لك تشيكلة بجامات حلوه والفساتين القطنيه اللي تجي لتحت الركبه وبدن اكمام وموديلاتها كثيررر والوانها اكثر .. ليش ماتاخذين من الطقوم اللي تشبه الترنقات الرياضه اللي تجي ثلاث قطع بنطلون وبودي وجاكيت قصير ... ليش ماتجيبين من القمصان اللي تكون نص كم وطولها لين نص الساق ومرسوم عليها دبدوب ولا ارنوب ولا اي رسمه ناعمه تفتح النفس ولا تجيبين من البجامات اللي تكون بودي وبنطلون قطني ومعاه روب نعوم تطلعين كأن عمرك 17

وكل بجامه معها شبشب لونه مناسب ونظيف ويفتح النفس ... ولا تشترين من البرمودات اللي بالكوم فالسوق وبارخص الاسعار ليه حارمه نفسك الدلع والثقه والاناقه وحارمه زوجك ليه



انا عارفه ليه ماتدلعين خصوصا انا للحين مامات احساسك



لو فكرتي تدلعين بينك وبين نفسك بتقولين مالاق الدلع الا علي يعني ؟ اكيد بيحس انه مصطنع .. يمكن مايتقبل ... يمكن تلوع كبده من دلعي الماصخ؟ ليش طيب جاك هالاحساس ؟

مو لانك قبل شوي قبل لاتكشخين كنتي لابسه القميص القديم اللي من كم شهور وانتي تكرفينه غسيل ولبس غسيل ولبس ؟ مو لان قبل امس قرب منك وانحرجتي وتوترت اعصابك ولا بادلتيه الضمه زي منتي ودك وهو وده تقولين ماله داعي تحك يدي بيده وهي خشنه؟ طيب ليش لما يكون قاعد عند التلفزيون ماتجين بكل دلع وتجلسين بحضنه؟ لك وجه وانتي رجولك متشققه ويدينك كلها شعر واسنانك نسيتي تغسلينها بعد الغدا ومنتي واثقه من شكل شعرك مع انه مغسل لكن مو مسشور ؟ طيب بالأمانه لما يجي فبالك زوجك وانتي قاعده معك اقصد تبغينه مثل ماتبغى الزوجه زوجها اكيد فهمتيني امانه جاوبي نفسك بصدق .. على طول وبكل ثقه وبنفس اللحظه تقومين له وتبوسينه وتحسسينه برغبتك بكل ثقه ولا تطيرين تاخذين دش والموس يشتغل فكل انحاء الجسم وتطيرين كريم من هنا وعطر من هناك وفرشة اسنان من هنا ؟ ولا والمصيبه لما تروح السكره وتجي الفكره وترجعين له المجلس .. تقولين لنفسك؟؟ لالا الحين يقول ماتحممت وتزينت الا يوم بغتني ؟ اذا يبيني هو يجي ولا بكيفه مالي خلقه بعد يعلق علي ..ولاصار هالموقف مره ثانيه تقولين ليه من اساسه اروح اتضبط وانا عارفه اني بجي ومابيجيني نفس اتقرب له

ليه ماتنطلقين باحساسك وبحياتك يعني الحين بالله حارمه نفسك اشياء كثير وحارمه زوجك طلتك وجوك وانوثتك بس عشان ما تاخذين من وقتك كل يوم ربع ساعه عشان تكونين جاهزه له ولنفسك باي لحظه وباي وقت



قولي لنفسك وش المتعب ؟ وش المكلف ؟ وش الشاق ؟



-تعب عليك بعد كل دوره شهريه تقعدين ساعه او اقل تزيلين شعر جسمك كله



ساعه فالشهر كثير ؟





-طيب تتحممين فرضا مرتين فاليوم



لهدرجه ينهك قواك انك تمسكين بخاخ جونسون وتبخينه على كل جسمك؟ دقيقه وحده بياخذ



طيب متعب تدهنين يدينك وجولك بكريم مرطب بياخذ دقيقتين



طيب تبخين سبراي معطر بياخذ نص دقيقه يتعب ؟

ماظن انه يتعب



تشيلين المنشفه عن شعرك وتمشطين شعرك وتحطين سيروم وتفركين شعرك وتنشفينه بسشوار هوا وتسشورين كم خصله من قدام وترفعين الباقي باكسسوار شعر انيق وتنزلين كم خصله كل ذا مابياخذ خمس دقايق وكل ماتعودتي صار االوقت اقل

( على طاري السيروم تراه مره كويس خصوصا للي يغسلون شعرهم كثير وهو ماده زي الجل بس ماياثر بشكل الشعر مايصير منفوش او ملبد يعني لكن شغلته تحطينه على اطراف الشعر وهو مبلول عشان مايتقصف ويحميه من حرارة الاستشوار ومن أي شي يتعب اطرافه ويتعبه موجود فكل محلات التجميل في سيروم كريستال وريحته عطريه حلوه وفي سيروم بدون أي ريحه من نكتار سعره 40 وكريستال سعره 35 ومادري اذا في من ماركات ثانيه او لا ) نرجع لموضوعنا

نجي لوجهك كريم مرطب وبعده شوية قلوس وكحل جوا العين وماسكارا خروع وبودرة خدود مابتاخذ ثلاث اربع دقايق



البسي حلق وخاتم نعوم وححطي خلخال صغير فساقك والبسي أي قميص نعوم قصير وش يمنعك ورجولك ناعمه ونظيفه ؟ وماله اكمام بعد وش يمنعك ويدك مافيها ولا شعره وناعمه وتكونين باخه على مكان النبض اللي فيدك بخة عطر ياسلام واظافرك مقصوصه كل اسبوع مره ونظيفه واسنانك مفرشيتها ولا فيك ولا سوسه ولا بقعه فاسنانك وتكملين طلتك ببختين عطر وشبشبك النعوم ابو فيونكه ورديه ... يالله روحي طالعي نفسك وقوليلي وش يمنعك تكونين كل يوم كذا واحلى ؟ وش بينقص عليك؟



كل يوم تقعدين عند البرنامج الفلاني والفلم العلاتي ساعه ساعتين وتكلمين صديقتك ربع ساعه ونص ساعه واكثر وتتصفحين مجله خمس دقايق عشر دقايق



مستخسره فنفسك نص ساعه كل يوم موزعه تهتمين بنفسك؟ مستخسره فنفسك انك تستقطعين من الفلوس اللي تروح بالهبل على الماركه الفلانيه ومحل الفساتين العلانيه بس ميتين ريال كل شهر تجيب لك اربع خمس غيارات للبيت كل شهر .. ومع التعود بتصيرين يوم تلبسين فستان طلعه نعوم عندك فصريه ويوم تملين حتى من البجامه الحلوه وتلبسين لك تنوره ناعمه وبلوزه من اللي تكشخين فيها لصديقاتك؟ ليش ماتنسين شي اسمه قمصان وحوسه فالبيت؟ المكان اللي يعلقون فيه القمصان فالمحلات لاتفكرين تمرين عليه وان اشتقتي لشي واسع .. مري اليشمك او افخم محل وخوذي لك اكشخ واطلق جلابيه باحلى الوان وحطي ذاك المكياج السنع ودهن العود و افردي الشعر الحلو وادعيلي هههههه بس قميص لايطري لك تجيبينه



يالله انسي اللي فات وطلعي القمصان اللي عندك تصدقي فيها واذا كرفتيها وديها اقرب صندوووق مهملات على قولتهم ولا خبيها فدولابك لايام النفاس والكريمات والزيوت والخربطه حقت النفاس ... بس فبيتك انسيها ... واذا كان عندك اولاد لاتخربينها مره فاللبس



ياسلام ياسلام.. مر شهر وشهرين وانتي زي القمر ماشالله عليك ولا انظف ولا انعم ولا احلى ولا اشيك... اتحداه ابو العيال يجي يوم يعلق على شعر ساقك ولا يعاير بفلانه وعلانه وتطير عيونه فالتلفزيون ماظنيته ...



الحين بعد كل هالزين بالله ماتحسين ان شكلك صار دلع × دلع



ماتحسين انك رهيبه ههههه





شفتي شلون الزين يونس بس لو تتخيلينه



اجل كيف لو تعيشينه....بتكسبين مابتخسرين .. ابدي من جديد وعيدي حساباتك لان العمر يخلص والشغل مايخلص وبكرا وبعده بتفتحين عيونك وتلاقين العمر عدىى بسرعه شبابك راح ..ترا لنفسك عليك حق ولزوجك عليك حق .. وحطي الله قدام عيونك واطلبي الاجر من الله قبل كل شي على اللي بتسوينه وا ن شاء الله بيعينك ويوفقك..

وترا الزين مايكمل الا باخلاقك وذوقك وصوتك الهادي ....الله يوفقك



....الحين بقى اقول اني اشوف ان الدلع يبدا بالثقه والثقه تبدا من النظافه والاناقه وبعدين الجمال ...على اساس انك مره عاقله ومتزوجه وجمال الروح والاخلاق ان شاء الله فيك شي مفروغ منه وبعد ماقتنعتي ان الدلع يجي من دلعك لنفسك اول .. وكل مامريتي من عند المرايه شفتي غزال شارد... مو بس فالمناسات تشوفين شكلك مبدله ...



وانا الحين انتهيت بيني وبين نفسي من المرحله الاولى من الدلع

مو يقولون احترم نفسك عشان الناس تحترمك انا اقولك دلعي نفسك عشان زوجك يدلعك ويشوف الدلع فيك... وان شاء الله اذا تجاوبوا خواتي معاي بنتساعد على المرحله الثانيه واللي هي الدلع بالحركات والصوت والنظرات وكلوو...



وحابه اقول شي بعد..كل اللي مكتوب من كتابه يدي اليوم ومن كم ساعه وانا اكتب .. نتاج حب واهتمام بكل شي يخصنا كجنس ناعم من لبس ومكياج زيي زي أي بنت. وحبي للذوق والاتيكيت فكل شي كلام ومعامله واخلا ق وشكل ولبس .ومن خلال اللي اشوفه من صديقات وقريبات من الانقلاب والدمار الشامل اللي يصير بعد ماتتزوج البنت كنها خلاص انتهت مهمتها تزينت بما فيه الكفايه وتأنقت لين انخطبت وتزوجت وخلاص ... تمت ....جددوا عهدكم بالانوثه وخليكم بنوتات حلوين لو صاروا بناتكم قدكم ... انتظر خواتي واضافاتهم عشان نبدا فاللي بعدوا مع بعض .. وتراني مو متزوجه وعمري 23 سنه لكن ان شاء الله اني احب الخير لخواتي وابي افيدهم بكل شي عرفته من خوات لي بعد سواء فالنت او فالحياه ... يعني لاتاخذون فيني مقلب وتحسبون اني مره سنعه وزجي فجيبتي هههه ..توي بنت وعلى قدي وان شاء الله واتمنى اصير زوجه ناجحه ودلوعه بعد



انتظركم... وكذا خلصت الجزء الاول ...